بۇگىن التىنبەك سارسەنباەۆتىڭ تۋعان جيەنىنە قاستاندىق جاسالىپ، 34 جاستاعى ايەل قازا بولدى

سۋىت حاباردى اۋەلى «Ratel.kz» تىلشىلەرى جازدى.

قازاقستاننىڭ كورنەكتى مەملەكەت قايرەتكەرى، ساياساتكەر التىنبەك سارسەنبايۇلىنىڭ ومىردەن وتكەنىنە 10 جىل تولعان قارالى كۇننىڭ قارساڭىندا، ونىڭ جيەنى كىسى قولىنان قازا تاپقان.

بەيرەسمي دەرەككوزدەرىنە سۇيەنسەك، قازا بولعان 34 جاستاعى ايەلدىڭ  دەنەسىنە ەكى جەردەن اس ءۇي پىشاعى سۇعىلعان. مارقۇم التىنبەك سارسەنبايۇلىنىڭ تۋعان اپكەسىنىڭ قىزى بولعان.

مارقۇمنىڭ تۋىستارىنىڭ ايتۋىنشا، قازا بولعان ايەل بىرنەشە كۇننەن بەرى بايلانىسقا شىقپاعان جانە مارقۇمنىڭ ۇيىندەگى بارلىق قۇجاتتار مەن جەكە مۇلىكتەرى جوعالىپ كەتكەن.

قازىرگى تاڭدا پوليتسيا كىسى ءولىمى فاكتىسى بويىنشا تەرگەۋ جۇمىستارىن باستاعان.  دەرەكتەر بويىنشا، 1982 جىلى دۇنيەگە كەلگەن مارقۇمنىڭ تەگى قايىربەكوۆا.

Abai.kz