بۇگىن اقوردا جانىنداعى ورتالىق كوممۋنيكاتسيالار قىزمەتىندە پاۆلودار وبلىسىنىڭ اكىمى قانات بوزىمباەۆ بريفينگ وتكىزدى.

بوزىمباەۆ مىرزا بريفينگ بارىسىندا جۋرناليستەردىڭ وتكىر سۇراقتارىنا وزگەشە جاۋاپ بەرگەن.

سونىمەن، بوزىمباەۆتىڭ بريفينگتەگى باتىل جاۋاپتارىنا نازار اۋدارا وتىرىڭىزدار.

ەشكىمنەن ءام ەشتەڭەدەن قورىقپايتىن اكىم

پاۆلودار وبلىسىنىڭ اكىمى قانات بوزىمباەۆ جۋرناليستەرگە ءوزىنىڭ قورقىنىشى تۋرالى سۇراقتارعا جاۋاپ بەرىپ، ەشتەڭەدەن قورىقپايتىنىن مالىمدەدى.

«اكىمنىڭ قورقىنىشتارىنا كەلەتىن بولساق. ءبىز، اكىمدەر، ەشتەڭەدەن قورىقپايتىن ادامدارمىز. ەكىنشىدەن، مەن تۇراقتى تۇردە ءباسپاسوز وكىلدەرىمەن تىلدەسىپ تۇرامىن»، – دەدى بوزىمباەۆ.

كەزدەسۋلەرگە قاتىستى اكىم تۇراقتى تۇردە باق وكىلدەرىمەن باس قوساتىنىن العا تارتتى. سوڭعى كەزدەسۋىندە ول جۋرناليستەرمەن سايلاۋ كەزەڭىن تالقىلاعان ەكەن. ونىڭ ايتۋىنشا، وسى كەزەڭدە ءتۇرلى ارام نيەتتى ادامدار پايدا بولادى.

اكىم باق وكىلدەرىنە سايلاۋ كەزىندە اباي بولىپ، ەشقانداي ارانداتۋشىلىق ماتەريالدار جىبەرمەۋگە، سايلاۋدىڭ دەموكراتيالىق تۇردە وتۋىنە سەپتىك بولۋعا كەڭەس بەردى.

«ال وبلىس تۇرعىندارىنىڭ ەسىندە قالۋ ءۇشىن ءسىز نە ىستەر ەدىڭىز» دەگەن جۋرناليستەر سۇراعىنا قانات مىرزا بوزىمباەۆ بىلاي دەپ جاۋاپ قاتتى.

«مەن ەلدىڭ ەسىندە قالۋ ءۇشىن جۇمىس ىستەمەيمىن. ەستە قالۋ ءۇشىن عانا ەڭبەك ەتۋ دۇرىس ەمەس. ەگەر مەنىڭ الدىما قويىلعان الەۋمەتتىك پروبلەمالاردى شەشىپ جاتسام، اتقارىلعان جۇمىستان ءوزىم-اق ءلاززات الامىن»،-دەدى بوزىمباەۆ.

بوزىمباەۆ رەزيدەنتسياسى

پاۆلودار وبلىسى اكىمىنىڭ رەزيدەنتسياسى تۋرالى باق وسىنىڭ الدىندا جازعان بولاتىن. مىنە، ەندى بوزىمباەۆ مىرزا مەملەكەت ەسەبىنەن قارجىلاندىرىلىپ وتىراتىن ءزاۋلىم سارايدا تۇرمايدى.

اكىم مىرزا قالا سىرتىنداعى رەزيدەنتسياسىن تاستاپ، قالاعا كوشىپ كەلگەن. بوزىمباەۆتىڭ بۇلاي ىستەۋىنە اكىم مىرزانىڭ ۇيىندەگى ەگىز سابيلەرى سەبەپكەر بولعان ەكەن. بۇل تۋرالى وبلىس باسشىسى بريفينگ بارىسىندا بايانداعان.

بوزىمباەۆ مىرزانىڭ ايتۋىنشا، وتباسىنداعى ەگىز بالالارى ءوسىپ، رەزيدەنتسيادان 20 شاقىرىمداعى بالاباقشاعا اپارىپ-اپكەلۋ قيىنداپ كەتكەن.

«قازىر جالدامالى پاتەردە تۇرىپ جاتىرمىن. پاتەر اقىسىن ءوز جالاقىمنان تولەيمىن. بيۋدجەتتىڭ اقشاسىن جەكە باسىما قولدانبايمىن. بۇرىن، رەزيدەنتسيا اۋماعىنداعى ۇيدە تۇرىپ كەلدىم. ال ارنايى وبلىس اكىمىنە ارنالعان رەزيدەنتسيا دەگەن بولمايدى. وبلىس اكتيۆىنە تيەسىلى رەزيدەنتسيانىڭ ءبىر ءۇيىن مەن جالعا الىپ تۇردىم. ول كەزدە كوممۋنالدىق تولەمدەردى قوسا ەسەپتەگەندە ايىنا 550 مىڭ تەڭگە تولەيتىنمىن. قازىر ودان ارزان پاتەردە تۇرامىن»،-دەيدى قانات بوزىمباەۆ مىرزا.

ۇلىمنىڭ ەر مىنەزدىلىگى ءۇشىن قۇرمەتتەيمىن 

«ال مەنىڭ ۇلىما كەلەر بولساق، سۇراقتارىڭىدى قۇقىق قورعاۋ جانە سوت ورگاندارىنا قويعاندارىڭىز دۇرىس. قازىر ول جەردە اپپەلياتسيالىق شاعىم قاراستىرىلىپ جاتىر. مەن بۇل ءىس تۋرالى ايتا المايمىن. مەن ءوز ۇلىمنىڭ ەر مىنەزدىلىگى ءۇشىن ونى قۇرمەتتەيمىن جانە مەنىڭ ۇلىم ەشقانداي قىلمىستىق ىسكە بارعان جوق دەپ ەسەپتەيمىن»،-دەدى پاۆلودار وبلىسىنىڭ اكىمى.

Abai.kz