قارجىسى تاۋسىلعان ءماسىموۆ ۇكىمەتى ەندى زەينەتكەرلەردىڭ قالتاسىنا قول سۇعا باستايدى.

قر پرەمەر-ءمينيسترى كارىم قاجىمۇقانۇلى تىزگىنىن ۇستاپ وتىرعان جوعارعى ۇكىمەت قازاقستاندىقتاردىڭ زەينەتاقى قورلارىنا قول سۇعۋى مۇمكىن. اتاپ ايتقاندا، زەينەتاقى قورىنان 100 ميللياردتان استام تەڭگە بانكتەرگە بەرىلمەكشى. بۇل تۋرالى استانا ارناسىنا سۇحبات بەرگەن قازاقستاننىڭ كاسىپكەرلەر پالاتاسىنىڭ توراعاسى ابىلاي مىرزاحمەتوۆ مالىمدەگەن.

ەستەرىڭىزدە بولسا، باس پارتيانىڭ وتكەن سەزىندە مەملەكەت باسشىسى نۇرسۇلتان ءابىشۇلى قورداعى قاراجاتقا قول سۇقپاۋدى قاتاڭ تاپسىرىپ ەدى. قر كاسىپكەرلەر پالاتاسى ءبىرازدان بەرى باق بەتىندە باجايلاپ، تەڭگەنىڭ تاپشىلىعىن ايتىپ، زەينەتاقى قورىنداعى قاراجاتتى «قولقالاپ» جۇرگەنى دە جاسىرىن ەمەس.

ال ۇكىمەت ۇيىندە وتكەن جيىندا «اتامەكەن» ۇكپ باسقارما توراعاسى ابىلاي مىرزاحمەتوۆ مىرزا قارجىلىق قيىندىق كەزەڭىندەگى قاجەتتى قاراجاتتىڭ شەتىن شىعارعان.

«جيىن وسىدان ءبىر اپتا بۇرىن ءوتتى. بۇل ارينە بانك سالاسىنا قاتىستى. مەنىڭ ويىمشا، قوردان 100 ميلليارد تەڭگە الىنادى» دەيدى باسقارما توراعاسى ابىلاي مىرزاحمەتوۆ مىرزا.

مىرزاحمەتوۆ مىرزانىڭ بۇل ۋاجىنە قر قارجى ءمينيسترىنىڭ ءوز ايتارى بار بولىپ شىقتى.

«مۇلىك پەن اقشانى زاڭداستىرۋ كەزىندە سول بانكتەردىڭ قازىناسىنا 150 ميلليارد تەڭگەدەن استام قاراجات ءتۇستى. باسىندا بانككە سالىنعان اقشا بەس جىل الىنباي ساقتالادى جانە سول سومادان بيۋدجەتكە 10 پايىز تولەنەدى دەلىنگەن. جەلتوقسان ايىنان باستاپ بۇل شەكتەۋلەر جويىلدى. ەندى اقشانى تىركەسە بولدى. تۇك تالاپ ەتىلمەيدى. ءتىپتى بۇعان دەيىن 10 پايىز تولەپ قويعاندار قايتىپ الادى. رەسپۋبليكا بويىنشا بارلىعى 3 ميللياردتان استام تەڭگە ءتۇستى. كوبى ەستي قويماعان شىعار. مىنبەردى پايدالانىپ، ازاماتتاردى مەملەكەتتىك كىرىس ورگاندارىنا بارىپ، بۇعان دەيىن تولەپ قويعان الىمداردى قايتىپ الۋعا شاقىرامىن»، - دەدى قارجى ءمينيسترى باقىت سۇلتانوۆ مىرزا.

جۇرتتىڭ جىلدار بويى تىرنەكتەپ جيعان زەينەتاقى قورىنداعى ميللياردتتاعان قارجى قايتىپ كەلىپ-كەلمەسى بەلگىسىز بانكتەرگە نەسيەگە بەرىلمەكشى. 

قارجى ءبىرىنشى كەزەكتە كوممەرتسيالىق بانكتەرگە ۇلەستىرىلەتىنگە ۇقسايدى. ءسويتىپ، بيۋدجەت كىرىسى ءوزىنىڭ قۇردىمدىق شەگىنە جەتكەندە، ۇكىمەت تۇرالاپ قالعان ەكونوميكانى الدەندىرمەك. ۇلتتىق بانك الەمدەگى مۇناي باعاسىنىڭ قۇلدىراۋىنان بولعان داعدارىسقا قارسى تۇرۋعا زەينەتكەرلەردىڭ قالتاسىنا تۇسۋىنەن باسقا جول تاپپاعانداي.

قالاي بولعاندا دا، بۇل ماسەلە ءاتۇستى قاراۋعا بولمايتىن، ميلليونداعان سالىمشىنىڭ تاعدىرىنا قاتىستى وزەكتى شارۋا ەكەندىگىن باعامداعانىمىز ءجون بولماق. 

نۇرگەلدى ابدىعانيۇلى

Abai.kz