اقتاۋدا جاتتىعۋ كەزىندە قازا تاپقانداردىڭ اتى-جوندەرى بەلگىلى بولدى، - دەپ حابارلايدى kaz.tengrinews.kz سايتى.

كتك تەلەارناسىنىڭ مالىمەتىنشە، ولار 19 جاستاعى باۋىرجان جولداباي، ول وڭتۇستىك قازاقستان وبلىسىنىڭ سوزاق اۋدانىنان شاقىرتىلعان، 19 جاستاعى اسىلجان ماحامبەتوۆ، ول اتىراۋ وبلىسىنىڭ قۇلسارى اۋدانىنان شاقىرتىلعان. سونىمەن قاتار، مايىتحاناعا 23 جاستاعى زامير ءادىلوۆتىڭ دەنەسى جەتكىزىلدى، ول الماتى وبلىسىنىڭ ەڭبەكشىقازاق اۋدانىنان بارعان جانە 19 جاستاعى باقىتجان قالىباي، ول اتىراۋ وبلىسىنىڭ ماقات اۋلىنان بارعان.  

تەلەارنانىڭ مالىمەتىنشە، جاتتىعۋ كەزىندە تاعى ەكى اسكەري قىزمەتشى جاراقات العان - ولار دارىگەرلەردىڭ كومەگىنە جۇگىندى.

ۆەدومستۆو وكىلدەرىنىڭ مالىمەتىنشە، كەشە، 18 قىركۇيەك كۇنى اقتاۋدا ءوتىپ جاتقان "ورتالىق-2015" وقۋ-جاتتىعۋىنىڭ "ورتا ازيالىق ستراتەگيالىق باعىتتا جاۋىنگەرلەر توبىنىڭ وپەراتسيا جۇرگىزۋى" ەكىنشى كەزەڭىندە ("ويماشا" پوليگونىنان 5 شاقىرىم قاشىقتىقتا) "تەڭىز دەسانتىن ءتۇسىرۋ جانە پلاتسدارمعا توسقاۋىل قويۋ" ەپيزودىن ورىنداۋ بارىسىندا التى بتر-80 تەحنيكاسى مەن 52 اسكەري قىزمەتشى تەڭىزگە شىققان.

"تەڭىزدەن شامامەن 150 مەتر وتكەننەن كەيىن قاتتى جەل مەن جوعارى تولقىن سالدارىنان ءتورت بتر-80 سۋعا باتىپ كەتتى. ەكى تەحنيكا ءوز كۇشىمەن جاعالاۋعا شىقتى. الدىن-الا مالىمەت بويىنشا مەرزىمدى قىزمەتتىڭ 4 اسكەري قىزمەتشىسى سۋعا باتىپ كەتكەن", - دەپ حابارلادى ءباسپاسوز قىزمەتىندەگىلەر. سونىمەن قاتار، قر قورعانىس ءمينيسترى يمانعالي تاسماعامبەتوۆتىڭ قر قورعانىس مينيسترلىگى باس ينسپەكتسياسىنا جاعدايدىڭ سەبەبىن تولىق انىقتاۋ ءۇشىن جەدەل ارنايى توپ قۇرىپ، وقيعا ورنىنا بارۋدى تاپسىردى. قازىرگى احۋال قر قورعانىس ءمينيسترىنىڭ تىكەلەي باقىلاۋىنا الىندى

اباي-اقپارات