ارازدىق تۋدىردى دەگەن ايىپەن سوتتى بولعان ازاماتتىق بەلسەندى بولاتبەك ءبىلالوۆ «كىناسىن مويىندادى» جانە ءۇش جىلعا بوستاندىعى شەكتەۋ تۋرالى جازا الدى.

ۇكىم وقىلعان سوڭ ول سوت زالىنان بوساتىلدى. بۇعان دەيىن ءوز ءىسىن قىلمىستىق ەمەس، ساياسي دەپ ساناپ كەلگەن  بولاتبەك ءبىلالوۆ استاناداعى سوتتا كىناسىن مويىنداپ، ىسىنە وكىنىش ءبىلدىردى.

ول «ازاماتتىق بەلسەندىلەردىڭ كوپشىلىگى ءوزىنىڭ ءىسىن جەكە مۇددەلەرىنە پايدالاناتىنىن، بىراق قازىر ءوزى ءۇشىن ەڭ باستى قۇندىلىق وتباسى بوپ تابىلاتىنىن تۇسىنگەنىن» ايتقان. سونىمەن بىرگە بەلسەندى ء«وزىنىڭ قىلمىستىق ءىسىن ساياسي ماقساتتا جانە ءوزىن جارنامالاۋ ءۇشىن پايدالانۋعا تىيىم سالاتىنىن» مالىمدەدى. «انتيگەپتيل» توبىنىڭ مۇشەسى، ازاماتتىق بەلسەندى ماقسات ءىلياسۇلى بولاتبەك بىلالوۆكە «ەكەۋىنىڭ ءبىرىن – قوعامدىق-ساياسي ءومىرى مەن وتباسىنىڭ تاعدىرىن تاڭداۋ كەرەك بولعانىن» ايتادى. كىناسىن مويىنداماعان جاعدايدا بىرنەشە جىلعا سوتتالىپ كەتەتىن بولاتبەك بىلالوۆكە اۋىر بولعان شەشىمدى قابىلدايتىندارىن جانە رەنجىمەيتىندەرىن مالىمدەدى.

 «دەموكراتيا جانە ادام قۇقىقتارى ينستيتۋتى» ۇكىمەتتىك ەمەس ۇيىمىنىڭ جەتەكشىسى بولاتبەك ءبىلالوۆ بىلتىرعى جىلدىڭ قاراشاسىندا ۇستالدى. استانا قالاسىنىڭ №2 سارىارقا اۋداندىق سوتى قاراشانىڭ 11-دە ازاماتتىق بەلسەندى ءبىلالوۆتى ەكى ايعا قاماۋ تۋرالى شەشىم شىعاردى. وعان باق ارقىلى الەۋمەتتىك، ۇلتارالىق ارازدىق تۋدىردى دەگەن ايىپ تاعىلدى. 

بولاتبەك ءبىلالوۆ سونىمەن بىرگە، ۇيلەرى سۇرىلگەندە بەرىلگەن وتەماقى كولەمىمەن كەلىسپەگەن استانا قالاسىنىڭ تۇرعىندارىنىڭ مۇددەسىن سوتتاردا قورعاعانىمەن جانە وزگە دە باسپانا ماسەلەلەرى شەشىلمەگەن ازاماتتارعا كومەكتەسكەنىمەن تانىمال. ول قازاقستانداعى بايقوڭىر عارىش ايلاعىنان گەپتيلدى وتىن رەتىندە پايدالاناتىن رەسەيلىك زىمىرانداردىڭ ۇشۋىنا قارسى «​انتيگەپتيل» توبىنىڭ بەلسەندى مۇشەسى.

Abai.kz