اقتوبە وبلىسىنىڭ اكىمى بەردىبەك ساپارباەۆ گەرمانيا فەدەراتيۆتىك رەسپۋبليكاسى ەلشىسىنىڭ تۇراقتى ورىنباسارى دجونني كرامەرمەن كەزدەستى دەپ حابارلايدى «اقتوبە اقپارات» ورتالىعى.

 كەزدەسۋ بارىسىندا تاراپتار اقتوبە وبلىسى مەن گەرمانيا اراسىنداعى ەكونوميكالىق ىنتىماقتاستىقتىڭ اعىمداعى كورسەتكىشتەرىن، سونىمەن قاتار ەكى جاقتى ساۋدا – ەكونوميكالىق قاتىناستاردى ودان ءارى دامىتۋ جولدارىن تالقىلادى.

2015 جىلدىڭ قورىتىندىسى بويىنشا اقتوبە وبلىسى مەن گەرمانيا اراسىنداعى ساۋدا اينالىمى 178 ملن. دوللاردى قۇرادى. قازىرگى ۋاقىتتا وبلىس اۋماعىندا نەگىزىنەن ساۋدا، كولىك-ەكسپەديتسيالىق قىزمەتتەر مەن تەحنيكالىق كەڭەستەر بەرۋ سالاسىندا نەمىس فيرمالارىنىڭ قاتىسۋىمەن 25 كاسىپورىن جۇمىس ىستەيدى. 

بەردىبەك ساپارباەۆ گەرمانيامەن مادەني-ىسكەر بايلانىستى دامىتۋ ءۇشىن، اسىرەسە ونەركاسىپ، اۋىل شارۋاشىلىعى، مەديتسينا، كولىك جانە لوگيستيكا سالالارىندا ۇلكەن رەزەرۆ بارىنا سەنىم ءبىلدىردى.

دجونني كرامەردىڭ نازارىنا گفر بيزنەسمەندەرىنىڭ قىزىعۋشىلىعىن تۋدىرۋى مۇمكىن ينۆەستيتسيالىق جوبالار ۇسىنىلدى.

مەيمانداردىڭ نازارىنا ۇسىنىلعان جوبالاردىڭ ءبىرى اقتوبە قالاسىندا حالىقارالىق اۋەجاي اۋدانىندا جالپى قۇنى 12 ميلليارد تەڭگە بولاتىن كولىك-لوگيستيكالىق ورتالىق قۇرىلىسى بولدى.

وبلىس باسشىسى كولىك-لوگيستيكالىق ورتالىقتىڭ بولاشاقتا ءتيىمدى بولاتىنىن جەتكىزدى، ويتكەنى ونىڭ اقتوبەدە ورنالاسۋى ۇلكەن كولەمدەگى ەۋروازيالىق تاۋار اعىمىن ۇقساتۋعا يدەالدى جاعدايلار جاسايدى.

اقتوبە وبلىسى گەرمانيادان قارا مەتالل، ونەركاسىپ، تۇرمىستىق جابدىقتار مەن اۆتوموبيلدەر ءۇشىن قوسالقى بولشەكتەر يمپورتتايتىن بولعاندىقتان، گفر ەلشىسىنىڭ تۇراقتى ورىنباسارىنا ءبىزدىڭ وڭىردە اتالعان تاۋارلار ءوندىرىسى نەمەسە قۇراستىرۋ بويىنشا جوبالار ۇسىنىلدى.

بەردىبەك ساپارباەۆ اقتوبە وبلىسىنىڭ كوپ جاعدايدا گەوگرافيالىق تۇرعىدا ءتيىمدى ورنالاسقانىن جەتكىزدى، بۇل ءوز كەزەگىندە رەسەي، قىتاي، باتىس ەۋروپا مەن ورتا ازيا ەلدەرى نارىعىنا جول اشادى.

- سونىمەن بىرگە ءبىز مينەرال-شيكىزات قورىنا بايمىز. وڭىردە پايدالى قازبالار وندىرەتىن 340 كەن ورنى بار. ينۆەستورلاردى تارتاتىنى دا سوندىقتان. ءبىز حيميا قۇرىلىسى جانە مەديتسينا  سالاسىنداعى نەمىس كاسىپورىندارىمەن بايلانىس ورناتقىمىز كەلەدى. ەلىمىزدىڭ بارلىق ءوڭىرى سەكىلدى اقتوبە وبلىسى اۋماعىندا دا ينۆەستورلاردى قولداۋ ينسترۋمەنتتەرى بار. ءبىزدىڭ ايماقتا جۇمىس ىستەۋدى جوسپارلاپ وتىرعان گەرمانيا بيزنەسمەندەرىنە قولداۋ كورسەتۋگە دايارمىز، - دەدى بەردىبەك ساپارباەۆ.

ءوز كەزەگىندە دجونني كرامەر اقتوبە وبلىسىنا رەسمي ساپارى بارىسىندا ءوڭىردىڭ ەكونوميكالىق الەۋەتىمەن تانىسقانىن جەتكىزدى.

- اقتوبەدەگى نەمىس فيرمالارىنىڭ وكىلدەرىمەن كەزدەسكەنىمدە ولار مۇندا جاقسى تابىس ءتۇسىرىپ وتىرعاندارىن جەتكىزدى. بۇل دا ايماقتاعى ينۆەستيتسيالىق كليماتتىڭ جاقسى ەكەندىگىن بىلدىرەدى. ءسىزدىڭ وبلىستا تۇراتىن نەمىس دياسپوراسىنىڭ وكىلدەرى ءۇشىن انا ءتىلى مەن مادەنيەتىن ۇيرەنۋگە بارلىق جاعداي جاسالعان. وسى باعىتتا كورسەتىپ جاتقان قولداۋىڭىزعا العىسىمدى بىلدىرەمىن. ءبىز ودان ءارى ىسكەرلىك بايلانىس ورناتۋعا مۇددەلىلىلىك تانىتامىز، - دەدى دجونني كرامەر.

اباي-اقپارات