سولتۇستىك اتلانتيكالىق شارت وداعى كرەملدىڭ 2014 جىلى قىرىمدى باسىپ العانى سەكىلدى ارەكەتتەرىن قولداعان «اقپاراتتىق سوعىسقا» قارسى تۇراتىن بولادى.

بۇل ءۇشىن جاڭا، قۋاتتى بايلانىس ءبولىمى قۇرىلادى جانە قۇپيا مالىمەتتەر جاريالانادى.

ناتو مەن ەۋروپا وداعى رەسەيدىڭ تەلەۆيزيا جانە ينتەرنەتتى ادەيى تەرىس حابار تاراتۋعا پايدالانۋ مۇمكىندىگىنىڭ مولدىعىنا الاڭدايدى. وسىعان وراي، ەو ماسكەۋدىڭ اشىق ۇگىت-ناسيحاتىنا قارسى تۇرۋ ءۇشىن بىلتىر ارنايى ءبولىم قۇردى.

وسىنداي ۇسىنىستارعا سايكەس، ناتو قاۋىپ-قاتەردىڭ تونگەنىن راستايتىن قۇپيا مالىمەتتەردى اشىق تۇردە جاريالاۋى جانە الەۋمەتتىك مەديا مۇمكىندىكتەرىن كەڭىرەك قولدانا باستاۋى مۇمكىن. رەسەي قىرىمعا باسىپ كىرگەننەن كەيىن، ناتو ۋكراينا شەكاراسىندا شوعىرلانعان رەسەيلىك اسكەردىڭ سۋرەتتەرىن كورسەتكەن ەدى. الايدا بۇل سۋرەتتەردى كوممەرتسيالىق جەر سەرىكتەرى تۇسىرگەن ءارى اسكەري وداق ولاردى قىرىمدى تارتىپ العانىنان ءبىر اي وتكەن سوڭ عانا كورسەتتى.

بۇل جوسپاردى ۇلىبريتانيا جانە وزگە دە ەلدەر ماقۇلداعانىمەن، قۇراما شتاتتار ناسيحات رەتىندە قابىلداناتىن كەز كەلگەن ستراتەگيادان قاۋىپتەنەدى.

رەسەي مەملەكەتتىك باق-قا قىرۋار قارجى جۇمساپ، شەتەلدەگى جۇزدەگەن ءجۋرناليستىنىڭ الدىنا ءوزى اگرەسسياشىل سانايتىن باتىستىڭ ناسيحاتىنا الەمدى قارسى قويۋ مىندەتىن جۇكتەپ وتىر. رەسەي سونىمەن بىرگە قازىر ينتەرنەتتە، Twitter سەكىلدى الەۋمەتتىك جەلىلەردە دە بەلسەندى ساياسات جۇرگىزۋدە.

Abai.kz