ۇلتتىق پالاتا باسقارما توراعاسى شاعىن بيزنەستى قولداۋدىڭ جاڭا باعدارلاماسىن ءتۇسىندىردى

«اتامەكەن» قر ۇلتتىق كاسىپكەرلەر پالاتاسى شاعىن كاسىپكەرلىكتى شاعىن نەسيەلەۋ باعدارلاماسىن ىسكە قوسپاق. قايتارىلمالى نەگىزدە 1 ملرد. 200 ملن. تەڭگە كولەمىندەگى باعدارلامانى قارجىلاندىرۋ «المەكس» كومپانيالار توبىنىڭ جەكە كاپيتالىن تارتۋ ارقىلى ىسكە اسادى. بۇگىن پالاتا باسقارماسى توراعاسى ابىلاي مىرزاحمەتوۆ پەن «المەكس» باسقارما توراعاسى ءماجيت ەسەنباەۆ ءوزارا ىنتىماقتاستىق تۋرالى مەموراندۋمعا قول قويىپ، شاعىن نەسيەلەۋ شارتتارىن ايتىپ بەردى.

«بىلتىردان باستاپ كاسىپكەرلەردى قولداۋ ورتالىقتارى ارقىلى ءبىز تەگىن بيزنەستى سەرۆيستىك قولداۋدى ىسكە اسىرىپ كەلەمىز. ەندى وعان قوسا شاعىن نەسيەلەر تۇرىندە قارجىلىق دەمەۋ كورسەتەتىن بولامىز. «المەكس» كومپانيالار توبى ءبىزدىڭ يدەيامىزعا ءبىرىنشى بولىپ قولداۋ كورسەتتى. ولارعا بۇل ءۇشىن ۇلكەن ريزاشىلىعىمىزدى بىلدىرەمىز»، – دەدى مىرزاحمەتوۆ مەموراندۋمعا قول قويعاننان سوڭ وتكەن ءباسپاسوز كونفەرەنتسياسىندا.

باعدارلاما اياسىندا 4 پيلوتتىق وبلىسقا 300 ملن.تەڭگەدەن بولىنەتىن بولادى، وعان قوسا اكىمدىكتەر وسى سوما مولشەرىندە قوسىمشا قارجىلاندىرماق. شاعىن نەسيەلەر 6-7% پايىزبەن 3 جىلعا بەرىلەدى. «جوباعا ۇلكەن قىزىعۋشىلىق تانىتقان اقتوبە، قىزىلوردا، ماڭعىستاۋ جانە الماتى وبلىستارىندا قازىر دايىندىق جۇمىستارى وتۋدە. جاقىندا عانا جامبىل وبلىسى باسشىلىعىنان دا ۇسىنىس كەلىپ ءتۇستى»، – دەپ حابارلادى مىرزاحمەتوۆ.

پالاتا باسقارماسى توراعاسىنىڭ ايتۋىنشا، ءىس جۇزىندە نەسيە ادامگەرشىلىك كەپىلىنە سۇيەنىپ بەرىلەدى. «ادام «سۋدىڭ دا سۇراۋى بار» ەكەنىن ءتۇسىنۋى كەرەك. وپ-وڭاي الا سالىپ، جۇمساپ، ودان كەيىن كەلىپ: «اقشانى تويعا نەمەسە باسقا دا جەكە باسىمنىڭ ماقساتتارىنا جۇمساپ ەدىم» دەگەن بولماۋ كەرەك. ياعني، ءبىز كەپىل رەتىندە، مىسال ءۇشىن قۇنى 100 مىڭ تەڭگە بولاتىن سابان ءۇيدى الىپ، 3 ملن.تەڭگەلىك نەسيەنى بەرۋگە دايىنبىز. بۇل تازا ادامگەرشىلىككە قۇرىلۋى كەرەك، ياعني ادام قولىنداعى جالعىز سابان ءۇيىن بەرىپ، وعان العان قارجىنى تيىسىنشە جۇمساۋى كەرەك. كەپىل قۇنى نەسيە مولشەرىن جاباتىنداي بولۋى كەرەك دەگەن تالاپ قويىپ وتىرعان جوقپىز»،–دەپ مالىمدەدى ول.

مىرزاحمەتوۆ شاعىن نەسيەنى الۋدىڭ باستى شارتى – بۇل ايقىندالعان بيزنەس-جوسپار ەكەنىن ايتتى. «بۇعان قوسا ءبىز اۋىل شارۋاشىلىعىنا جارامدى 100 تيپتىك جوبا جاساپ شىعاردىق. ولار قازىرگى كۇنى كاسىپكەرلەردى قولداۋ ورتالىعىندا جاتىر»،–دەپ قوستى ول.

باعدارلاماعا قاتىسۋشىلاردى بەكىتەتىن وڭىرلىك كەڭەستە كەپىلگەرلىك ەلەمەنتى بار. «ولاردىڭ بارلىعى دا اۋداننان شىققاندار. سول ءۇشىن ەڭ باستىسى – قولداۋ كورسەتۋ. ياعني ءبىز ءىز جۇزىندە  نەسيەنى قايتارعانشا وعان كومەك كورسەتەتىن بولامىز. بارلىق ماسەلە وسىندا، اۋىل تۇرعىنىن جالعىز تاستاماۋىمىز قاجەت. قايتارىلمالى كەپىل دەگەنىمىز وسى. ءبىز ونىڭ اقشاسىنىنڭ قايدا كەتكەنىن، ەگىن مولشەرىن، ءبارىن-ءبارىن باقىلاپ وتىرماقپىز. وڭىرلىك كەڭەستەرمەن سويلەستىك، سەبەبى وندا ءىرى بيزنەس بار. ولار وزدەرىنە جۇكتەلگەن جاۋاپكەرشىلىكتى ءتۇسىنىپ وتىر. مىسالى، ماڭعىستاۋدىڭ جەرگىلىكتى كاسىپكەرلەرى شاعىن نەسيەنىڭ قايتارىلماۋىنىڭ اۋا-رايى سەكىلدى ورىندى سەبەپتەرى بولعان جاعدايدا، ونى وزدەرى تولەۋگە دايىن. ءبىز مۇنىڭ ءتيىستى باعاسىن بەرەتىن بولامىز»،–دەدى پالاتا باسقارما باسشىسى.

ونىمەن قوسا، مىرزاحمەتوۆ بيىل ءار اۋداندا اگرارلىق قۇزىرەت ورتالىعى اشىلاتىنىن جەتكىزدى. ء«بىز وعان مامانداردى تارتامىز. ولار جىلىجايدى سالۋ، تەحنيكانىڭ ءتۇرىن تاڭداۋ جانە ت.ب. ماسەلەلەردە كومەكتەسەتىن بولادى»،–دەدى ول.

ء«بىز نەسيە تاريحى بويىنشا ەشقانداي شەكتەۋ قويمايمىز. قولىندا بيزنەسى بولىپ، ونى ۇلكەيتكىسى كەلەتىندەر دە، جاڭادان باستاۋشىلار دا قارجىلىق كومەك الا الادى»، – دەدى پالاتا باسقارما باسشىسى.

«المەكس» باسقارما توراعاسى ءماجيت ەسەنباەۆ ءوز كەزەگىندە ەلباسىنىڭ تاپسىرماسى بويىنشا قۇرىلعان شاعىن نەسيە بەرۋ ۇيىمدارى بۇگىنگى تەڭگەلىك وتىمدىلىككە بايلانىستى ۇلكەن قيىندىقتارعا تاپ بولعان. «ولار ۇسىنىپ وتىرعان، شامامەن 45-50%-عا تەڭ پايىزدار، مەنىڭشە، شاعىن جانە ورتا بيزنەس ءۇشىن مۇلدەم ءتيىمسىز.  وعان قاراعاندا بۇگىندە 14%-بەن نەسيە بەرەتىن «دامۋ ميكرو» ۇيىمى قىزمەتى جامان ەمەس. ءبىز ولارمەن باسەكەگە تۇسكىمىز كەلمەيدى. كەرىسىنشە، شاعىن نەسيە مولشەرىن ۇلعايتۋ ارقىلى كومەك كورسەتكىمىز كەلەدى»، – دەدى ول.

«المەكس» مۇنداي تاۋەكەلگە بارۋدان سەسكەنبەي مە دەگەن سۇراققا باسقارما توراعاسى: «تاۋەكەلكە بەل بۋماسقا بولماس. ءبىز بۇعان سانالى تۇردە كەلدىك، سەبەبى ناتيجەسى ءبىز ءۇشىن جاقسى بولماق. ءبىز كەلەشەكتە قولايلى قارجىلىق جانە ينۆەستيتسيالىق ورتا قالىپتاستىرۋعا قابىلەتى بار ناتيجەلى بيزنەسمەندەر جاساپ شىعاتىنىنا سەنەمىز .تاۋەكەلگە بارۋ سەبەبىمىز دە وسى». 

Abai.kz