سولتۇستىكتەگى كورشىمىز (رف) اسكەري سىناق وتكىزۋ ءۇشىن جالعا العان جەردىڭ ءار گەكتارىنا 424 تەڭگە اقشا تولەپ كەلىپتى (الدا تۋرا وسى اقشانى تولەي بەرەدى). كەشە كتك ارناسىنىڭ جاڭالىقتارىنان وسى دەرەك جاريا بولدى. قازاقتىڭ دالاسىن ۋ-عا بوكتىرىپ، جەرىمىزدى جارامسىز ەتىپ بەرگەنى ءۇشىن كورشىمىزدەن بار الاتىن قارجىمىزدىڭ سوماسى 500 تەڭگەگە دە جەتپەۋى نەنى ۇقتىرادى؟ بۇل سوما كۇندە جارىلىس بولىپ جاتقان اۋماققا كەلگەن زياندى اقتايدى ما؟ جوق!

قازىر 7 ميلليون گەكتاردان استام قازاق جەرى رەسەيدىڭ پوليگوندارىنا جالعا بەرىلىپ وتىرعان كورىنەدى. ياعني، وسىنشا اۋماقتا كورشىلەرىمىز اسكەري سىناق وتكىزەدى. دەمەك، 7 ميلليون گەكتار جەرىمىزدە كۇندە اتىس، كۇندە جارىلىس بولىپ جاتىر دەگەن ءسوز. جارماقتاي قارجىعا جالعا بەرىلگەن قازاق جەرى تۋرالى سەنات دەپۋتاتتارى نە دەيدى؟

قۋانىش ايتاحانوۆ، سەنات دەپۋتاتى:

-پوليگوننىڭ قىزمەتى جالعا بەرىلگەن جەرلەردە قورشاعان ورتاعا، حالىققا ىقتيمال قاۋىپ توندىرىلۋدە. ونى دا ەسەپتەۋىمىز كەرەك. سونىڭ ءبارىن ەسەپتەگەندە جالعا بەرىلگەن ءاربىر گەكتاردىڭ قۇنى وتە تومەن دەپ ەسەپتەيمىن. ءبىز حالىققا جايىلىمدى ءار گەكتارىنا 2 مىڭ تەڭگەدەن، ال پوليگونعا سىناق جاساۋ ءۇشىن 424 تەڭگەدەن بەرەدى ەكەنبىز.

سونىمەن، بيۋدجەتكە جالپى جالعا بەرىلگەن جەر ءۇشىن جىلىنا 24 ميلليون دوللار تۇسەدى. شەتەلدەردەگى باعامەن سالىستىرعاندا رەسەي قازاق جەرىن سۋ تەگىن پايدالانۋدا، - دەيدى سەناتورلار.

مۇرات باحتيارۇلى، سەنات دەپۋتاتى:

-مىسالى، امەريكا قۇراما شتاتتارىندا بەرليندەگى كىشكەنتاي عانا جەردى جالعا الۋ قۇنى ەۆروعا شاققاندا 1 جارىم ميلليارد ەۆرو. ەگەر بۇكىل گەرمانياداعى امەريكانىڭ اسكەري بازالارىن مەن پوليگوندارىنىڭ  جالعا الۋ قۇنىن ەسەپتەگەندە 3 ملر.ەۆرو ەكەن، ءبىزدىڭ اقشاعا شاققاندا 1 ترل 200 ملرد تەڭگە. بۇل وتە كوپ قارجى.

ال قورعانىس مينيسترلىگىندەگىلەر رەسەيگە شاڭ جۋىتار ەمەس. كورشىلەرىمىز جىل سايىن جۇزدەگەن وفيتسەردى اقىسىز وقىتىپ، تەگىن تەحنيكامەن قامتۋدا دەيدى. بۇل ازداي ءبىزدىڭ شەنەۋنىكتەر جالعا بەرىلگەن  ايماقتارداعى گەولوگيالىق بارلاۋ جۇمىستارىنا قاتىستى ماسەلەنىڭ دە باسىن اشىپ الماپتى. ياعني، ۋاقىتشا رەسيەگە تيەسىلى جەرلەردەن كەن ورىندارى تابىلسا، قازبا بايلىقتىڭ كىمگە بۇيىراتىنى ناقتى كەلىسىلمەگەن. 

Abai.kz