قاراعاندى وبلىسىندا بيىل دا توپان سۋ باسۋ قاۋپى جوعارى. ويتكەنى ايماقتاعى قار قالىپتى دەڭگەيدەن 2 ەسە كوپ. مۇنداي اقپاراتتى وبلىس اۋماعىن تىكۇشاقپەن ارالاپ شىققان ىشكى ىستەر ءمينيسترىنىڭ ورىنباسارى ۆلاديمير بوجكو ايتتى. ول كوكتەمدەگى سۋ تاسقىنىنا ءار شەنەۋنىك باسىمەن جاۋاپ بەرەتىنىن ەسكەرتتى، - دەپ حابارلايدى "استانا" ارناسى.

ۆلاديمير بوجكو، ەمتيحان قابىلداعان مۇعالىمدەي، قاراماعىنداعىلاردى قىسپاققا الدى. ەلدى مەكەندەردەگى توتەنشە جاعدايلار بولىمدەرىنىڭ كەي باستىقتارى مەن اۋدان اكىمدەرىنىڭ وقۋ-جاتتىعۋ جۇمىستارىمەن شەكتەلگەنى ىشكى ىستەر ءمينيسترىنىڭ ورىنباسارىنا ۇناماعانى انىق. ونىڭ ۇستىنە بيىل وبلىستا قار قالىپتى مولشەردەن ەكى ەسە كوپ جاۋعان. ەرتە كوكتەم باستالسا، سەلگە توتەپ بەرۋ قيىن ەكەنىن ايتتى. سوندىقتان بوجكو سۋ تاسقىنىنا ءار شەنەۋنىكتىڭ باسىمەن جاۋاپ بەرەتىنىن ەسكەرتتى.

"قاردىڭ بيىل كوپ ەكەنىن بايقادىم. بىردە-ءبىر قارا جەر جوق، اينالا اپپاق. سوندىقتان تۇرعىندار اۋلاسىن تازالاسىن. كوشەگە شىعارىلعان قاردى تازالاۋ - بيلىكتىڭ شارۋاسى. ۋچاسكەلىك پوليتسەيلەر اكىمدىككە تۇراقتى ەسەپ بەرسىن. مىندەتىن دۇرىس اتقارماعاندار قىزمەتتىك جاۋاپكەرشىلىككە تارتىلادى", - دەيدى ىشكى ىستەر ءمينيسترىنىڭ ورىنباسارى ۆلاديمير بوجكو.

مينيستر ورىنباسارى، اسىرەسە قارقارالى، اباي، وساكاروۆكا اۋداندارىنىڭ شەنەۋنىكتەرىنە ناقتى تاپسىرمالار جۇكتەدى.

بىلتىر بۇل ەلدى مەكەندەردەگى ونداعان اۋىلدى توپان سۋ باسقان بولاتىن. بۇگىنگى كۇنى اتالعان اۋىلدار ءالى كۇنگە ەسكەرتۋ دابىلدارى مەن اۋا رايىن بولجايتىن گيدرومەتەورولوگيالىق ستانسالارمەن جابدىقتالماعان. ءتىپتى قاردىڭ مولشەرىن ولشەيتىن ارنايى قوندىرعى دا الىنباعان. ءبىر عانا قارقارالى اۋدانىنداعى وبلىستىق، رەسپۋبليكالىق تاس جولداردىڭ بويىندا، جينالعان سۋدى اعىزاتىن 2 قۇبىر عانا بار. ول ازدىق ەتەدى، ال جاڭاسىن ورناتۋعا قاراجات قولبايلاۋ بولعان. استانالىق شەنەۋنىك، بۇل جولدار سەلگە بوگەت بولىپ جاتسا، بۇزىلاتىنىن ايتتى. ال، اۋدان اكىمدىگى ازىرگە قاۋىپتىڭ جوق ەكەنىن جەتكىزدى.

ەسكە سالساق، بىلتىر كوكتەمدە وبلىسقا قاراستى 9 اۋدانىنداعى 50 شاقتى ەلدى مەكەندى توپان سۋ باسقان بولاتىن. وسىنىڭ سالدارىنان جۇزدەگەن ءۇي قيراپ، حالىقتىڭ دۇنيە-مۇلكى مەن مالى سۋعا كەتتى. الدىڭعى جىلى كوكتەمدە كوكپەكتى اۋىلىندا توعان جارىلىپ، 5 ادام قازا تاپتى. ەكى بىردەي اپاتتان ساباق العان ۆلاديمير بوجكو شەنەۋنىكتەردى بىرلەسىپ، جۇيەلى تۇردە جۇمىس ىستەۋگە شاقىردى. ال تاسقىننىڭ الدىن الۋعا باعىتتالعان جۇمىستاردىڭ بارىسىمەن ىشكى ىستەر مينيسترلىگىن جەرگىلىكتى پوليتسەيلەر تانىستىرىپ تۇراتىن بولىپ ۋاعدالاستى.

اباي-اقپارات