اقتوبەلىك اتا-انالار ءبىر-بىرىنە «ۆاتساپ» جەلىسى ارقىلى ەسكەرتۋ جىبەرىپ، شۋلاپ جاتىر، - دەپ حابارلايدى NUR.KZء تىلشىسى.

ايتۋلارىنشا، قالا مەكتەپتەرىنىڭ الدىندىنان قارا ماشيناداعى “ساقالدى جىگىتتەر” بالالاردى كۇتىپ الىپ، ەرتەڭ قۇرباندىققا شالادى-مىس.

الەۋمەتتىك جەلى ارقىلى شۋلاپ، ءبىر-ءبىرىن اقپاراتتاندىرۋعا تىرىسقان اتا-انالار جاعدايدىڭ راستىعىنا كوزدەرى جەتپەسە دە، قولدارىندا بار اقپاراتتى تانىستارىنا تاراتىپ جاتىر. وندا اقتوبە مەكتەپتەرىنىڭ الدىندا جۇرگەن “ساقالدى جىگىتتەر” بالالاردى كولىكتەرىنە سۇيرەپ جاتىر دەلىنگەن.

حاباردىڭ سەنىمدى شىققانى سونداي، ءبىر اتا-انا بولعان جايدى كلاسس جەتەكشىدەن ەستىدىم دەپ سويلەيدى.

«فايزوللانىڭ قىزىنىڭ شەشەسى شوشىپ وتىر. قىزىم ۇيگە شوشىپ كەلدى. ارتىندا قاسقىردىڭ سۋرەتى بار قارا ماشينا مەنى مىنگىزىپ الىپ كەتە جازدادى»، – دەيدى اتا-انالاردىڭ ءبىرى.

«جاڭا دايىندىق كۋرسىنىڭ اپايى حابارلادى. بۇل مەكتەپتە بولعان وقيعا دەپ. قالامقاس اپايدىڭ قىزىن ساقالدى كىسىلەر قۋىپ ۇستاپ الىپ بارا جاتقان جەرىنەن بىرەۋلەر كومەكتەسىپ، الىپ قالعان ەكەن مىس»، – دەيدى تاعى ءبىر اتا-انا.

وسىنداي جازبالار العان اقتوبەلىكتەر ۇرەي ۇستىندە. «ۆاتساپ» ارقىلى ەركىن تاراپ جاتقان اقپاراتتار ەلدى شۋلاتىپ جاتىر. ونىڭ ۇستىنە اقتاۋ، اتىراۋ، استانا، اقتوبە قالالارىنىڭ تۇرعىندارىنا ارنالىپ جازىلعان جازبا جاعدايدى ۋشىقتىرىپ تۇر.

بىراق، بۇل مالىمەتتەردى اقتوبە وبلىستىق ءىىد ماماندارى جوققا شىعارادى.

«مەكتەپتەر جانىنان بالالاردى الىپ كەتىپ جاتىر» دەگەن جالعان اقپارات. ونداي جاعداي تىركەلگەن جوق. «مۇنداي اقپارات تاراتقاندار جاۋاپقا تارتىلادى» دەپ بىزگە مينيسترلىكتەن حابارلادى. قالا تىنىش، -دەپ حابارلايدى اقتوبە وبلىستىق ءىىد ءباسپاسوز قىزمەتى.

جىلدا قۇربان ايت قارساڭىندا قۇرباندىققا ادام شالىنادى ەكەن دەپ شۋلايتىن اقتوبەلىكتەرگە الاڭداۋعا نەگىز جوق.

Abai.kz