وتكەن اپتادا قر پارلامەنتىندە ءۇش فراكتسيانىڭ دەپۋتاتتارى ءبىر اۋىزدان بەسىنشى شاقىرىلىمداعى ءماجىلىستى مەرزىمىنەن بۇرىن تاراتۋ جانە كەزەكتەن تىس پارلامەنت سايلاۋىن وتكىزۋ تۋرالى ۇسىنىس جاسادى. دەپۋتاتتاردىڭ بۇل ۇسىنىسىن مەملەكەت باسشىسى قوس پالاتا سپيكەرلەرىمەن بىرلەسىپ وتىرىپ كۇنى كەشە عانا تالقىلادى.

ءوز كەزەگىندە ءبىر قاتار زاڭ جوبالارىن قابىلداعان، سونىڭ ىشىندە ەلىمىز ءۇشىن ۇلتتىق، مەملەكەتتىك ماڭىزى ەرەكشە بولىپ تابىلاتىن – «كوشى-قون» تۋرالى زاڭ جوباسىن دا ءدال وسى بەسىنشى شاقىرىلىم دەپۋتاتتارى قابىلداپ، ەلباسىنىڭ قۇزىرەتىنە وتكىزگەن ەدى. ال، ساياسي ساراپشىلار التىنشى شاقىرىلىمدا قر ماجىلىسىندە ۇلكەن وزگەرىستەر ورىن الۋى ىقتيمال دەگەن بولجامدار ايتادى. ەلىمىزدىڭ نەگىزگى زاڭ شىعارۋشى بيلىگى تۋرالى ايتقاندا ەسكەرە كەتەتىن تاعى ءبىر جايت بار. تاۋەلسىزدىك العان شيرەك عاسىردىڭ ىشىندە اتاجۇرتقا اياق باسىپ، وتانىمىزدىڭ وركەندەۋ جولىندا ءبىر كىسىدەي ەڭبەك ءسىڭىرىپ جۇرگەن ازاماتتاردىڭ ورنى ەرەكشە. ەلىمىزدىڭ بۇگىنگى ساياساتىنا، مادەنيەتى مەن ادەبيەتىنە، ەكونوميكاسى مەن الەۋمەتتىك تۇرمىسىنىڭ دامۋىنا ۇلەس قوسىپ، قوعامدىق بەلسەندىلىك تانىتىپ جۇرگەن كەشەگى قانداس، بۇگىنگى وتانداس باۋىرلاردىڭ اراسىنان ءماجىلىس سايلاۋىنا ۇمكىتكەر ۇسىنۋ – ءوز كەزەگىندە ماڭىزدى قادام بولارى انىق. بۇگىندە قازاقستان ازاماتى اتانىپ ۇلگەرگەن قانداستارىمىزدىڭ ەلىمىزدىڭ ساياسي وقيعالارىنا بەي-جاي قارامايتىنىن كوزىمىز كورىپ ءجۇر.

وسى رەتتە، «Abai.kz اقپاراتتىق پورتالىنىڭ رەداكتسياسىنا اعىلىپ كەلىپ جاتقان حاتتار دا از ەمەس. سولاردىڭ ءبىرى الماتى قالاسىنداعى بەلسەندىلەردىڭ الداعى سايلاۋدا ءماجىلىست دەپۋتاتتىعىنا قانداستار اتىنان وكىل ۇسىنۋ تۋرالى پرەزيدەنت اپپاراتى جەتەكشىسى نۇرلان نىعماتۋلين مىرزاعا جولداعان حاتىن جاريالاۋدى ءجون كوردىك.

قازاقستان رەسپۋبليكاسى پرەزيدەنتى

اپپاراتىنىڭ جەتەكشىسى

نۇرلان زايروللاۇلى نىعماتۋلينگە

ءوتىنىش

ءبىز، الماتى قالاسىنىڭ جانە الماتى وبلىسىنىڭ تۇرعىندارى، 2015 جىلى قايتالاي وزگەرتۋلەر مەن تولىقتىرۋلار ەنگىزىلگەن «حالىقتىڭ كوشى-قونى تۋرالى» زاڭىنا ەلباسىمىز نۇرسۇلتان نازارباەۆتىڭ 24-قاراشادا قول قويعانىنا ريزاشىلىعىمىزدى بىلدىرەمىز.

ويتكەنى، شەتەلگە تارىداي شاشىلعان قانداستارىمىزدىڭ اتاجۇرتىنا ورالۋىنا تولىقتاي مۇمكىندىك اشىلىپ وتىر. ال، بۇل جايت ەلباسىمىزدىڭ «نۇرلى كوش» باعدارلاماسىنىڭ قارقىن الىپ، ەلىمىزدىڭ دەموگرافياسى مەن ەكونوميكاسىنىڭ قوسا دامۋىنا ۇلەس قوسادى دەپ كامىل سەنەمىز. «ەلگە ەل قوسىلسا – قۇت»، دەيدى اتا-بابالارىمىز. بۇل - ەلباسىمىزدىڭ ساليقالى ساياساتىنىڭ جەمىسى دەپ بىلەمىز.

اسا قۇرمەتتى نۇرلان زايروللاۇلى!

ءبىزدىڭ سىزگە ايتپاعىمىز، الداعى، التىنشى شاقىرىلىم بويىنشا بولاتىىن پارالەمنت سايلاۋىنا «نۇر وتان» پارتياسى اتىنان وتەتىن دەپۋتاتتار قاتارىنا شەتتەن كەلگەن ورالمان، قازىرگى كەزدەگى قازاقستان ازاماتى رەتىندە، وقىعان، ءبىلىمدى، جان-جاقتى، ەلباسىمىزدىڭ «نۇرلى جول» باعدارلاماسىنىڭ ىسكە اسۋىنا اتسالىسىپ، ۇلەس قوسىپ جۇرگەن ازاماتتاردىڭ اراسىنان سۇبەلى ءۇش ازاماتتى دەپۋتاتتىققا تىركەپ، وتكىزۋگە ىقپال ەتۋىڭىزدى سۇرايمىز. الدا بولاتىن التىنشى شاقىرىلىمداعى پارلامەنت سايلاۋىنا 1 ميلليون قانداسىمىز 100 پايىز «نۇر وتان» پارتياسىنا داۋىس بەرۋىنە كەپىل بولامىز.

حاتقا جيىرما ادام قول قويعان.

Abai.kz