2011 جىلى ۇشقىش سەۆوستيانوۆ «قازاۆياقۇتقارۋ» كاسىپورنىمەن جالپى سوماسى 19 ملن 500 مىڭ تەڭگەگە (130 مىڭ ەۋرو) كەلىسىمشارت جاساپ، گەرمانيادا «ەۆروكوپتەر-145» تىكۇشاعىن باسقارۋدى وقىپ كەلەدى. ءۇش جىلدان كەيىن جالاقىنىڭ ۇنەمى كەشىگۋىنە بايلانىستى جۇمىستان كەتۋگە ءماجبۇر بولادى. ءبىر جارىم جىل وتكەن سوڭ، كاسىپورىن بۇرىنعى جۇمىسشىسىنان وقۋىنا جۇمسالعان 8 ميلليون تەڭگەنى (20 مىڭ ەۋرو) قايتارۋدى تالاپ ەتىپ، سوتقا بەرەدى. ۇشقىش بۇل سومانىڭ قايدان شىققانىن زەرتتەي باستاعاندا قىزىق جايتقا كەزىگەدى. گەرمانيانىڭ تجم ۇشقىشتارىن دايىندايتىن اكادەميادا ءوزى وتكەن كۋرستىڭ باعاسى 1200 ەۋرو ەكەنى انىقتالادى. سوندىقتان ول وزىنە قاتىستى شىققان سوت شەشىمىنە قارسىلىق ءبىلدىردى. ءوز كەزەگىندە، «قازاۆياقۇتقارۋ» اق باس ديرەكتورى مالىك دوسىمبەكوۆ بۇرىنعى قىزمەتكەرىنىڭ وتىرىك ايتاتىنىن جانە ونى قۇجاتتارمەن دالەلدەپ بەرە الاتىنىن مالىمدەدى.

بۇل ارادا فرانتسۋزدىڭ «لە موند» گازەتى قازاقستانعا 45 جاڭا «ەۋروكوپتەر» ساتۋ مەن استانانىڭ ىرگەسىندەگى قۇنى 2 ملرد ەۋرو بولاتىن تىكۇشاق قۇراستىرۋشى زاۋىت قۇرىلىسىنا قاتىستى ءوز زەرتتەۋىن جاريالادى. باسىلىم فرانتسيانىڭ بۇرىنعى پرەزيدەنتى ساركوزيدىڭ ادامدارى وسى كەلىسىم ءۇشىن 300 مىڭ ەۋرو پارا العانىن ايتادى. ساراپشىلار فرانتسۋز بيلىگى قازاقستاننىڭ جوعارى شەندى شەنەۋنىكتەرىنىڭ وتىنىشىمەن بەلگيالىق تەرەۋشىلەرگە قىسىم جاسادى دەپ سانايدى. ناتيجەسىندە بەلگيانىڭ تەرگەۋ ورىندارى وسى كەلىسىمشارتتى دايىنداۋعا قاتىسقان جانە قازاقستان پرەزيدەنتى ن.نازارباەۆپەن تىعىز بايلانىستاعى تەگى قازاقستاندىق بەلگيا ازاماتى فاتوح شوديەۆ پەن قازاقستاننىڭ ەكى ازاماتىنا قارسى قىلمىستىق ءىستى 23 ميلليون ەۋرو كولەمىندەگى ءىرى ايىپپۇل تولەۋگە اۋىستىرۋعا كەلىسكەن.

اقپان ايىنىڭ سوڭىندا ۇشقىش سەۆوستيانوۆتىڭ ءىسى بويىنشا جاڭا سوت باستالۋى كەرەك. ول وزىنە قارسى باستالعان سوت ءىسىنىڭ باستى ماقساتى – ماقساتسىز جۇمسالعان ميلليونداعان تەڭگە شىعىننىڭ ورنىن جابۋ ەكەنىنە سەنىمدى.

اباي-اقپارات