م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كىشى زالىندا 6,7,10,14 اقپان كۇندەرى 90 ماۋسىمنىڭ العاشقى جاڭا سپەكتاكلى «قوشتاسقىم كەلمەيدى…» (رەج. ا.ماەميروۆ) دراماسىنىڭ پرەمەراسى بولادى. قوعامداعى وزەكتى جانە ولمەيتىن پروبلەما اجىراسۋ دەسەك، شاڭىراعىن ۇستاي الماعان وتاعاسى مەنوتباسىن ۇيىتا الماعان نازىك جاندىلاردىڭ تاعدىرى بەينەلەنەتىن سپەكتاكلدىڭ ءبىر ەرەكشەلىگى عاسىرعا جۋىق تاريحى بار تەاتردا ەڭبەك ەتەتىن ارتيستەردىڭ ءۇش بۋىن وكىلدەرىنىڭ ونەر كورسەتەتىندىگى. وسىعان وراي، قويىلىم پرەمەراسىنا قىزۋ دايىندالىپ جاتقان اكتەرلەردى سوزگە تارتقان ەدىك. 

عازيزا  ابدىنابيەۆا، قر ەڭبەك سىڭىرگەن ءارتىسى:

مەنىڭ ءرولىم ەپيزود بولعانىمەن، پەسانىڭ وزەگى ىسپەتتى. «جاقىنىڭدى جاتتاي كۇت، جات جانىنان ءتۇڭىلسىن»، – دەمەكشى، ءومىردىڭ ءمانى – وتباسى د0ەسەك، سپەكتاكلدە كورەرمەن قاۋىمعا عانا ەمەس، شىعارماشىلىق جاندارىنا دا ءومىردىڭ شىندىعىن ايشىقتايتىن كەيىپكەرىم ارقىلى تۋعان اپكەسىنەن تەرىس اينالعان، جالعىزدىقتىڭ جاپاسىن تارتقان جاننىڭ كۇيىنىشى كورىنىس تابادى. جانۇيا – كىشىگىرىم مەملەكەت، ول – ۇلتتىڭ تۇتقاسى. ال بۇگىنگى كۇنگى وزەگىن جارىپ شىققان ءوز پەرزەنتىن دالاعا تاستاۋ – ۇلتتىڭ ازعىنداۋىنىڭ، قادىر-قاسيەتىنىڭ كەتە باستاعاندىعىنىڭ بەلگىسى. نارەستەنى تاستاماق تۇگىل، جەسىرىن قاڭعىتپايتىن، جەتىمىن جىلاتپايتىن قازاق ەدىك. ۇلتتى ۇيىستىراتىن دا، وتباسىن ۇيىتاتىن دا تاربيە. سوندىقتان تاربيەلىك ءمانى زور بۇل درامانىڭ كورەرمەنى دە كوپ بولادى دەپ ۇمىتتەنەمىن.

شىنار جانىسبەكوۆا، اكتريسا:

ماعان ۇسىنىلعان رول – اكتريسا بەينەسى. ونەر ادامىمەن وتاۋ قۇرعان كوزلوۆ شاڭىراعىنىڭ باستى پروبلەماسى – ءومىر مەن ونەردى شاتاستىرىپ العان اكتريسانىڭ جان-دۇنيەسى. ەڭ باستى قيىندىق اكتريسا ءوزىن جاساندىمىن دەپ ويلامايدى، ول – بۇل مەنىڭ شىنايى بولمىسىم دەپ قابىلدايدى.  بىراق، كەيىپكەرىمدى قارالاعىم كەلمەيدى، ويتكەنى ول اتاق قۋىپ، تەك ونەرمەن كەتكەن جان ەمەس، بۇل ومىردەگى ايەل ادامنىڭ پارىزىن ورىنداپ، قاراپايىم جىگىتكە كۇيەۋگە شىقتى، بالاسىن دا دۇنيەگە اكەلدى. سوڭىندا كۇيەۋىنىڭ اجىراسۋعا كەلگەنىنە قاراماستان، جانارىنان وزىنە دەگەن ماحابباتتى سەزىنگەن اكتريسا قاتەلىگىن تۇسىنەدى.  سوندىقتان مەن سپەكتاكلدە كەيىپكەرىمدى اقتاپ الامىن.

ازامات ساتىبالدى، قر ەڭبەك سىڭىرگەن قايراتكەرى:

سەگىز ءتۇرلى وتباسىنىڭ تاعدىرى، داۋ-دامايى ارقاۋ بولعان قويىلىمدا اجىراسۋعا سوت الدىنا كەلگەن سەگىز جۇپتىڭ ءبىرىنىڭ وتاعاسى ميتيا – مەنىڭ كەيىپكەرىم. سپەكتاكلدە ايىرىلىسۋعا بەل بۋعان ەرلى-زايىپتىلار سوت توراعاسىنا سىرلارىن اقتارا وتىرىپ، «وتباسىندا قانداي داۋ تۋدى؟»، «ەرلى-زايىپتىلار نەگە ءبىر-بىرىنەن تەرىس اينالدى؟» دەگەن ماسەلەلەرگە جاۋاپ بەرەدى. قويىلىمنىڭ رەجيسسەرى ا.ماەميروۆپەن جانە «قاس قاعىم» (رەج. ە.نۇرسۇلتان) سپەكتاكلىندەگى ارىپتەسىم ز.كارمەنوۆامەن بىرگە جۇمىس ىستەگەنىم مەنى ءبىر مارقايتىپ تاستادى. اسىرەسە، زارينا ەكەۋىمىزدىڭ ساحنادا ارىپتەس بولماعانىمىزعا ءبىراز ۋاقىت بولعان، قازىر جوعالعان قازىنام تابىلعانداي قۋانىپ ءجۇرمىن. ال سپەكتاكلدە ونەر كورسەتەتىن جاستارعا كەلسەك، ولار بىزدەن اسىرىپ ويناماسا كەم تۇسپەيدى دەپ ەسەپتەيمىن. سەبەبى، پەسانىڭ ءوزى جاستارعا ارناپ جازىلعان.

زارينا كارمەنوۆا، اكتريسا:

«قوشتاسقىم كەلمەيدى…» – ارتيستەن شىنايىلىقتى تالاپ ەتەتىن، ادامنىڭ جان-دۇنيەسىن جالاڭاشتايتىن پسيحولوگيالىق سپەكتاكل. ستسەنوگرافيالىق تۇرعىدان ساحنادا باسى ارتىق دۇنيەسىز، جىلتىراعان كوستيۋمسىز، جالتىراعان گريمسىز قىرىق ارتيست كورەرمەنمەن سىر سۇحبات قۇرادى. سول سەبەپتى  «سىرلاسۋ سپەكتاكلى» دەپ اتالاتىن قويىلىمدا اكتەرلەر ماسكاسىز «شىنايى ومىردە قاندايمىز؟» دەگەن سۇراققا جاۋاپ ىزدەيدى. ءبىز،  ادامدار، گلوبالدىق پروبلەمالاردى تالقىلاعانعا شەبەرمىز. ال ءبىر-ءبىرىمىزدىڭ جان-دۇنيەمىزگە ءۇڭىلىپ كوردىك پە؟! رۋحاني ساباقتاستىقتان، ادامگەرشىلىكتەن ايىرىلىپ قالعان جانى جۇدەۋ پەندەلەرگە اينالىپ بارامىز. ماعان ۇسىنىلعان كەيىپكەرىم كاتيا ەسىمدى قىز دا سۇيگەنىنەن اجىراسۋعا ءبىر تابان جاقىن قالدى. ال سۇيگەنى ميتيا – ا.ساتىبالدى. بۇعان دەيىن «قاس قاعىم» (رەج. ە.نۇرسۇلتان) سپەكتاكلىندە ءبىر-ءبىرىمىزدى جاقسى تۇسىنگەن ارىپتەسىممەن تاعى ساحنالاس بولاتىنىما جانە قويىلىم رەجيسسەرى ا.ماەميروۆپەن جۇمىس ىستەگەنىمە باقىتتىمىن!

سالتانات باقاەۆا، قر «سەرپەر» جاستار وداعى سىيلىعىنىڭ لاۋرەاتى:

«سەرپەر» سىيلىعىن الا سالا كاتيا ەسىمدى كەيىپكەرىمنىڭ بۇيىرعانىنا وتە قۋانىشتىمىن. تەاتردا جۇمىس ىستەگەن بەس جىلدىڭ ىشىندە ءبىر تۇسىنگەنىم، ءار رەجيسسەر ارتيستپەن وزىنشە ءتىل تابىسادى.  ال سپەكتاكلدىڭ رەجيسسەرى ا.ماەميروۆتىڭ باعىتى، تالابى باسقا رەجيسسەرلەرگە مۇلدە ۇقسامايدى. ونىڭ باستى تالابى – شىنايىلىق. ياعني، ىشكى جان-دۇنيەڭنىڭ تەبىرەنىسىن بۇكپەسىز سىرتقا شىعارۋ. سپەكتاكلدەگى كەيىپكەرىم كاتيا ەكەۋىمىز تۇيدەي قۇرداسپىز. مەنىڭ دە ءبىر شاڭىراقتىڭ تۇتقاسىن ۇستاعانىما 5 جىل بولدى. اللا ساقتاسىن، دەسە دە  «باسىما وسىنداي كۇن تۋسا مەن نە ىستەر ەدىم؟» دەگەن وي كەلەدى. مىنە، وسى ماسەلەلەر تۇرعىسىنان وي وربىتە وتىرىپ، كورەرمەندەرمەن سىر سۇحبات قۇراتىن بولامىز.

ابزالبەك اسحاتۇلى، اكتەر:

ا.ۆولودين  دراماتۋرگياعا وزگەشە لەپ، جاڭا درامالار اكەلگەن حح عاسىرداعى جاڭاشىل سۋرەتكەر. ونىڭ پەسالارى سول كەزەڭدەگى كەڭەستىك كەڭىستىكتە عانا ەمەس، ەۋروپا ەلدەرىنىڭ تەاتر ونەرىنە ۇلكەن سىلكىنىس اكەلدى.  م.اۋەزوۆ تەاترىنىڭ  كيەلى ساحناسىندا قويىلاتىن اۆتوردىڭ «قوشتاسقىم كەلمەيدى…» دراماسىندا  ميتيا ەسىمدى جىگىتتىڭ ءرولىن ويناماقپىن. شىعارماشىلىق جولىمدى استانا جاستار تەاترىنان باستاعانىممەن، بۇل  قاراشاڭىراق ساحناسىنداعى العاشقى ءرولىم.  سوندىقتان بويىمدا ۇرەي، قورقىنىش، قوبالجۋ سەزىمدەرى باسىم. سوعان قاراماستان وزىمە ارتىلعان سەنىمدى اقتاۋعا، ءرولىمدى ءساتتى الىپ شىعۋعا بار كۇشىمدى سالامىن. ال ارىپتەسىم – تەاتردا بىرنەشە باستى ءرولدى ويناعان تالانتتى اكتريسا،  «سەرپەر» جاستار وداعى سىيلىعىنىڭ لاۋرەاتى سالتانات باقاەۆا.

ءمولدىر بەكجان

Abai.kz