جاقىندا قازاقستاندىق بۇقارالىق اقپارات قۇرالدارىندا اتىراۋ وبلىسىنىڭ پوليتسەيلەرى ءۇشىن قۇنى 1,3 ميلليون دوللار تۇراتىن كاتەر مەن ءتورت قاباتتى، ساۋناسى بار عيمارات تۇرعىزىلعانى تۋرالى اقپارات تارادى. ال 8-قاڭتار كۇنى وتكەن وبلىستىق ءماسليحاتتىڭ كەزەكتى سەسسياسىندا وبلىس باسشىسى باقتىقوجا ىزمۇحامبەتوۆ مىرزا اتالمىش عيماراتتىڭ «نۇرسايا» شاعىن اۋدانىندا ءىىد ءۇشىن سالىنعانىن مويىنداعان. بۇل تۋرالى «Abai.kz» پورتالى «اق جايىق» گازەتىنە سىلتەمە جاساي وتىرىپ حابارلايدى.

اق جايىق باسىلىمىنىڭ جازۋىنشا، وبلىس اكىمى ارنايى تاپسىرمالارمەن اينالىساتىن ىشكى ىستەر باسقارماسى قىزمەتكەرلەرىنىڭ جاڭا عيماراتى تۋرالى اڭگىمە وربىتۋدەن باس تارتقان. اكىمنىڭ بار ايتقانى: «بۇل عيمارات ارنايى تاپسىرمالاردى ورىندايتىن پوليتسيا قىزمەتكەرلەرى ءۇشىن سالىنعان». تۇس-تۇستان انتالاعان جۋرناليستەردىڭ ساۋالدارىنان ساسقالاقتاعان اكىم مىرزا قۇپيا قىزمەتكەرلەر تۋرالى قۇپيانى اشپايتىنىن اڭداتقان. ءتىپتى، باسشى مىرزا «مۇمكىن مەن سىزدەرگە، ۇقق تۋرالى دا ايتىپ بەرەتىن شىعارمىن؟!» دەپ دوڭايبات كەيىپ كورسەتكەن. شىنىمەن، «سپەتسوبەكتىنىڭ» سايىپقىراندارى ءۇشىن سالىنعان ساۋنالى 12 پاتەر كىمدەرگە تيەسىلى؟ ءىىد قىزمەتكەرلەرى ءۇشىن سالىنعان بۇل ءۇي وبلىستىق بيۋدجەتتىڭ قارجىسىنا تۇرعىزىلعان ەكەن.

قازىر باق نازارىنا ىلىنگەن عيمارات وبلىس اكتيۆىنە تىركەلگەن. قالا ورتالىعىنداعى «نۇرسايا» شاعىن اۋدانىندا ورنالاسقان ءتورت قاباتتى ءزاۋلىم سارايدا اۋماعى 250 شارشى مەتردى قۇرايتىن 12 پاتەر مەن ەكى ليفت بار. سونىمەن قاتار، عيماراتتىڭ ءبىرىنشى قاباتىندا – تۇرىك مونشاسى (حامام), ساۋنا، باسسەين ت.ب. ورنالاسقان. ال پاتەرلەر – چەح اس ءۇي جابدىقتارى، قىمبات سانتەحنيكا، يمپورتتىق جيھازدارمەن جابدىقتالعان-مىس. باسىلىمنىڭ جازۋىنشا، ەرەكشە جاعدايلار جاسالعان پاتەرلەرگە وبلىس اكىمىنىڭ ءبىر ورىنباسارى، قۇقىق قورعاۋ ورگاندارىنىڭ بارلىق باسشىلارى مەن ەكس-فينپول جەتەكشىسى قونىستانادى.

«اق جايىق» باسىلىمىنىڭ جازۋىنشا، جۋرناليستەر مەن قوعامدىق بەلسەندىلەر نارازىلىق بىلدىرگەننەن كەيىن، وبلىس باسشىسى باقتىقوجا سالاحاتدينۇلى سۇمدىق سوماعا سالىنعان «سپەتسوبەكتىنى» ءوزى بارىپ كورگەن. قارجىلىق قيىندىق قوس وكپەدەن العان الاعاي دا، بۇلاعاي كەزەڭدە، مەملەكەت قارجىسىن ساۋنا سالۋعا جۇمساعان ورىنباسارلارىنىڭ قىلىعىنا تاڭ قالعان وبلىس باسشىسى باقتىقوجا ىزمۇحامبەتوۆ مىرزانىڭ، جۋرناليستەر الدىندا قىزاراتىن ءجونى دە بار ەدى. اكىمنىڭ ورىنباسارلارى مەن مايلى كرەسلوداعى باسشىلاردىڭ ءوزارا تالان-تاراجىعا سالعان پاتەرلەرىن باقتىقوجا مىرزا قاتارداعى قىزمەتكەرلەردىڭ ارمانى بولعان ءۇيدى «ارلان» ارنايى جاساعى مەن «سوبر» ساربازدارىنا ءبولىپ بەرگەن. وسى وقيعادان اتىراۋلىق ىشكى ىستەر باسقارماسى ساباق الماسا كەرەك. وبلىستىق ءماسليحاتتىڭ كەزەكتى سەسسياسىندا ءسوز بولعان تاعى ءبىر ماسەلە – وبلىستىق پوليتسيانىڭ – قۇنى 1,3 ميلليون دوللار تۇراتىن كاتەر ساتىپ الۋى بولدى.

سونىمەن قاتار، پوليتسيا باسشىلارى ميلليون دوللارلىق قايىقتى يتاليادان ارنايى تاپسىرىسپەن الدىرعان. سەسسيادا ءسوز العان باسشىلار: «بۇل جالعىز كاتەر بىزگە جەتپەيدى. تاعى دا الدىرتۋىمىز كەرەك» دەگەن.

ايتا كەتەيىك، «اج» باسىلىمىنىڭ ايتۋىنشا، ءتورت قاباتتى ءزاۋلىم ءۇي مەن ميلليون دوللارلىق قايىق تۋرالى اقپارات پرەزيدەنت اكىمشىلىگىڭ باسشىسى نۇرلان نىعماتۋليننىڭ قۇلاعىنا جەتكەن. ال اقوردا «سروچنو» دەگەن بەلگى قويىپ بەرگەن قۇجاتتارى قر ىشكى ىستەر ءمينيسترى قالمۇحانبەت قاسىموۆقا جونەلتىلگەن. ەندى بۇل ىسپەن قازاقستاننىڭ باس پوليتسياسى ءوزى اينالىساتىن بولادى.

ءتۇيىن

اسا قىمبات دۇنيەلەرگە قۇمار ادىلبەك جاقسىبەكوۆتىڭ جامان ادەتىن اتىراۋلىق باسشىلار دا ۇيرەنىپ العان سىڭايلى. ەستەرىڭىزدە بولسا، استانا اكىمى ايازدا توڭدىرمايتىن ايالدامانى 10 ميلليونعا سالدىرامىن دەپ، ۇياتقا قالعان. ال قازاق حاندىعىنىڭ 550 جىلدىعىنا بولىنگەن بيۋدجەتتى باس پايداسىنا شەشپەك بولعان جامبىل وبلىسى اكىمى قۇنى ميلليون دوللار تۇراتىن قىمبات كولىكتى اكىمشىلىك اكتيۆىنە ساتىپ الدى. جۇرت دۇرلىككەننەن كەيىن، «اكىمشىلىك ءۇشىن ارنايى الدىق» دەپ اقتالعان ەدى، اكىم مىرزا. ەندى بۇلاردىڭ قاتارىنا اتىراۋلىق پوليتسيا باسشىلارى دا قوسىلعان ەكەن. ەلباسىمىزدىڭ ءوزى قارجىلىق قيىندىق كەزەڭىندە قازاقستاندىقتاردى ۇنەمدەۋگە شاقىرعان. ال ەلباسىنىڭ ءسوزىن ەلەمەگەندەر مەملەكەتتىڭ قازىنانسىن وڭدى-سولدى شاشۋىن توقتاتار ەمەس. ال ءسىز «داعدارىس» دەيسىز...

نۇرگەلدى ابدىعانيۇلى

Abai.kz