2015 جىلى قازاقستاندىق كومپانيالاردىڭ قىزمەتكەرلەرى الدىندا 5,4 ميلليارد تەڭگەدەن اسا قارىزى بولعان، - دەپ حابارلايدىTengrinews.kzء تىلشىسى قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ءباسپاسوز قىزمەتىنە سىلتەمە جاساپ.

مينيسترلىكتىڭ مالىمەتىنشە، 2015 جىلى مەملەكەتتىك ەڭبەك ينسپەكتورلارى رەسپۋبليكانىڭ 1216 كاسىپورنىندا 42,8 مىڭ جۇمىسكەر الدىندا جالاقى بويىنشا 5,4 ميلليارد تەڭگەدەن اسا قارىز بار ەكەنىن انىقتادى. وسى كاسىپورىنداردىڭ جەتەكشىلەرىنە 108,7 ميلليون تەڭگەدەن اسا سوماعا ايىپپۇل سالىندى.  

"قولدانىلعان شارالاردىڭ ناتيجەسىندە، سونىمەن قاتار، جالاقى بويىنشا قارىزدى وتەۋدىڭ مەرزىمى مەن كەستەسىن قاتاڭ بەلگىلەۋ ارقىلى 41 مىڭنان استام جۇمىسكەردىڭ قۇقىعى قورعالىپ، ناتيجەسىندە ولارعا 4,9 ميلليارد تەڭگە تولەندى", - دەلىنگەن حابارلامادا.

جالپى، بىلتىر مەملەكەتتىك ەڭبەك ينسپەكتورلارى 11421 تەكسەرۋ جۇرگىزدى، 19 مىڭنان اسا قر ەڭبەك زاڭناماسىن بۇزۋ دەرەگى انىقتالىپ، 429 ميلليون تەڭگە سوماعا ايىپپۇل سالىندى.

اباي-اقپارات