قازىرگى قالامگەرلەردە مۇرات بار ما؟
...بىرەۋىڭ قىزبەن جۇرگەنىڭدى، گۋليايت سالعانىڭدى، مىقىنىنان ۇستاعانىڭدى جازىپ ءجۇرسىڭ، ەندى ءبىرىڭ نە وندا، نە مۇندا جوق، قوياننان كوز جازىپ قالعان تازىداي، ارسالاڭداپ ءجۇرسىڭ. تاعى بىرەۋىڭ كورىنگەنگە «جاپلاق شەشە» كورىنگەلى تۇلكىشە قۇيرىعىڭدى بۇلعاڭداتىپ ءجۇرسىڭ.
ەندى بىرەۋىڭنىڭ ورىستى قازاققا، قازاقتى ورىسقا شاعىستىرىپ سەنىمىن الماق، اقىن اتالماق ويىڭ بار. تاعى بىرەۋىڭ ويىن جاسىرىپ، بويىن جاسىرىپ، جات ەلدىڭ جازۋشىلارىن اۋدارىپ تالشىق ەتۋدەسىڭ.سەندەردە مۇرات بار ما؟ باقىت بار ما؟ جۇرەك بار ما؟
بۇگىن –يدياليست، ەرتەڭ-ماتەرياليست، بۇگىن-رەاليست، ەرتەڭ-سيمۆوليست، بۇرسۇگىنى-فۋتۋريست، تاعى بىردەمە «يست»، ايتپەسە ارقايسىسىنان ءبىر شوكىم. اقىندىقتى، جازۋشىلىقتى ساۋىسقانعا ايىرباستاپ، نەدەن مۇنشا اداستىڭدار؟ كۇندىك كۇنىڭە، ءوشتى-قاستى كەگىڭە الدە كۇنشىلدىگىڭە بولا ەلدىڭ ايناسى- ادەبيەتتى ۇرىس-كەرىسكە، بوقاۋىزعا اينالدىردىڭدار.
كەلەشەكتەن ۇيالساڭدارشى! كۇيىپ كەتتىم عوي. شىداي المادىم عوي! ايتپايىن دەسەم دە قويمادىڭدار عوي، تۇگە، ازىپ تۋعان مۇندارلار!
جۇسىپبەك ايماۋىتوۆتىڭ «ەلەس» اڭگىمەسىنەن الىنعان ءۇزىندى
Abai.kz
