قازىر تەلەديدار تەتىگىن باسىپ قالساق، گازەت بەتىن اشىپ قالساق، ءوزىمىز ساسىپ قالاتىن دارەجەگە جەتتىك. سەبەبى، ەڭكەيگەن قاريادان باستاپ بەسىكتەگى بالاعا دەيىن، ءتىپتى بازاردا شەمىشكە، شۇلىق ساتىپ تۇراتىن ايەلدەردىڭ وسەگى الداعى دەپۋتاتتىق سايلاۋ بولىپ تۇر.

نارقى باردا پارقى جوق زامانادا دوللارىمىز داندايسىپ، داعدارىستىڭ داۋىلى قىسىپ تۇرعان شاقتا، ءبىزدىڭ ەلدە بۇل ناۋقاننىڭ ءباسى قىزىپ-اق تۇر. جاقىندا جان-جاعىن نۇرلاندىرىپ جۇرەتىن «نۇر وتان» پارتياسى 127 دەپۋتاتتىقتان دامەلىلەردىڭ  ءتىزىمىن ۇسىنىپتى. وحوو، بۇل تىزىمدە كىم جوق دەيسىز عوي؟ شەكەسى شىلقىعان شەنەۋنىكتەن باستاپ، ءانشى قايرات نۇرتاسىڭ دا، سپورتشى يليا ءيلينىڭ مەن سەرىك ساپيەۆ تە، ءتىلىنىڭ تىكەنەگى بار ايبەك اعام ايتقانداي «قۇدايىم بەرمەي كەتكىر بەردىوڭعاروۆ تا» بار. وسىلاردى « ەلىڭ ءۇشىن قۇربان بولاتىن كەزىڭ كەلدى» دەپ وتىز جەتىنشى جىلداعىداي رەپرەسسياعا شاقىرساڭ، بىردە-بىرەۋى كەلمەيدى-اۋ دەپ ويلايسىن كەيدە.

جارايدى، باسىندا جەكەمەنشىك اقىلى بار ادامدا وسىلار دەپۋتات بولۋعا لايىقتى ما دەگەن ورىندى ساۋال تۋىنداۋى مۇمكىن. ەل دەگەندە ەزىلىپ، تىلىنە تەرىسكەن شىققانشا حالىقتىق ماسەلەنى كوتەرىپ جۇرگەن نۇرتاي سابيليانوۆ پەن بەكبولات تىلەۋحاننىڭ ءجونى ءبىر باسقا. ال وليمپيادا ويىندارىندا 230 كەلىنى كوتەرىپ جۇرگەن يليا يلين حالىقتىڭ جۇگىن كوتەرە الار ما ەكەن؟ جيرينوۆسكي سياقتىلار جەرىمىزگە كوز تىگىپ، ۇلتىمىزدى تىلدەپ جاتسا، ساپيەۆ مىرزا جۇدىرىق الا جۇگىرەر مە ەكەن؟ الدە بۇلار كەز – كەلگەن زاڭدى نوكاۋندقا جىبەرىپ ، «اۋىرمايدى جۇرەك» دەپ وتىرىر ما ەكەن؟  ول جاعى ازىرگە بەلگىسىز. بىزگە بەلگىلىسى ونسىز دا  ءمانى كەتىپ بارا جاتقان ءماجىلىستىڭ تەاترعا اينالاتىندىعى. ەندى پارلامەنتكە سۋ جاڭا ارتىستەر كەلىپ، قويىلىمدارى بۇرىنعىدان دا قىزىقتى بولا تۇسەدى.

ايتپاقشى، الگى ءتىزىمنىڭ بەل ورتاسىندا ارقالىقتىڭ ابىرويلى ازاماتى اباي مۇقانوۆ تا بار ەكەن. اباي اعامنىڭ ىسكەرلىگىن، قامقورلىعىن حالىق كورىپ ءجۇر. تەك «ويتەمىن، بۇيتەمىن، وتقا باستى ۇيتەمىن» دەپ حابارسىز كەتپەيدى دەپ سەنەمىز. نە دەگەنمەن ۇلى اقىن اتامىزدىڭ ەسىمىن جامىلىپ ءجۇر عوي. شىنىمدى ايتسام الگى تىزىمگە قاراپ وتىرىپ، مەنىڭ دە دەپۋتات بولعىم كەلىپ كەتتى. نەگە دەيسىز عوي؟ سەبەبى، مەن دە ءارتىسپىن. قايرات نۇرتاستى باسىپ وزباسام دا، ساپيەۆ پەن ءيليننىڭ الدىن وراپ كەتەردەي قاۋقارىم بار جانە وعان ارتىستىك قابىلەتىم دە جەتەدى. ەگەر حالىق قولداپ سايلاۋعا ءتۇسىپ جاتسام، ماعان داۋىس بەرۋدى ۇمىتپاڭىزدار!

شىڭعىس كەنجاليەۆ

Abai.kz