قىرعىزستان كەدەن قىزمەتى توراعاسىنىڭ ورىنباسارى رايىمبەك ماترايموۆتىڭ ۇلى سينگاپۋرداعى ەڭ ارزان بولمەسى تاۋلىگىنە 600 دوللار تۇراتىن قوناقۇيدىڭ باسسەينىندە، قۇنى 43 مىڭ دوللار تۇراتىن Hublot شۆەيتسار ساعاتىمەن سۋرەتكە تۇسەدى. باسقا سۋرەتتەردە وقۋشى بالانىڭ ۇلىبريتانيا مەن دۋبايداعى قىمبات فۋتبول مەكتەپتەرىندە جاتتىعىپ جاتقان ساتتەرى كورسەتىلگەن.

قىرعىز شەنەۋنىكتەرىنىڭ بالالارى بايلىقتارىن كورسەتۋدەن قىمسىنبايدى. "رايىم-ميلليون" دەگەن لاقاپ اتقا يە رايىمبەك ماترايموۆتىڭ ءوزى سۇحبات بەرمەيدى جانە جۋرناليستەرمەن تىلدەسۋدەن قاشادى.

باسقا دا كەدەندىك شەنەۋنىكتەردىڭ بالالارى- ينستاگرام جۇلدىزدارى. "سەۆەرنايا" تەمىرجول كەدەنى باستىعىنىڭ ورىنباسارى قادىر كەنەشوۆتىڭ قىزىنىڭ 16 مىڭ وقىرمانى تىركەلگەن. ونىڭ سۋرەتتەرىندە دولچە جانە گاببانانىڭ كيىمدەرىن، تىيىم سالىنعان ارنايى بەلگىلەرى بار مەرسەدەس، بمۆ كولىكتەرىن كورۋگە بولادى.

الەۋمەتتىك جەلىلەرگە قىرعىزستاننىڭ ميليتسيا شەنەۋنىكتەرىنىڭ بالالارى دا قۇمار. ىشكى ىستەر ءمينيسترىنىڭ ورىنباسارى كۋرسان اسانوۆتىڭ ماسساچۋسەتس ۋنيۆەرسيتەتىندە وقيتىن قىزى مەن ۇلى بوستوندا ءومىر ءسۇرۋ ءۇشىن جىلىنا 50 مىڭ دوللارعا جۋىق اقشا جۇمساۋعا ءماجبۇر ەكەندەرىن ايتادى.ونىڭ ىشىندە 30 مىڭى وقۋعا كەتەدى جانە اسانوۆتىڭ گەنەرالدىق جالاقىسى بۇعان جەتپەيتىنى تۇسىنىكتى.

قىرعىز قۇقىق قورعاۋشىلارى قىرعىزستاننىڭ ءىىم جانە پروكۋراترۋاسىنىڭ كادرلىق قىزمەت ءبولىمى تاۋەلسىز بولعان جاعدايدا، مۇنداي سۋرەتتەردەن سوڭ تەرگەۋ ىستەرىن باستاپ، قىرعىزدىڭ "التىن" جاستارى قانداي اقشانى شاشىپ جۇرگەنىن انىقتار ەدى دەگەن ويدا. الايدا كۇنى بۇگىنگە دەيىنگى، شەنەۋنىكتەردىڭ رەسمي جاريا تابىسى مەن ولاردىڭ شىن مانىندەگى بايلىعىنىڭ اراسى جەر مەن كوكتەي.