دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى ءبىرجان نۇرىمبەتوۆ سەيسەنبى كۇنى استانادا وتكەن بوسقىنداردى قورعاۋ جانە حالىقارالىق ميگراتسيا بويىنشا الماتى پروتسەسىنىڭ لاۋازىمدى وكىلدەرىنىڭ ەكىنشى كەزدەسۋىندە قازاقستانعا كەلەتىن ەڭبەك ميگرانتتارى سانى بويىنشا قىتاي، تۇركيا، وزبەكستان، سەربيا جانە ءۇندىستان الدا تۇرعانىن حابارلادى.

نۇرىمبەتوۆتىڭ ايتۋىنشا، 2010 جىلدان بەرى قازاقستانداعى ەڭبەك ميگرانتتارى سانى بويىنشا قىتاي تۇركيانى باسىپ وزىپ، ءبىرىنشى ورىنعا شىققان. شەنەۋنىك مۇنى قازاقستانداعى ينۆەستيتسيالىق جوبالارمەن، سونىڭ ىشىندە باتىس ەۋروپا - باتىس قىتاي حالىقارالىق جولى قۇرىلىسىمەن بايلانىستىرادى.  

الماتى پروتسەسى 2011 جىلى حالىقارالىق ميگراتسيا جانە بوسقىندار ماسەلەسىن بىرىگىپ شەشەتىن ديالوگ الاڭى رەتىندە قۇرىلعان. بۇل ۇيىمعا قازاقستاننان بولەك ازەربايجان، اۋعانستان، قىرعىزستان، تاجىكستان، تۇركيا مەن تۇركىمەنستان كىرەدى. يران مەن پاكىستان ازىرگە باقىلاۋشى رەتىندە قاتىسىپ كەلەدى.

اباي-اقپارات