ءادرىسسىز الىسقا ءازىل حات
«دوروگوي لەونيد يليچ!»
«ادامنىڭ ءتانى ولسە دە، جانى ولمەيدى» دەگەن ەسكى سوزدەن حابارىم بارىن ءوزىڭىز شارلاپ وتكەن بۇكىل دۇنيە جۇزىنە بىلدىرگىم كەلىپ، وسى حاتتى جازۋعا بەل بايلادىم. قالامىمنىڭ ۇشىندا – ءوزىڭىزسىز، تويىست، ءسىزدىڭ جانىڭىز. حاتىمنىڭ سوعان، تويىست، ءسىزدىڭ جانىڭىزعا جەتەتىنىنە ءشۇبام جوق.
وقىپ بىلۋىمشە، ادامنىڭ جانى مارقۇمىنىڭ تۋعان، وسكەن، قىزمەت ىستەگەن جەرلەرىنە ۋاق-ۋاق كەلىپ، ءبىراز بولىپ، وزگەرىستى شولىپ كەتىپ جۇرەدى ەكەن، سونداي ساپارلارىنىڭ بىرىندە ونىڭ كوزىنە مەنىڭ حاتىم دا ء تۇسۋى مۇمكىن عوي. قالاي بولسا دا، «تاۋەكەل ءتۇبى – جەل قايىق...» دەدىم.
سونىمەن ءسويتىپ، كسرو جۇرتىن قاسىڭىزبەن باۋراپ، جىميىپ بيلەپ جۇرگەن جىلدارىڭىزدا تۇتاس سوۆەت حالقى، ونىڭ ىشىندە ءوزىڭىزدىڭ قازاقستاندىقتار دا اتاعانداي، دوروگوي لەونيد يليچ، سىزگە ايتپاعىم مىناۋ:
ءسىز دۇنيەدەن ارمانسىز وتكەن سياقتىسىز. قاتارداعى كوممۋنيستەن كوكپ ورتالىق كوميتەتىنىڭ باس حاتشىسى دەڭگەيىنە جەتتىڭىز. قاتارداعى سولداتتان كەڭەس وداعىنىڭ مارشالى دارەجەسىنە جەتتىڭىز. العان التىن جۇلدىزدارىڭىز بەن وردەن-مەدالدەرىڭىزدىڭ سانى جەتپىستەن اسىپتى. ءبىرىنشى ءيليچتىڭ ماڭىندا ەكىنشى يليچ بولىپ جاتىرسىز.
ە-ە، قازاقستاندى: «نان بولسا، ءان دە بولادى!» دەپ پالەن جىل باسقارعانىڭىزدا ءوزىڭىز ەر-ايەلىنىڭ تالايىن تاپ اۋزىنان شولپ-شولپ سۇيگەن قازەكەڭدە: «ارمانسىز ادام بولمايدى» دەگەن ناقىل بارىن ەستىگەن شىعارسىز، ال ول ءسوزدىڭ بەكەر ايتىلماعانىنا دالەل جەتكىلىكتى. مىسالدى، دوروگوي لەونيد يليچ (برەجنەۆ جولداس), ءسىزدىڭ ومىرىڭىزدەن دە كەلتىرە الامىن.
مىسالدىڭ نارقى سالىستىرماسىنا قاراي. ەندەشە، ءسىزدى ءبىزدىڭ ەلدى جالعىز ءوزى جيىرما ءتورت جىل ءيىرىپ وتىرعان ىنىڭىزبەن قاتار قويا سويلەيىن. سالىستىرۋىم تىم سالاقتاپ كەتپەس ءۇشىن ءسىزدىڭ اۋلەتىڭىزدە بولماعان جايتتاردى عانا تىزىمگە الامىن. ياعني:
ءسىزدىڭ ەتىكشى بولعان اتاڭىز، باقتاشى بولعان اكەڭىز، ساۋىنشى بولعان شەشەڭىز جايىندا «بي بولدى; ەل باسقاردى; شەشەن، اقىلمان بولدى; كيەلى، كورىپكەل بولدى» دەپ حيكايا، رومان، باللادا، داستان جازىلدى ما؟ جوق!
ءسىزدىڭ شاكىرتتىك، بوزبالالىق، جىگىتتىك، فابريك-زاۋىت ۋچيليششەسىندە كۋرسانت، كومبيناتتا جۇمىسشى، كومسومولدا حاتشى، پارتيادا قىزمەتكەر، باسشى كەزدەرىڭىز جايىندا توم-توم كىتاپ، پەسا، سپەكتاكل جازىلدى ما، كوپ سەريالى كينوفيلم ءتۇسىرىلدى مە؟ جوق!
ءسىز «لەونيد يليچ برەجنەۆ» دەپ ءوزىڭىزدىڭ اتىڭىزدا وردەن جاساتا الدىڭىز با؟ جوق!
ءسىز «ەلباسى» اتاعىن الا الدىڭىز با؟ جوق!
ءسىز «ۇلت ليدەرى» اتاعىن الا الدىڭىز با؟ جوق!
ءسىزدىڭ ءتىرى كەزىڭىزدە نوكەرلەرىڭىز سىزگە بىرنەشە ەسكەرتكىش ورناتتى ما؟ جوق!
ءسىز كوزىڭىز تىرىدە: «كەمەڭگەر، دانا، ويشىل، كورەگەن، دانىشپان، الەم مويىنداعان ساياساتكەر، اقىن، كومپوزيتور...» دەگەن باعا الا الدىڭىز با؟ جوق! «ناعىز لەنينشىل» دەگەندى عانا ەستىدىڭىز.
ءسىز عىلىمي ەڭبەك جازىپ اۋرە بولماي-اق «عاسىر عۇلاماسى» دەگەن اتاق الدىڭىز با؟ جوق!
ءسىز ءوزىڭىزدىڭ جازعانىڭىزدان وزگەلەرگە جازدىرتىپ العانىڭىز كوپ ءجۇز شاقتى كىتاپ شىعاردىڭىز با؟ جوق! ءسىزدىڭ جازعان-جازدىرعانىڭىز نەبارى 3 كىتاپ، بىراق، قيسىنى كەلگەندە قيىن بولمايدى عوي، سول 3 كىتاپپەن-اق ادەبيەتتىڭ لەنيندىك سىيلىعىن الدىڭىز (ال ءسىزدىڭ ءجۇز شاقتى كىتاپ جازعان ىنىڭىزگە ءبىزدىڭ ادەبي مەملەكەتتىك سىيلىعىمىز بۇيىرماي-اق قويدى، ارينە، بۇل - ءسىز ءۇشىن دە، ءبىز ءۇشىن دە وكىنىش. الايدا ازىرشە 75 جاستاعى ءىنىڭىزدىڭ بار ءومىرى الدا، ءالى الماعان سىيلىق-اتاقتىڭ ءبارىن ەرتەڭ-اق الاتىنى داۋسىز).
ءسىزدىڭ پورترەتتەرىڭىز كرەملدىڭ قاقپاسىنداي ەتىپ جاسالىپ، كسرو-نىڭ قالا-سەلو-دەرەۆنيالارىندا ءىلۋلى تۇردى ما؟ جوق! ءتۇرلى-ءتۇستى بوياۋلى فوتوسۋرەتتەرىڭىز كىتاپ دۇكەندەرىنە سيماي تۇردى ما؟ جوق!
ءسىزدىڭ قىزىڭىز بەن كۇيەۋبالاڭىز بەسىكتەن بەلدەرى شىقپاي جاتىپ ميللياردەر بولدى ما؟ جوق.
ءسىز: «ناگرادا الۋ مەن بەرۋدە رەكورد جاسادىم!» دەپ، وزىڭىزگە ءوزىڭىز سىرتتاي دا، ىشتەي دە رازى بولىپ كەتكەن شىعارسىز، جو-جوق، ءىنىڭىز ول جاعىنان دا ءسىزدىڭ ەنەڭىزدى ۇرىپ جىبەرۋگە جاقىن!
ءسىز نوبەل سىيلىعىن الۋدى كوكسەدىڭىز بە، «الۋىم كەرەك! قايتسەم دە الامىن!» دەپ جانتالاستىڭىز با؟ جوق!
ءجا، دوروگوي لەونيد يليچ، وسى جەردە توقتايىن. شىنىمدى ايتسام، - مەن سالىستىرۋدان جالىعىپ كەتتىم. ءسىزدىڭ جانىڭىز دا تىڭداۋدان شارشاعان بولار. مىناۋ جارىق دۇنيەدەن ارمانسىز جان بولىپ وتە الماعانىڭىزعا يلاندىڭىز دەپ بىلەم.
سولاي، دوروگوي يليچ!
حات يەسى سوناۋ جىلدارى سىزبەن پارتيالاس بولعان ميلليونداردىڭ ءبىرى - قازاقستانىڭىزدىڭ جازۋشىسى عابباس قابىشۇلى.
Abai.kz
