ءبىزدىڭ وبلىسىمىزعا  ارحيمەد مۇقانبەتوۆ اكىم بولىپ كەلگەلى بەرى جۇمىسىمىز ءونىمدى بولماسا دا، تىرشىلىگىمىز كوڭىلدى بولا باستادى. جاڭا اكىمنىڭ «جاڭالىعى» دا كوپ بولىپ شىقتى. وتكەن ءبىر ماقالامىزدا ارحيمەد بەگەجانۇلىنىڭ وسىنداعى فۋتبول كلۋبىنا بيۋدجەتتەن قانشا قارجى بولىنەتىندىگىن ءتىس جارىپ ايتپايتىن «قۇپياسى» تۋرالى جازعانبىز. ەندى بۇل ازاماتتىڭ ەرەكشە ءبىر "مىرزالىعى" جايلى ايتپاي وتسەك، شىندىققا قيانات جاسارمىز. ونىڭ ۇستىنە بۇل كۇندەرى وڭىرىمىزدەگى ءباسپاسوز بىتكەن وبلىس باسشىسىنىڭ  وسى ءىسى جايلى اۋىزدارىنا سۋ قۇري، جاپپاي جازۋدا.

ءجا، ماسەلەنىڭ مانىسىنە كەلەيىك. ول مىناداي. جاقىندا وبلىس اكىمىنىڭ بلوگىنا تاران اۋدانىنىڭ تۇرعىنى وكسانا دەگەن كەلىنشەكتەن دۇعاي سالەم ارقالاعان ءوتىنىش حات كەلىپ تۇسەدى. وندا بۇل كىسى بالاسىنىڭ «شوتلاند قالقانقۇلاعى» اتتى اسىل تۇقىمدى مىسىقتى اڭساپ جۇرگەندىگىن، ال ونى الىپ بەرۋگە مۇمكىندىگىنىڭ جوقتىعىن، ويتكەنى ۇيىندە تەك كۇيەۋى عانا جۇمىس ىستەيتىندىگىن، مىنە وسىعان بايلانىستى الگى مىسىقتى الىپ بەرۋدى اكىمنەن وتىنەتىندىگىن جازىپتى. ارحيمەد وبالى نە، بۇل تىلەككە ىلە-شالا جاۋاپ قايتارىپتى. اكىم مىسىق الۋ دەگەن شارۋاعا بيۋدجەتتەن اقشا قارالمايتىندىعىن، الايدا بالا ءۇشىن وعان ءوز قالتاسىنان اقشا شىعارىپ ساتىپ الاتىندىعىن ايتىپ، قۋانتىپتى. اكىمنىڭ بۇل ىسىنە، ارينە، ءبىز دە قۋاندىق. ۇلكەن ۇلىقتىڭ ءبىر بالانىڭ مەسەلىن قايتارماي، جاقسى سىيلىق جاساعاندىعى ازاماتتىق ەكەن دەستىك.

الايدا، ءبىزدى وسى ماسەلەدەگى ءبىر جايت الاڭداتا بەرەدى. بۇل جەردە اڭگىمە "مۋسكا" (مىسىق)  تۋرالى ەمەس. ول وتە اسىل تۇقىمدى، ەليتا توبىنا جاتاتىن اسا قىمبات مىسىق. قازىرگى باعاسى اتتاي 60 مىڭ تەڭگە. سوندا دەيمىز-اۋ، بالانىڭ ايتقانىن ىستەي بەرىپ، شولجاڭداتۋدىڭ دا رەتى بار ەمەس پە؟ اقشادان تارشىلىق كورىپ جۇرسەڭ، قىمبات دۇنيەنى اڭساماي-اق كورپەڭە قاراپ كوسىلگەن ءجون ەمەس پە؟ قازىرگى تاڭدا ۇيدە جالعىز عانا كۇيەۋى جۇمىس ىستەپ جۇرگەن جانۇيا از با؟ سوسىن، ءتىپتى، وسى مىسىقتى اكىم ساتىپ الىپ بەرگەن جاعدايدا دا ونى كۇتىپ ۇستاۋ وڭاي  شارۋا ەمەس. بۇل مىسىق اناۋ-مىناۋ تاماقتى جەمەيدى، وعان ەرەكشە كۇتىم كەرەك. ال بۇل دەگەنىڭ دە از اقشا ەمەس. ونى دا اكىم بەرە مە؟

ارحيمەدتىڭ بۇل "مىرزالىعىنا" اۋزىنان سۋى قۇرىپ تاڭ قالعان جەرگىلىكتى ءباسپاسوزدىڭ ەڭ بولماسا «جۇرتتىڭ سۇراعان نارسەسىنىڭ ءبارىن بەرە بەرگەن ءجون بولا قويار ما ەكەن؟» دەگەن ءدۇدامال سۇراق قويا الماي جۇرگەن جايى بار. قايتسىن ەندى، تاۋەلدى جۋرناليستەردەن نە كۇتۋگە بولادى؟ سۇراق تۇگىلى، وزگەشە ءبىر پىكىر ايتۋدىڭ ءوزى قاۋىپتى جەردە بۇعان تاڭ قالۋعا دا بولماس.

جارايدى، ارحيمەد مىرزالىعىن جاساي بەرسىن، قايدا جۇمساسا دا ءوز اقشاسى عوي. الايدا، وبلىسىمىزدا اۋرۋ بالاسىنا وپەراتسيا جاساۋعا اقشا تابا الماي قينالىپ جۇرگەن جانداردىڭ جەتەرلىك ەكەندىگى دە وتىرىك ەمەس. اتتاي 60 مىڭ تەڭگە تۇگىلى اينالدىرعان 4-5 مىڭ تەڭگەنىڭ ويىنشىعىن سىيلاسا توبەسى كوككە جەتەتىن تاقىر كەدەيدىڭ بالالار دا جەتىپ ارتىلادى. ءتىپتى،  بار قىزىقتان قۇر قالعان جەتىمدەر دە تابىلادى. مىنە، وسىلاردىڭ جايىن ءبىر كەز ويلاپ قويعان ارتىق ەمەس شىعار. بۇلارعا اسىل تۇقىمدى مىسىق ەمەس، جارىمجان كوڭىلىنىڭ جىرتىعىن جامايتىن جىلى ءسوزدىڭ ءوزى دە جەتەدى. اكىمىمىز مۇنى دا نازار دان تىس قالدىرماس دەگەن ۇمىتتەمىز. ايتپەسە، بىرەۋگە كول، بىرەۋگە ءشول بولۋ —الالاۋدىڭ الا بوتەن كورىنىسى ەكەندىگىن ەشكىم دە جوققا شىعارا الماس.

P.S. ايتپاقشى، قاراپايىم جۇرتقا قىمبات مىسىق سىيلاۋ مىنا كورشىمىز — رەسەي مەملەكەتىنىڭ باسشىسى پۋتين مىرزانىڭ جاقسى كورەتىن ءىسى ەكەن. رەسەي پرەزيدەنتى بىلتىرعى جىلى ءدال وسىنداي مىسىقتى مۋرمانسك وبلىسىنىڭ تۇرعىنى، 10 جاسار ۆەرونيكا دەگەن قىز بالاعا سىيعا تارتىپتى. وسى ورايدا قازەكەمنىڭ «سىنىقتان باسقا نارسەنىڭ ءبارى جۇعادى» دەگەن ماقالى ەسكە تۇسەدى.

مۇراتبەك داۋرەنۇلى، قوستاناي

Abai.kz