ۇستازدىڭ ەڭبەگى – شاكىرتىنىڭ جەتىستىگىمەن باعالانادى. ولاي بولسا، كۇنگەيلىك ۇستازداردىڭ ەڭبەگى تەككە كەتپەپتى. ونىڭ دالەلى، جالپى ءبىلىم بەرەتىن پاندەر بويىنشا رەسپۋبليكالىق وليمپيادادا وقۋشىلارىمىز ەكى جىل قاتارىنان ءىىى ورىندى يەلەندى. جۇلدەگەرلەر سانى 33-كە جەتكەن. ال، جىل باسىنان بەرى ەكى باعىت بويىنشا 30 وقۋشى جۇلدەگەر اتانىپ، «ۇزدىك وليمپيادالىق مەكتەپ» جانە «ۇزدىك وليمپيادالىق كوماندا» اتانعان. «التىن بەلگى» يەگەرلەرى سوڭعى 4 جىلدا 238-دەن 608 وقۋشىعا ارتقان. مۇنىڭ بارلىعى ۇلاعاتتى ۇستازداردىڭ ەڭبەگى دەۋگە بولادى، - دەپ جازادى "وڭتۇستىك رابات" گازەتى.

ۇزدىكتەر ماراپاتتالدى

قازان ايىنىڭ العاشقى جەكسەنبىسى – ۇستازداردىڭ كاسىبي ءتول مەرەكەسى. ۇستازدار كۇنى – بارشا قاۋىم بولىپ ەرەكشە ىقىلاس، اسا قۇرمەتپەن ۇستازداردىڭ ەڭبەگىن باعالايتىن مەرەكە. بۇل ءداستۇر بيىل دا ءوز جالعاسىن تاپتى. مەرەكە بارىسىندا ۇستازدار جىلدار بويىنا اتقارعان جۇمىسىنىڭ جەمىسىن كوردى. ياعني، ءوز ءىسىنىڭ ۇزدىكتەرى ماراپاتتالدى جانە سىي-سىياپاتتارعا يە بولدى.

سارىاعاشتىق ر. يسلاموۆ (كەڭەسباەۆ اتىنداعى ورتا مەكتەپتىڭ مۇعالىمى) پەن №12 كوللەدجدىڭ ديرەكتورى س. جيەنباەۆ، «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامى فيليالىنىڭ وقو بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ ديرەكتورى ل.ىسقاقوۆا وبلىس اكىمىنىڭ «قۇرمەت» گراموتاسىمەن ماراپاتتالدى. ي.وسپانوۆا (ورداباسى اۋدانى ش.ءۋاليحانوۆ اتىنداعى جالپى ورتا مەكتەپتىڭ مۇعالىمى), گ.تاستانبەكوۆا (شىمكەنت قالاسى №65 ى. التىنسارين اتىنداعى ورتا مەكتەپتىڭ مۇعالىمى), ش. تورەحانوۆا (سارىاعاش اۋدانى №13 كوللەدجدىڭ وندىرىستىك وقىتۋ شەبەرى), ك. تۇرسىمبەكوۆالار (تۇلكىباس اۋدانى س. سەيفۋللين اتىنداعى جالپى ورتا مەكتەپتىڭ مۇعالىمى) وبلىس اكىمىنىڭ «العىس حاتىن» الدى.

ال، شىمكەنت قالاسى №65 «بالبۇلاق» بوبەكجاي-بالاباقشاسى «ۇزدىك بالاباقشا» گرانتىمەن ماراپاتتالدى. بالاباقشا وبلىستىق «مەكتەپكە دەيىنگى ۇزدىك ءبىلىم بەرۋ ۇجىمى» اتتى ۇيىمداستىرىلعان بايقاۋدا باس جۇلدەگە يە بولعان.

ارداگەر ۇستاز

بۇل كۇنى ارداگەر ۇستازداردىڭ دا ەڭبەگى ەلەنبەي قالعان جوق. ماراپاتتالعانداردىڭ ىشىندە 45 جىل ءبىلىم سالاسىندا ەڭبەك ەتكەن شاراپات قۇرمانبەكوۆا دا بار. قازىر زەينەت جاسىنداعى ارداگەر-ۇستازدىڭ ءبىلىم سالاسىن دامىتۋعا قوسقان ۇلەسى وراسان. ونىڭ دالەلى رەتىندە ەڭبەگىن باعالاعان تالاي ماقتاۋلار مەن ماراپاتتاۋلاردى ايتساق بولادى. «جاسىڭدا تارتقان بەينەت – قارتايعاندا زەينەتىڭ ەكەن» دەيدى ۇستاز. ايتۋىنشا، العاشقى ەڭبەك جولىن 1969 جىلى تۇركىستان قالاسىندا سول كەزدەگى كومسومول كوميتەتىنىڭ جولداماسىمەن لەنين اتىنداعى (قازىرگى ا.بايتۇرسىنوۆ) مەكتەبىندە باستاعان. ودان كەيىنگى ەڭبەگى وتىرار اۋدانىندا قاراپايىم مۇعالىمدىكتەن باستاپ، ديرەكتورلىققا دەيىن كوتەرىلەدى. 20 جىل مەكتەپ باسشىلىعى قىزمەتىن اتقارادى. قازىرگى كۇنى ۇستاز وتىرار اۋدانىنىڭ «قۇرمەتتى ازاماتى». كەيىن وتباسى جاعدايىمەن قالاعا اۋىسىپ، پەداگوگتاردىڭ ءبىلىمىن جەتىلدىرۋ ينستيتۋتىندا 15 جىل ەڭبەك ەتىپ، زەينەتكە شىعادى.

– ءوزىم پەداگوگتاردىڭ اۋلەتىندە دۇنيەگە كەلدىم. اتا -ەنەم دە وسى سالانىڭ ادامدارى بولدى. ارمان-ماقساتتارىمدى ۇرپاق تاربيەسىمەن بايلانىستىرۋىم زاڭدىلىق تا بولار. ەڭبەگىمنىڭ ەش كەتپەگەندىگىن شاكىرتتەرىمنىڭ جەتىستىگىنە قاراپ باعامدايمىن. ارقايسىسى ومىردە ءوز ورىندارىن تاۋىپ، ەلىمىزدىڭ تۇكپىر-تۇكپىرىندە ءتۇرلى سالالاردا قىزمەت ەتۋدە.

جالپى، ۇستازدىق ءاربىر ادامنىڭ بويىندا بولاتىن قاسيەت. تەك تۋما قاسيەتتى جەتىلدىرۋدە اركىم وزىنشە ىزدەنەدى، تالپىنادى. ءبىلىم ءنارىن بەرگەن وقۋشىسىنىڭ بيىكتەن كورىنۋىنە، وسۋىندە، ەلدىڭ الدىندا ۇياتقا قالماۋىندا بار كۇشىن، جىگەرىن سالادى، — دەپ ارداگەر ءوزىنىڭ ومىرلىك تاجىريبەسىمەن ءبولىستى.

ەلىمىزدىڭ « ەڭ ۇزدىك پەداگوگى» كەنتاۋدا تۇرادى

كۇنى كەشە استانا قالاسىندا ءبىلىم جانە عىلىم مينيسترلىگىنىڭ ۇيىمداستىرۋىمەن وتكەن ۇستازداردىڭ مەرەكەلىك شاراسىندا ءبىزدىڭ وبلىسىمىزدىڭ ۇستازى قۇرالاي امانتايقىزى رەسپۋبليكاداعى «ەڭ ۇزدىك پەداگوگ» اتانىپ، 1 ملن 852 مىڭ تەڭگە كولەمىندە قارجىلاي سىيلىق الدى. قۇرالاي امانتايقىزى كەنتاۋ قالاسىنداعى №3 قازاق-تۇرىك ەر بالالار مەكتەپ-ليتسەيىندە تاريح پانىنەن ساباق بەرەدى. ونىڭ 20 جىلدان بەرگى ء«وز ۋاقىتىن ايامايتىن، وزگەنىڭ باقىتىن ايالايتىن» ەڭبەگى تەككە كەتپەپتى. ۇزدىك ماماننىڭ شاكىرتتەرى قازىرگى تاڭدا وبلىستىق، رەسپۋبليكالىق، حالىقارالىق وليمپيادالار مەن عىلىمي جوبالاردىڭ جەڭىمپازدارى اتانىپ ءجۇر. وسى جىلدىڭ وزىندە 3 وقۋشىسى رەسپۋبليكالىق وليمپيادانىڭ، 2 وقۋشىسى عىلىمي جوبا سايىسىندا جوعارعى ناتيجەگە قول جەتكىزگەن.

– ءتورتىنشى رەت وتكەن مەرەكەلىك شاراعا بيىل رەسپۋبليكا بويىنشا 40-تان استام مۇعالىم قاتىستى. ەلىمىزدىڭ ءبىلىم جانە عىلىم ءمينيسترى ا. ءسəرىنجىپوۆتىڭ قولىنان ء«بىلىم بەرۋ ۇيىمىنىڭ ۇزدىك پەداگوگى» توسبەلگىسىن العانىما قۋانىشتىمىن. مەنىڭ جەڭىسىم — وقۋشىلارىمنىڭ ەڭبەگى، ولاردىڭ بىلىمگە دەگەن قۇشتارلىعى، ىزدەنىسىنىڭ ناتيجەسى دەپ بىلەمىن. ولاردىڭ اتا-انالارىنىڭ ماعان دەگەن قۇرمەتى، مەكتەپ جانە وبلىستاعى ءبىلىم باسشىلارىنىڭ سەنىمدىلىگىنە دە العىسىمدى ايتقىم كەلەدى. مەنىڭ تۇسىنگەنىم وقۋشىلارعا ءبىلىم بەرىپ قانا قويۋ جەتكىلىكسىز. ۇستاز ءوزىنىڭ ەڭبەگىنەن ناتيجە شىعۋىن تالاپ ەتۋ قاجەت، — دەيدى ۇزدىك پەداگوگ.

ءبىر ايتا كەتەرلىگى، وبلىسىمىزدا 2012 جىلعا دەيىن قازاقتان تاريحى مەن قۇقىقتانۋ پاندەرى بويىنشا وبلىسىمىزدىڭ وقۋشىلارى رەسپۋبليكالىق وليمپيادالاردا نە عىلىمي جوبالاردا ەشبىر كورسەتكىشكە قول جەتكىزبەگەن ەكەن. بۇل ەكى ءپان بويىنشا العاش جەڭىمپاز اتانعاندار ۇزدىك پەداگوگتىڭ شاكىرتتەرى ەكەندىگىن اتاپ وتەيىك.

ايگۇل كەرىمبايقىزى 

Abai.kz