راۋان شيليكباەۆ

جاقىندا «abai.kz» پورتالىنىڭ رەداكتسياسىنان اراشا سۇراپ، الماتى وبلىسىنا قاراستى الە اۋدانىنىڭ تۇرعىنى شيليكباەۆا اجارگۇل ەسىمدى ايەل كەلدى. زار جىلاپ، زاپىران جۇتقان انانىڭ ايتۋىنشا، جالعىز ۇلىنا قۇقىق قورعاۋشىلار كۇش قولدانىپ، ىستەمەگەن قىلمىستى ارقالاتىپ جىبەرگەن. «سوتتان دا، پوليتسەيلەردەن دە كۇدەرىم ءۇزىلدى»، «ەندى سىزدەردەن كومەك سۇرايمىن» دەپ كەلگەن شيليكباەۆانىڭ شىر-پىر بولاتىن ءجونى دە بار.  تۇلا بويى تۇڭعىشى -  شيليكباەۆ راۋانعا  الماتى وبلىسى ىلە اۋداندىق ىشكى ىستەر ءبولىمىنىڭ قىزمەتكەرلەرى جاساماعان قىلمىسىن موينىنا ىلە سالعان. 

كەيىن قىلمىستىق ءىستىڭ رەسمي تەرگەۋشىسى بولىپ بەكىتىلگەن سمايلوۆ جاڭاباي ەسىمدى پوليتسيا قىزمەتكەرى مەن اسىلبەك نۇربولاتۇلى كەرىمباەۆ دەگەن قاروي اۋلىنىڭ تۇرعىنى راۋانعا اۋىزشا ۋادە بەرىپ، ەگەر قىلمىستى مويىنىڭا الساڭ، مەن كومەكتەسەمىن. جازاڭدى جەڭىلدەتىپ، ءتىپتى شارتتى جازا كەستىرۋگە (ۋسلوۆنو) اتسالىسامىن دەگەن قۇرعاق ۋادە بەرگەن. الايدا سمايلوۆتىڭ سوزىنە سەنبەگەن راۋان، قول قويۋدان باس تارتقان. سودان كەيىن، وقيعا بىلاي ءوربيدى. توپتىق توبەلەس كەزىندە ۇستالعان وزگە دە ازاماتتاردى جيناعان تەرگەۋشى  سمايلوۆ پەن ازاماتتىق بەلسەندى اسىلبەك نۇربولاتۇلى كۇدىكتىلەرگە قولاپاي ۇسىنىس جاساعان. شيليكباەۆا اجارگۇلدىڭ ايتۋى بويىنشا، سمايلوۆتىڭ ۇسىنىسى سوزبە ءسوز: «ەگەر  ارالارىڭنان بىرەۋىڭ كىنانى مويىندارىڭا الاتىن بولساڭدار، قالعاندارىڭ ول جىگىتتى قۇتقارىپ الاسىڭدار. سوتتالعان جىلىن ساتىپ الۋعا بولادى. نەمەسە ستاتياسىن وزگەرتەمىز. ال ەگەر توپپەن كەتەتىن بولساڭدار، جازا اۋىر بولادى»

رەداكتسيامىزدان كومەك سۇراي كەلگەن شيليكباەۆا اجارگۇلدىڭ ايتۋىنشا، وسى وقيعادان كەيىن قۇقىق قورعاۋشىلار كۇش قولدانا باستاعان.  6 ايدا اراشا تاپپاعان اجارگۇلدىڭ ۇلى راۋان اقىرىندا «بارلىق قىلمىستى ءوز موينىنا الامىن» دەگەن قۇجاتقا قول قويىپ بەرگەن. ويتكەنى ول سمايلوۆتىڭ ۋادەسىنە سەنگەن.

قۇقىق قورعاۋشىلاردىڭ اراسىندا قىلمىستىڭ كوبەيىپ بارا جاتقانىن باق ارقىلى ءبىلىپ، كورىپ ءجۇرمىز. مانداتتارىن مالسىنىپ، زاڭدى بەلشەسىنەن باساتىن پوليتسيەيلەر تۋرالى دا از جازىپ جۇرگەن جوقپىز. سوڭعى كەزدەرى وسى تەكتەس بىرسىدىرعى وقيعالار جيىلەپ كەلەدى. قۇقىق قورعاۋشىلاردىڭ قىلمىسكەر اتانىپ، قىلمىسكەرلەردىڭ جابىرلەنۋشىگە اينالۋىنا كىم سەبەپكەر؟

پورتالىمىز ارقىلى اراشا سۇراعان انانىڭ جانايقايىنا بەيجايلىق تانىتا المادىق. ماقساتىمىز دا ايقىن. ىستەمەگەن قىلمىسقا بولا، ناقاق ايىپتالىپ وتىرعان بالاسى ءۇشىن ادىلەتتىك ىزدەگەن اجارگۇلدىڭ ارىزىن قۇزىرلى ورگانداردىڭ قۇلاعىنا جەتكىزۋ.

اجارگۇل شيليكباەۆا:

- ناقتى بۇلتارتپايتىن دالەلدەر جوق. مەن ادىلەتتىك ءۇشىن كۇرەسەمىن. مەن بالامدى بەكەردەن-بەكەر قىلمىسكەرلەردىڭ تابانىنا جىعىپ قويىپ قاراپ وتىرا المايمىن. بۇل توپتىق توبەلەس كەزىندە اتىس بولعان. بىراق، قايتىس بولعان جىگىتتىڭ اتا-انالارى دا مەنىڭ بالامنىڭ كانىلى ەمەس ەكەندىگىن مويىنداپ وتىر. قايتىس بولعان جىگىتتى اتقان – دانيار جانە فارحاد دەگەن جىگىتتەردە تاپانشا بولعان. مەنىڭ بالامنىڭ ساۋساق تاڭبالالارى تاپانشادا بولماعان. كەيىن مەنىڭ بالاما قۇقىق قورعاۋشىلار پسيحولوگيالىق قىسىم جاساعان. سمايلوۆ پەن ونىڭ جانىنداعى كەرىمباەۆ مەنىڭ بالاما «كىنانى سەن موينىڭا ال، ءبىز كومەكتەسەمىز. جازانى «ۋسلوۆنو» ەتىپ بەرەمىز. ءتىپتى ستاتيانى دا جەڭىلدەتۋگە كومەكتەسەمىز. ءۇش ايدان كەيىن بوستاندىققا شىعاسىڭ» دەپ ۋادە بەرگەن. الايدا كورسەتىلگەن قىسىمنان كەيىن بالام سمايلوۆتىڭ ۋادەسىنە سەنىپ، موينىنا العان. كەيىننەن سمايلوۆ ۋادەسىنەن تايقىپ كەتىپ وتىر.  ەندى مەن قازاقستاندىقتاردان كومەك سۇرايمىن. ادىلەتتى جاندار بولسا، اراشا تۇسىڭىزدەر. قۇقىق قورعاۋشىلاردىڭ وزدەرى قىلمىسكەر بولىپ، كىناسى ءالى تولىق دالەلدەنبەسە دە، كۇش قولدانىپ، ءجابىر كورسەتۋى زاڭعا قايشى. زاڭدى بەلشەسىنەن باسىپ، شەنىن ساۋدالاپ جۇرگەن سمايلوۆ سەكىلدىلەر جاۋاپقا تارتىلۋى ءتيىس. مەن اقيقات ءۇشىن اياعىنا دەيىن كۇرەسەمىن.

نۇرلان نۇرمۇقانوۆ (قايتىس بولعان بالانىڭ اكەسى):

- ءبىز دە ءىستىڭ ادىلەتتى شەشىلگەنىن قالايمىز. مەنىڭ ۇلىم قازا تاپتى. مەن دە ءىستىڭ باسى-قاسىندا بولدىم. ەستۋىم بويىنشا، وق اتىلعان قارۋلاردا راۋاننىڭ ساۋساق تاڭباسى مۇلدە بولماعان. دەمەك، بۇل راۋاننىڭ قىلمىسكەر ەكەنىن ءجۇز پايىز دالەلدەمەيدى. تەرگەۋشى جىگىتتىڭ ىستەگەندەرىن بىلدىك. ءىستى تەزىرەك جابۋ ءۇشىن، شيليكباەۆقا مويىنداتا سالعان. مەن ءۇشىن دە شىن قىلمىسكەردىڭ جازاعا تارتىلعانى كەرەك. مەن شيليكباەۆ راۋاننىڭ قىلمىستى ءوز ەركىمەن موينىنا العانىنا سەنبەيمىن. تەرگەۋ جۇمىستارىنىڭ ناتيجەسىن كۇتەمىز. ال تەرگەۋشى سمايلوۆتى اۋىستىرىپ، ورنىنا جاڭا تەرگەۋشى تاعايىنداۋ تۋرالى ۇسىنىسىمىزدى ايتتىق.

نۇرگەلدى ابدىعانيۇلى

Abai.kz