دۇنيەجۇزىلىك ەكونوميكالىق فورۋم (WEF) دايىنداعان جاڭا رەيتينگتە تاجىكستان باسەكەگە قابىلەتتىلىك جاعىنان 140 ەلدىڭ اراسىنان 80-ءشى ورىنعا يە بولدى.

تىزىمدە تاجىكستان گۆاتەمالا، ۋكراينا، گرەكيا جانە ارمەنيامەن كورشى تۇر.ءبىر جىل بۇرىن تاجىكستان بۇل رەيتينگتە 91-ءشى ورىندا تۇرعان. دۇنيەجۇزىلىك ەكونوميكالىق فورۋمنىڭ «Global Competitiveness Report 2015-2016» رەيتينگى قاڭتاردىڭ 20-دا جاريا بولدى. ول جاقىندا شۆەيتسارلىق داۆوستا وتكەن فورۋمدا تانىستىرىلدى.

رەيتينگكە سايكەس تاجىكستان 7 باللدىق ولشەممەن 4 باللعا يە بولعان. تاجىكستان جولدارىنىڭ ساپاسى بويىنشا - 82, تەڭىز ايلاقتارىنا قولجەتىمدىلىك جاعىنان 133 جانە قۋات كوزدەرىمەن قامتاماسىز ەتۋ بويىنشا - 106-شى ورىندارعا تابان تىرەگەن.

رەيتينگتە رەسپۋبليكانىڭ مەملەكەتتىك قارىزى 2 ملرد دوللاردان اسقانى كورسەتىلگەن. سونىمەن بىرگە قۇجاتتا تاجىكستانداعى ساۋدانىڭ دامۋىنا توسقاۋىل بوپ تۇرعان 16 كەدەرگى اتالادى. ولاردىڭ قاتارىنا قارجى كوزدەرىنە قولجەتىمدىلىك، سالىقتىڭ كوپتىگى جانە جەمقورلىق جاتادى.  

Abai.kz