وتكەن دۇيسەنبىدە اۆستراليادا ەل ۇكىمەتى قۇرامىنداعى 43 جاستاعى مۇسىلمان جىگىت ەد حيۋزيك پرەمەر-مينيستر كەۆين رادتىڭ پارلامەنتتىك حاتشىسى بولىپ تاعايىندالعاندا قۇرانعا قول قويىپ انت بەردى. «اۆستراليانىڭ كونستيتۋتسياسىن وسىلاي بۇزعانىڭ قالاي، ءبىز قاشاننان بەرى شاريعات بويىنشا ءومىر ءسۇرۋشى ەدىك» دەگەندەرگە بەرگەن جاۋابىندا حيۋزيك «مۇسىلمان ءدىنىن ۇستانۋشى بولعاندىعىمنان بۇل مەن ءۇشىن ادەتتەگى جاعداي» دەپ مالىمدەدى. ءارى بۇل ءوزىنىڭ قۇقىعى بولۋمەن قوسا، دەموكراتيانىڭ ءبىر بولشەگى ەكەندىگىن ايتىپ، سىنشىلارىنىڭ اۋزىنا قۇم قۇيدى، - دەپ جازادى Facebook الەۋمەتتىك جەلىسىندە بەلگىلى جۋرناليست مارات توقاشباەۆ. 

"وسىدان وي تۋادى: قازاقستان مۇسىلمان ەلى بولا تۇرا بىزدەگى مەملەكەت قىزمەتكەرلەرى مەن دەپۋتاتتار نەگە قۇرانعا قول قويىپ تۇرىپ انت بەرمەيدى؟ انشەيىن انت بەرۋ كونستيتۋتسيانىڭ نەگىزىندە جۇزەگە اسىرىلادى. 24 جىلدا 49 وزگەرتۋ ەنگىزىلگەن قر كونستيتۋتسياسى سىبايلاس جەمقورلىققا شەكتەۋ قويا الماي تۇر. سىبايلاس جەمقورلىقپەن ۇستالعانداردىڭ ءبارى كونستيتۋتسياعا پىسقىرمايدى. ال 1500 جىلدا ءبىر ءارپى وزگەرمەگەن قۇران مەملەكەتتىك قىزمەتكەرلەردى امالسىز ادال بولۋعا جەتەلەر ەدى. قۇرانمەن انت بەرگەن سۋديالار قۇدايدان قورقىپ ءادىل شەشىمدەر شىعارارى ءسوزسىز. مينيسترلەردىڭ ىسىنە بەرەكەت كىرەر ەدى. قوعام ءسويتىپ ساۋىعا تۇسەر ەدى. «زايىرلى ەلمىز» دەسەك تە مەملەكەت دىننەن تۇبەگەيلى اجىراپ كەتە المايدى. سوندىقتان ءدىننىڭ ارتىقشىلىقتارىن نەگە پايدالانباسقا؟" دەيدى جۋرناليست. 

Abai.kz