وتكەندە ءبىر ءتىلشى ءماتىنىن تەكسەرتۋگە جىبەردى. قۇلاعى ەستىمەيتىن بالالارعا دىبىس ۇلعايتقىش قوندىرعىسىن ورناتىپتى، سيۋجەت سول جايلى.

ءماتىندى بىلاي باستاعان: ء"تىل مۇكىستىگى مەن ەستۋ قابىلەتىنىڭ ناشارلىعى - ەمدەلمەيتىن دەرت ەمەس". سۇراسام ول بالالار سۋدىڭ سىلدىرىن دا، جەلدىڭ ءۋىلىن دە ەستىمەيتىن ءارى سويلەي المايتىن جاندار ەكەن. ورىستار "گلۋحونەموي" دەۋشى مە ەدى، سول. مەن الدىم، ول سويلەمدى: "ساڭىراۋلىق پەن مىلقاۋلىق -ەمدەلمەيتىن دەرت ەمەس" دەپ تۇزەتتىم. الگى جۋرناليست قىرىققا كەلىپ قالعان جىگىت اعاسى ەدى، مەنىمەن كەلىسپەدى. جاس بالالار عوي، ولاي ايتۋعا بولمايدى دەدى، مەن ساڭىراۋلىق پەن مىلقاۋلىق ول اۋرۋدىڭ اتى دەدىم. ال ءتىلى مۇكىس ادام سويلەي الاتىن ادام، تەك ءتىلى كەكەش، تۇتىعىپ قالادى دەدىم. ال ەستۋ قابىلەتى ناشار دەگەن ازداپ ەستيتىن ادامدارعا لايىق. ال بۇلار ساڭىراۋ عوي، مىلقاۋ عوي دەدىم.

ول ماعان مورال وقىعىسى كەلدى. مەن ەندى قازاق اتامىز ءاربىر اۋرۋدى ءبىر سوزبەن تاڭبالاعان عوي، ونى شۇباتىپ جايداقتاتقاننان نە ۇتامىز دەپ بولمادىم. اقىرى مەنىڭ نۇسقاممەن ول دۇنيە ەفيرگە كەتتى. كەشە دە سونداي ءبىر جاعداي بولدى. الماتى وبلىسىندا جەتىم بالالارعا ارناپ تۇرعىن ءۇي سالىنىپ، بالالار ۇيىندە تاربيەلەنگەن جەتىمدەرگە بەرىلگەنىن جازعانمىن. سونى وسىنداعى ءبىر جىگىتتەر "جەتىمدەرگە ارنالعان ءۇي" دەگەنىڭىز نە سۇمدىق، "جاستار ءۇيى" دەپ اتاعان دۇرىس دەپ پىكىر جازىپتى. وپىرماي-اۋ مەن ول تۇرعىن ءۇي كەشەنى قانداي اتاۋ العانىن بىلمەيدى ەكەنمىن. بار بىلەرىم جەتىم بالالارعا ارناپ سالىندى، سولارعا بەرىلدى. ەندى ونى جەتىم بالالارعا سالىنعان ءۇي دەمەگەندە نە دەيمىن. جەتىمدەردى، جەتىم دەپ تابالاپ وتىرعان ەشكىم جوق. ادەبيەتتەگى "تابۋ" مەن "ەفەميزمنەن" ازداپ حاباردارمىز. بىراق جەتىم ءسوزىن شىعارعان مەن ەمەس، نەشە جىلعى تىلدىك سۇرىپتاۋدان ءوتىپ بىزگە جەتتى ەمەس پە؟! ونى بۇگىن قولدانۋ نەگە ەرسى كورىنۋى ءتيىس. جەتىم سوزىنەن قۇتىلۋ ءۇشىن وندا كىشىگىرىم لەكتسيكولوگيالىق توڭكەرىس جاساۋ كەرەك شىعار. جەتىم، ساڭىراۋ، مىلقاۋ، زاعيپ دەگەننىڭ بارلىعىنىڭ باسقاشا بالاماسىن تابايىق وندا. تەك ول بالامالار سىزدەر ايتقانداي "اتا-انا قامقورلىعىنان ايىرىلعان، ەستۋ مۇشەسى جەتىلمەگەن" دەگەندەي اششى ىشەكتەي شۇباتىلماۋى كەرەك. ءبىر ءسوز تابىڭىزدا ۇسىنىڭىز، مەن قولداۋعا دايارمىن. ورىسشادان تىكەلەي اۋدارامىز دەپ كەيدە الىستان وراعىتىپ كەتەتىنىمىز-اي...

ەسبولات ايدابوسىن

Facebook-تەگى پاراقشاسىنان