كەشە «Abai.kz» اقپاراتتىق پورتالىندا جاريالانعان «سايلاۋبەك سايلاۋعا تۇسەتىن بولدى» (http://abai.kz/post/view?id=6460) دەگەن ماتەريال ءارتۇرلى قوعامدىق  پىكىر تۋعىزىپ، ەل-جۇرتتى ءبىراز دۇرلىكتىردى. كەشكى ۋاقىتتا پورتالىمىزعا سالىنعان سول ءبىر الاقانداي عانا سۇحبات تۇنىمەن الەۋمەتتىك جەلىلەردىڭ باس تاقىرىبىنا اينالىپ تالقىعا ءتۇستى. ال، ەندى بۇگىن تاڭ اتپاي مس-ءدىڭ ەكىنشى پروديۋسەرى باقىتجان جۇنىسبەكوۆ حابارلاستى. «سايلاۋعا قاتىستى تاعى دا ايتارىمىز بار ەدى» دەگەن سوڭ، باقىتجانمەن از-كەم اڭگىمەلەستىك. ول ازامات ءبىزدى مس سايلاۋبەكتىڭ وزىمەن دە تىلدەستىردى. مس نە دەدى، سايلاۋ جايلى نە ويلايدى؟ بىلە وتىرىڭىز... مارحابات!

باقىتجان جۇنىسبەكوۆ، مس سايلاۋبەكتىڭ پروديۋسەرى:

– باقىتجان، بىزگە نە ايتپاقشى ەدىڭىزدەر؟ كەشەگى ويلارىڭىزعا الىپ قوسارلارىڭىز بار ما؟

– سايلاۋبەكتىڭ اتىن اتاسى قويماعان. كەشە اسىلان ءسال قاتەلەسىپ كەتىپتى. دۇرىسى سايلاۋبەك دەگەن اتتى اكەسى تاڭداعان. اكەسىنىڭ دوسى 1975 جىلدىڭ 15 ماۋسىمىندا سايلاۋعا قاتىسقان ەكەن. سول سايلاۋدىڭ قۇرمەتىنە سايلاۋبەك دەگەن اتتى يەمدەنىپتى.

– اكەسى ساياساتقا جاقىن بولعان با، سوندا؟...   

– ارينە، ول كىسى ءوز اۋىلىنداعى مەكتەپتىڭ ديرەكتورى بولىپ قىزمەت ەتكەن. كەيىننەن اۋداندىق ءبىلىم بولىمىندە ينسپەكتور بولعان. سايلاۋبەكتىڭ ءبىرجان، باقىتجان، عالىمجان دەگەن باۋىرلارى بار. باۋىرلارىنىڭ ءبارىنىڭ ەسىمىنىڭ سوڭى «جان»-مەن بىتەدى. «بەك» اتانعان جالعىز ساكەڭ عانا.

– ال، كورىپكەل اتاسى جايلى اڭگىمە شە؟ ول كىسى نەمەرەسىنىڭ اتىن قويعانى وتىرىك بولعانى ما؟

– سايلاۋبەك ءوزى سولاي ويلاپ ءجۇرىپتى. مەن ماماسىمەن سويلەستىم. سول كىسى ايتتى، بۇل جايتتى. ءبىز سايلاۋبەكتىڭ ءومىربايانى جايلى كينو ءتۇسىرىپ جاتىرمىز. اللا قالاسا، ءتۇسىرىلىم ناۋرىز ايىندا باستالادى.

– باقىتجان، ەندى ءبىز سايلاۋبەكتىڭ وزىمەن سويلەسە الامىز با؟

– ارينە...

مس سايلاۋبەك ءانشى: «ەلباسىنىڭ ساياساتىن قولدايمىن»

 – سايلاۋبەك، دەپۋتاتتىققا كانديداتتىعىڭدى شىنىمەن ۇسىناتىن بولدىڭ با؟ جالپى، باق پەن الەۋمەتتىك جەلىلەردە ايتىلىپ جاتقان جايتتاردان حابارىڭ بار ما؟

– ارينە، باستاپقىدا دەپۋتات بولۋ ويدا بولدى. بىراق، قازىر اينىپ قالدىم.

– سايلاۋعا ءتۇسۋ ءۇشىن پارتياعا مۇشە بولۋ كەرەك قوي...

– قازىرشە پارتياعا وتپەيمىن.

– بۇگىنگى ساياساتقا كوزقاراسىڭىز قانداي؟

– مەن ەلباسىمىزدىڭ ساياساتىن قولدايتىن اداممىن. سوندىقتان ءتۇرلى ساياسي اكتسيالارعا قاتىسپاعانىم دۇرىس دەپ شەشتىك.

باقىتجان جۇنىسبەكوۆ، مس سايلاۋبەكتىڭ پروديۋسەرى:

– ەندى اڭگىمەنى، باقىتجان، ءسىز جالعاستىرساڭىز... جالپى، كەشە «سايلاۋعا تۇسەمىز» دەگەندەرىڭىز جاي عانا پيار بولعانى عوي؟

– بۇل پياردى تەلىبەكوۆ مىرزا جاساپ بەردى ەمەس پە؟.. سونان كەيىن وزدىگىنەن جالعاسىپ كەتتى. ءبىز كادىمگىدەي ويلانىپ قالدىق. دەسە دە، سايلاۋبەك ءوزى ايتتى عوي، ءبىر شەشىم قابىلدادىق. ءبىز بۇل سايلاۋعا قاتىسپايمىز.

– قاتىسقان جاعدايدا نە بولار ەدى؟

– بۇل جايىندا ەشتەڭە ايتا المايمىن. كەشەگى جاعدايلار بىزگە مۇمكىنشىلىكتىڭ كوپ ەكەنىن كورسەتتى.  شىنداپ كىرىسەتىن بولساق، دەپۋتاتتىققا قول جەتكىزە الامىز. ويتكەنى، قازاقستانداعى ەكى ادامنىڭ ءبىرى ساكەڭدى تانيدى. ساياساتپەن اينالىسىپ جاتساق، ءبىزدى حالىقتىڭ 75 پايىزى قولدايدى دەپ سەنىمدى تۇردە ايتا الامىن.

– «تەلىبەكوۆ مالىمدەمەسى ارقىلى پارلامەنت ءماجىلىسىن مس سايلاۋبەكتىڭ دەڭگەيىنە تەڭەدى» دەگەن پىكىرلەر ايتىلىپ جاتىر. بۇعان نە دەيسىز؟

– تەلىبەكوۆ وزىنە جارناما جاسادى. ودان باسقا تۇك تە ەمەس. ال، دەڭگەي ماسەلەسىنە كەلسەك، سايلاۋبەكتىڭ تانىمى كۇن وتكەن سايىن ءوسىپ كەلەدى. ونەرى دە شىڭدالىپ جاتىر. مۇنداي ۋاقىتتا ول كىسىگە ساياساتتان گورى ونەرىمەن بولعانى، شوۋ بيزنەستە جۇرگەنى ءتيىمدى.

– ساكەڭ «ونەردە» جۇرسە، دەپۋتاتتاردان كوپ اقشا تابادى دەمەكشىسىز عوي.

– دەپۋتاتتان ارتىق تابادى دەۋگە كەلمەيتىن شىعار. دەپۋتاتتاردىڭ مۇمكىندىگى جوعارى عوي. شوۋ بيزنەس پەن ءماجىلىستى سالىستىرۋعا كەلمەيدى. شوۋ بيزنەستىڭ وزىندىك قىرلارى بار. «سايلاۋبەك از اقشا تابادى» دەپ تە ايتا المايمىن.  

– اڭگىمەڭىزگە راحمەت!

Abai.kz