ونىڭ جازاسى ءۇي قاماۋىنا اۋىستىرىلدى. بۇعان دەيىن ينتەرنەتتە ونىڭ "وكىنۋى" جاريالانعان ەدى.

ەرمەك نارىمباەۆتىڭ تەرگەۋ اباقتىسىنان ۇيىنە كەلگەنى تۋرالى ونىڭ ايەلى زويا ءابىلدينا حابارلادى. مۇنى كۇزەت باستىعى دا راستادى. ءۇي قاماۋىنداعى ەرمەك نارىمباەۆقا ينتەرنەتتى پايدالانۋىنا، جۋرناليستەرمەن تىلدەسۋىنە تىيىم سالىنعان.

ازاماتتىق بەلسەندى ەرمەك نارىمباەۆ 22 قاڭتاردا ارازدىق تۋدىردى دەگەن ايىپپەن 3 جىلعا سوتتالعان. ونىڭ ادۆوكاتى جانار بالعاباەۆا 10 اقپاندا الماتى قالاسى المالى اۋداندىق سوتىنا اپەللياتسيالىق سوتقا دەيىن ونى قاماۋدا ۇستاۋ ءتارتىبىن وزگەرتۋ تۋرالى ءوتىنىش بەرگەن ەدى.

11 اقپاندا Facebook الەۋمەتتىك جەلىسىندە ەرمەك نارىمباەۆتىڭ "وكىنگەن" حاتى پايدا بولعان سوڭ، جاقتاستارى ونىڭ بوساتىلۋىن كۇتكەن. نارىمباەۆپەن بىرگە ايىپتالىپ، ەكى جىلعا سوتتالعان بەلسەندى سەرىكجان مامبەتالين 30 قاڭتاردا كىناسىن مويىنداپ، وكىنىش بىلدىرگەن سوڭ، ەشقايدا كەتپەۋ تۋرالى قولحاتپەن بوساتىلعان ەدى.

مامبەتالين مەن نارىمباەۆ "ۆەتەر س ۋليتسى" دەيتىن كىتاپتان "قازاق حالقىنىڭ ابىرويىن تاپتاعان" ۇزىندىلەر كەلتىرىپ، ينتەرنەتتە بولىسكەندەرى ءۇشىن جازالاندى. سوت كەزىندە ولار بۇل ايىپتاۋدى مويىندامادى. كىتاپ اۆتورى مۇرات تەلىبەكوۆ، بۇرىن جارىق كورگەن كىتابىندا ونداي سوزدەردىڭ جوقتىعىن مالىمدەدى.

بۇعان دەيىن ەرمەك نارىمباەۆ اپەللياتسيالىق سوتقا قاتىستى ءوز ۇستانىمىن جاريا ەتكەن بولاتىن. ول تاعىلعان ايىپتى مويىندامايدى، قازاق حالقىن قورلاۋ تۋرالى ويدى جوققا شىعارادى، تەك سەرىكجان مامبەتاليننىڭ Facebook بەتىندەگى ءماتىندى كوشىرىپ باسقانىن مويىندايدى.

اباي-اقپارات