2015 جىلدىڭ 9-قازانىندا تاراز قالاسىنداعى «تاراز-ارەنا» سپورت كەشەنىندە قازاق حاندىعىنىڭ 550 جىلدىعىنا ارنالعان «ەۋرازيا بارىسى» ءتۋرنيرى وتەدى.  باسەكە تاڭەرتەڭگى ساعات 11:00-دە باستالادى.  بۇل تۋرالى «قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى حابارلايدى. 
ءىىى قازاق كۇرەسىنەن حالىقارالىق «ەۋرازيا بارىسى» ءتۋرنيرى  «قازاقستان بارىسى» قازاق كۇرەسىن دامىتۋ قورى، قازاقستان رەسپۋبليكاسى قازاق كۇرەسى فەدەراتسياسى، سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى، جامبىل وبلىسى اكىمدىگى مەن قر مادەنيەت جانە سپورت مينيسترلىگىنىڭ قولداۋىمەن  وتەدى.
بوزكىلەمدە گرۋزيا، قازاقستان، قىرعىزستان، موڭعوليا، پولشا، رەسەي، تۇركيا جانە وزبەكستان ەلدەرىنىڭ كوماندالارى كەزدەسەدى دەپ كۇتىلۋدە. ءاربىر قۇرامادا جەتى بالۋان كۇرەسەدى. بيىلعى ەرەكشەلىك، سالماق دارەجەسىندە بىرقاتار وزگەرىستەر بار. «ەۋرازيا بارىسىندا» بالۋاندار كوماندالىق سىندا 55 كگ، 66 كگ، 74 كگ، 82 كگ، -90 كگ، -100 كگ جانە +100 كەلى سالماق دارەجەسىندە كۇرەسەدى. تۋرنيردە قازىلىق جاسايتىن حالىقارالىق تورەشىلەر قۇرامىندا قاتىساتىن مەملەكەتتىڭ وكىلدەرى كىرەدى.  
قازاق كۇرەسىنەن حالىقارالىق «ەۋرازيا بارىسى» ءتۋرنيرى ەڭ العاش رەت 2013 جىلدىڭ جەلتوقسان ايىندا وتكەن بولاتىن. وعان ەۋرازيا قۇرلىعىنىڭ 8 مەملەكەتىنەن بالۋاندار قاتىستى. بۇل جارىس «قازاقستان بارىسى» قازاق كۇرەسىن دامىتۋ قورىنىڭ «قازاقستان بارىسى» مەن «جاس بارىس» جوباسىنان كەيىن قولعا العان ءۇشىنشى جوباسى. 2013 جىلعى تۋرنير جەڭىمپازدارى وتانداستارىمىز – قازاقستان قۇراماسى. ولار فينالدا موڭعوليا قۇراماسىنان 4:1 ەسەبىمەن باسىم ءتۇستى. 
ەكىنشى رەت ۇيىمداستىرىلعان تۋرنير 2014 جىلدىڭ قاراشا ايىندا بالۋان شولاقتىڭ 150 جىلدىق مەرەيتويىنا ارنالدى. وعان ازەربايجان، قىتاي، گرۋزيا، قازاقستان، قىرعىزستان، موڭعوليا، پولشا، رەسەي، تاجىكستان، تۇركيا، وزبەكستان جانە ۋكراينا ەلدەرىنىڭ كوماندالارى قاتىستى. فينالدا ەكىنشى رەت موڭعوليا قۇراماسى قازاقستان قۇرامالارى كەزدەسىپ، موڭعول بالۋاندارى جەڭىمپاز اتاندى. 
«ەۋرازيا بارىسى» حالىقارالىق ءتۋرنيرىن تىكەلەي ەفيردە 7 ساعات بويى الەمنىڭ 126 مەملەكەتى تاماشالادى. بيىلعى حالىقارالىق كورسەتىلىمدى دە تۇركيالىق «ترت اۆاز» بەن رەسەيلىك «بوەتس» ارنالارى تىكەلەي ەفيردە ۇسىناتىن بولادى.  ال ەلىمىزدە «قازاقستان»،  «KazSport» جانە «كتك» ارنالارى كورسەتەدى. 
شارانىڭ باس دەمەۋشىسى- «سامۇرىق-قازىنا» ۇلتتىق ءال-اۋقات قورى» اق، تيتۋلدى دەمەۋشى- «قازمۇنايگاز» ۇلتتىق كومپانياسى» اكتسيونەرلىك قوعامى.