ءانشىنىڭ اقىن بولعانى جاقسى عوي. ەڭ ءبىرىنشى، ءان ماتىنىنە ءمان بەرەدى، اۆتوردى دا تاڭداي الادى، كەم-كەتىستىگىن بايقاسا، اقىل قوسادى. بۇل ءۇردىس كەزىندە اقيىق اقىن مۇقاعالي مەن اتاقتى سازگەر نۇرعيسا تىلەنديەۆتىڭ اراسىندا جاقسى ىسكە استى.

وسى تۇستا ءشامشى مەن شاحانوۆتىڭ ۇيلەسىمدىلىگىن دە ايتا كەتكەن ءجون. سول شىنايى شىعارماشىلىق بايلانىستىڭ ارقاسىندا تالانتتار ۇتىلعان جوق، كەرىسىنشە ۇندەستىك ۇيلەسىم تاۋىپ، ۇلتتىڭ ءانجارياسى، كەرەمەت دۇنيەلەرمەن تولىقتى. بەرتىن كەلە جوعارىدا ءسوز ەتىلگەن اقىن مەن سازگەردىڭ اراسىنداعى شىعارماشىلىق بايلانىس باسەڭدەي ءتۇستى، قۇلدىراۋ كەزەڭىن باستان كەشىردى. ءوزى اقىن، ءوزى سازگەر جارتى تالانتتار ساحناعا شىقتى. سالدارىنان ساپاسىز اندەردىڭ قاتارى ارتتى، ادام ءتۇسىنىپ بولمايتىن ماتىندەر پايدا بولدى. " پاح، پاح، قانداي ءيىس؟ كوزدەرىڭمەن ءسۇيىس" دەپ ايقىن تولەپبەرگەن "جارق" ەتە قالدى ، "شاشتارىڭنىڭ ءيىسىن ساعىندىم" دەپ اسان پەردەش شىقتى ، " الماتىنىڭ تۇندەرىن-اي! الاتاۋدىڭ سالقىن سامالىنداي!" دەپ قايرات شىقتى ەفيرگە. سازى جاتتاۋعا جەڭىل، ءماتىنى ماعىناسىز وسى سەكىلدى تۋىندىلار قازاق ءان ونەرىنىڭ التىن قورىنا تالعامسىز، تاڭداۋسىز ەنىپ جاتتى. 

اراعا جىلدار سالىپ، بۇل ولقىلىقتاردىڭ ورنى تولا باستادى. سازگەر اقىن ىزدەۋ ءۇردىسىن قولعا الدى. ناتيجەسىندە قالقامان سارين، سەرىكزات دۇيسەنعازى، تالانت ارعىنعالي، رينات زايتوۆ سىندى اقىن اۆتورلاردىڭ ماتىندەرى انمەن ۇيلەسىم تابا باستادى. ءوزى سازگەر، ءوزى اقىن بەكجان ءاشىرباي، جاكەن ومار، تورەعالي ءتورالىلاردىڭ اندەرى تىڭدارمانعا جول تارتتى، جۇرەگىنە جول تاپتى. اۋەزدى ءان مەن ماعىناسى تەرەڭ ولەڭدەر ۇيلەسىم تاۋىپ، تىڭدارمان قاۋىم ءبىر سەرپىلدى. وسى سەرپىلىس جالعاسىن تابا بەرسىن!

ايدار سەيدازىم

Facebook-تەگى پاراقشاسىنان