قىستا قالىڭ قار تۇسكەندە، كوكتەمدە ۇيلەر سۋعا كەتكەندە ءبىر كورىنەتىن باس قۇتقارۋشى بوجكو مىرزا بۇگىن تىڭ ۇسىنىس جاسادى، - دەپ حابارلايدى 31 ارنا تىلشىلەرى.

ياعني، بۇدان بىلاي توتەنشە جاعدايعا تاپ بولىپ، ارنايى قىزمەتتەردەن كومەك سۇراعانىڭىز ءۇشىن ايىپپۇل تولەۋىڭىز مۇمكىن. ناقتىراق ايتقاندا ۆيتسە-مينيستر بوراندى كۇندەرى كولىكتەرى جولدا بوگەلىپ "قۇتقارىپ الىڭدار" دەيتىن ازاماتتاردىڭ وزدەرىن جاۋاپقا تارتۋ كەرەك دەدى. ساپارعا شىقپاۋ تۋرالى ەسكەرتۋدى ايتپەسە، جۇرگىزۋشىلەر ەلەمەيتىن كورىنەدى. ال، كۇن كۇرت جىلىنسا ۇيلەرىن سۋ باسۋ قاۋپى تونگەن ەلدىمەكەندەرگە قاتىستى ازىرگە ەشقانداي يدەيا ايتپادى. سونىمەن، قۇتقارۋدىڭ باعاسى قانشا تۇرادى؟

قىس باستالعالى ەلىمىزدە قار قۇرساۋىندا قالعان 4 مىڭنان استام ادام قۇتقارىلىپتى. ولاردىڭ 200-دەيى بالا. جولدا قالعانداردى قۇتقارۋدان شارشادى ما، الدە قارجىلىق داعدارىستىڭ سالقىنى ما، ايتەۋىر توتەنشە جاعدايدى بىرنەشە جىل باسقارعان ۆلاديمير بوجكو ەرەكشە باستاما كوتەردى.

ۆلاديمير بوجكو, قر ىشكى ىستەر ءمينيسترىنىڭ ورىنباسارى:

- ءبىر جاعىنان ءبىز بىرەۋدى قۇتقارامىز، ەكىنشىدەن قۇتقارۋشىلاردىڭ دا باسىن بايگەگە تىگەتىنىن ەسكەرۋ قاجەت. ونىڭ ۇستىنە قانشاما شىعىن كەلەتىنىن ۇمىتپاۋ كەرەك. بۇل - ءبىزدىڭ ەسكەرتۋلەردى ەلەمەي جولعا شىققاندارعا ەرتەڭنەن باستاپ ايىپپۇل سالا باستايمىز دەگەن ءسوز ەمەس. دەگەنمەن بەلگىلەنگەن ەرەجەلەردى بىرنەشە رەت بۇزعان ازاماتتاردى قانداي دا ءبىر جاۋاپكەرشىلىككە تارتۋ كەرەك دەپ ويلايمىن.

بوجكو مىرزا ماتەريالدىق شىعىندى ءوندىرىپ الۋ تۋرالى ۇسىنىسىن، بۇگىن وتكەن توتەنشە جاعدايلاردىڭ الدىن الۋ جونىندەگى ۆەدوموستۆوارالىق كوميسسيا وتىرىسىندا ايتتى.

اباي-اقپارات