«جەر كودەكسىنە» اۋىلشارۋاشىلىعى القاپتارىن ساتۋ جونىندە ارنايى وزگەرىس ەنگىزىلدى دەپ حابارلايدى «قازاقستان» ارناسىنىڭ جاڭالىقتار قىزمەتى. جەر كودەكسىنە جاسالعان تۇزەتۋلەر شارۋالار اراسىندا تالقىلانىپ جاتقانىن ەسكە سالعان ۇلتتىق ارنا ءتىلشىسى ەكونوميكا ءمينيسترى ەربولات دوساەۆتىڭ سوزىنە سۇيەنە وتىرىپ،  بۇدان بىلاي قازاق جەرى اۋكتسيون ارقىلى  ساتىلاتىنىن حابارلادى.

جەر تەلىمدەرى الدىمەن اعىلشىن ءتاسىلى ارقىلى اۋكتسيونعا تۇسەدى. وتپەگەن جاعدايدا، باستاپقى قۇنىنان  50 پايىزعا دەيىن تومەندەپ، گوللاندىق ءادىس بويىنشا يەسىن تابادى. ال، جالعا بەرىلىپ كەلگەن جەرلەر وسى ۋاقىتقا دەيىن پايدالانعان يەلەرىنە جەڭىلدىكپەن ساتىلادى.

«قازىر، ەلىمىزدە 100 ميلليونداي گەكتار جەر ۇزاق مەرزىمدى جالعا الىنعان. ال، جەكە مەنشىكتە بار – جوعى 1,2 پايىز»، -  دەيدى ەكونوميكا ءمينيسترى  ەربولات دوساەۆ.

قىسقاسى، كارى تاريحتا «ۇلى دالا» اتالعان، ءباھادۇر بابالارىمىز قىتايمەن، ورىسپەن، جوڭعار-قالاماقپەن، سارت-ساۋانمەن قيدالاسىپ ءجۇرىپ الىپ قالعان بايتاق جەرىمىز ەندى بۇگىنگى كوپۇلتتى قازاقستاندىقتاردىڭ جەكە مەنشىگىنە اينالۋدىڭ الدىندا تۇر. جالعا العاننان گورى مەنشىكتەگى جەردىڭ قادىرى ارتىق ەكەندىگىن ءدان ەگىپ، بيداي ورىپ جۇرگەن اعايىن جاقسى بىلەدى. مىسالى، «قازاقستان» ارناسىنىڭ تىلشىسىنە جايقالعان ەگىنجاي القابىندا، ماساعى مايىسقان قالىڭ بيدايدىڭ ورتاسىندا تۇرىپ سۇحبات بەرگەن  اناتولي ۋسولكين دەيتىن كىسى: «جالعا العان جەرگە يەسى دۇرىس قارامايدى. پايدالانادى، سودان سوڭ تاستاپ كەتە بەرەدى. ال، جەر جەكەمەنشىك بولسا، ونى كۇتىپ-باپتايدى، توزدىرمايدى»، - دەگەندى ايتادى.

اناتولي ۋسولكين كەشەگى قارا شەكپەندىلەردىڭ ۇرپاعى بولسا كەرەك. بالكىم، لەۆ تولستويدىڭ «ادامعا قانشا جەر كەرەك؟» اتتى شىعارماسىندا بەيمالىم دالاعا كەتىپ قالعان باس كەيىپكەردىڭ كىنىدىگىنەن تاراعان اۋلەتتەن شىعار. ونى تەرگەپ، تەكسەرمەيمىز: ويتكەنى بىزدە «ورتاق تاريح پەن تاعدىر قوسقان» جۇرتتىڭ قاراسى قالىڭ. ەلىمىزدە ماسەلەنكي، وروشتار مەن يۋكاگيرلەر، ساامدار مەن سەلكۋپتەر، ۋدەگەيلەر مەن ۆەپتەر دە (ت.ب.) 150 ۇلتتىڭ ءبىرى اتانىپ، ءومىر ءسۇرىپ جاتىر (مىنا سىلتەمەگە قاراڭىز: (http://old.abai.kz/content/kazakstan-khalky-oroshtar-saamdar-selkupter-udegeiler-yukagirler ). قازاقستان رەسپۋبليكاسىنىڭ ازاماتتارى رەتىندە ولار دا شاماسى جەتسە، جەردى ساتىپ الىپ، يگىلىگىن كورۋگە قاقىلى.  مۇنىڭ سىرتىندا سىڭارىن قازاقستاندىق قىز-كەلىنشەكتەردىڭ اراسىنان تاۋىپ، قازاقستاننىڭ ازاماتتىعىنا قول جەتكىزگەن حانزۋلار مەن ەاەو-نىڭ اياسىندا اياقتى الشاڭ تاستاپ جۇرگەن سولتۇستىكتەگى كورشىلەرىمىز دە ەكونوميكا ءمينيسترى جاريا ەتكەن 100 ميلليون گا جەردى اۋكتسيوندا ويناتۋى ابدەن مۇمكىن. دەگەندەي-اق، قحر-عا رەسمي بارعان ساپارىنان ورالعان بەتتە ەلباسىمىزدىڭ ءوزى 15 ملن گا جەردىڭ بوس جاتقانىن ەسكەرتكەن ەدى. سونىڭ ىزىنشە، مىنە، 100 ملن.گا جەردى ناقتى يەسىن تاۋىپ جەكەشەلەندىرۋدىڭ قاجەتتىلىگى كۇن تارتىبىنە شىعىپ،  «جەر كودەكسىنە» اۋىلشارۋاشىلىعى القاپتارىن ساتۋ جونىندە ارنايى وزگەرىس ەنگىزىلىپ تە ۇلگەردى.

قازىرگىندەي قىسىلتاياڭ، قيىن شاقتا قولىندا قارجىسى بار ادام جەر ساۋداسىنان كوپ ۇتارى ءسوزسىز. ال، جەردى جەكەمەنشىككە ساتۋدان تۇسكەن پايدا الەمدىك داعدارىس پەن رەسەيگە سالىنعان سانكتسيالاردىڭ سالقىنىن سەزىپ وتىرعان قازاقستاننىڭ بيۋدجەتىنە كىرىس كىرگىزۋى مۇمكىن. بيلىكتىڭ جاپپاي جەكەشەلەندىرۋدى تەزدەتۋگە پارمەن ەتۋىندە، مىنە، وسىنداي استار بولسا كەرەك.

Abai.kz