Brent ماركالى مۇناي لوندوننىڭ ICE بيرجاسىندا كەشە 6,7 پايىزعا قۇلدىراپ، باررەلى 28, 95 دوللار بولدى. مۇنايدىڭ بۇلايشا شۇعىل ارزانداي باستاۋىن ساراپشىلار يران يسلام رەسپۋبليكاسىنا سالىنعان سانكتسيانىڭ اياقتالۋىمەن تۇسىندىرەدى. تاعى ءبىر سەبەپ: ءىرى كولەمدە ەنەرگيا تۇتىنۋشى قىتاي ەكونوميكاسىنىڭ السىرەۋىنە بارىپ تىرەلەتىن كورىنەدى.  وسى ءبىر جۇمانىڭ ىشىندە مۇنايدىڭ باعاسى 10 پايىزعا دەيىن ارزانداپ ۇلگەردى. جىل سوڭىنا دەيىن تاعى دا ارزانداي ءتۇسۋى مۇمكىن دەگەن بولجامدار بار. مۇناي ءوندىرۋشى ەلدەر، سونىڭ ىشىندە سولتۇستىكتەگى كورشىمىز – رف «قارا التىن»  قۇنىنىڭ توقتاۋسىز قۇلدىراۋىنان ءىش تارتىپ، «قيىن كۇندەر الدا» دەگەندى ايتىپ قاۋىپتەنەدى. رف-نىڭ قارجى ءمينيسترى انتون سيلۋانوۆ 2015 جىلى 12 جەلتوقساندا ءباسپاسوز وكىلدەرىمەن جۇزدەسۋ ۇستىندە: «مۇنايدىڭ ءبىر باررەلى 30 دوللاردان دا تومەندەۋى ىقتيمال. سوندىقتان بارلىق قيىندىقتارعا دايىن بولۋىمىز كەرەك»، - دەگەن ەدى.  ال، انتون سيلۋانوۆتىڭ قازاقستاندىق ارىپتەسى باقىت سۇلتانوۆ: «ۇكىمەت بارلىق ماسەلەنى نازاردا ۇستاپ وتىر. مۇناي باعامى باررەلىنە 30 دوللار، 20 دوللار جانە ودان تومەن بولعان جاعدايدا ستسەناريلەردى جۇزەگە اسىرۋدى قاراستىرۋ كەزەڭىندەمىز. سوندىقتان بىزدە قارجىلاندىرۋ بويىنشا ەشقانداي قاۋىپ جوق»، - دەيدى.

سونداي-اق، قر ۇكىمەتى الەۋمەتتىك سالاعا جۇمسالاتىن قارجى-قاراجاتتىڭ دا قىسقارمايتىندىعانا سەندىرۋدە.

«شىعىستاردىڭ نەگىزگى بولىگى -  الەۋمەتتىك تولەمدەر. 2015 جىلعا قاراعاندا 2016 جىلى ونىڭ ۇلەسى 39 پايىزدان 40 پايىزعا دەيىن ءوستى. ارينە، مەملەكەتتىك اپپاراتقا قاتىستى بولىكتى وڭتايلاندىرۋ بويىنشا بەلگىلى ءبىر رەزەرۆتەر بار، الايدا ەشقانداي دا الەۋمەتتىك مىندەتتەمەلەر قىسقارتۋعا جاتپايدى»،-دەدى قارجى ءمينيسترى.

قازاقستان 2015 جىلدى 1,2 پايىز ەكونوميكالىق وسىممەن اياقتاعان كورىنەدى. كەلەر جىلعى ءوسىم 2 پايىزدى قۇراۋى ىقتيمال.

قازاقستان ەكونوميكاسىنىڭ لوكوموتيۆى – مۇناي ەكسپورتى بولعانىمەن بارلىق تىرشىلىك، ارينە، تەك مۇنايعا عانا تىرەلىپ تۇرعان جوق. قازاقستان الەمدەگى ەڭ ستراتەگيالىق ءونىم ەسەبىندەگى قىمبات دۇنيە – استىقتى سىرتقا ساتا الاتىن ەل. اگرارلىق سالادا دا الەۋەتى باسىم. بەرى دەگەندە ءوزىن-ءوزى ازىق-تۇلىكپەن قامتاماسىز ەتە الاتىن مۇمكىندىگى زور. بۇل جايتتى سولتۇستىك وبلىستاردى ارالاپ شىققان ارنايى ساپارىندا پرەزيدەنت نازارباەۆ تا ەلدىڭ ەسىنە سالعان ەدى. «ەڭ باستىسى ءىشىم جەمنەن تارىقپايمىز. ازىق-تۇلىك جەتكىلىكتى. قارىن توق».

الايدا، بۇگىنگى جۇرت قارىنىنىڭ توقتىعىنا عانا مالدانىپ جۇرە المايدى. وعان تابىستى جۇمىس، جايلى تۇرمىس، الاڭسىز ءومىر، اشىق قوعام قاجەت. كوررۋپتسياسىز بيلىك، قازاق جەرىنىڭ ەن بايلىعىن ەنشىلەپ الىپ ەسىرگەن توپتىڭ توقپاعىنان ازات، اكىمشىلىك كەدەرگىلەرى كەم، ەركىن قيمىلداۋعا ەرىك تۋدىرىپ وتىراتىن مەمەلەكەت كەرەك. وقۋ-ءبىلىم كەرەك. ەرتەدەن قارا كەشكە دەيىن مۇنايدىڭ باعاسى مەن داعدارىستى ايتىپ كۇڭىرەنبەي، ەل رۋحىن سەرپىلتىپ وياتاتىن سەرگەك وي، سەرەك قيمىل كەرەك. قالعانى... قالعانى ءومىردىڭ اعىسىمەن رەتتەلە جاتادى.

سونىمەن، مۇنايدىڭ باعاسى 28 دوللارعا قۇلادى. قۇلاسىن. قيراپ قالمايتىن شىعارمىز؟..

Abai.kz