25 جىلدا (90-شى جىلدى قوسا ەسەپتەگەندە) قازاق پارلامەنتى جەتى رەت سايلانىپتى... سونىڭ تورتەۋى (ۇمىتپاسام) مەزگىلىنەن بۇرىن تاراتىلدى... مۇنداي ساياسي ءۇردىس قازاقستان ءۇشىن قالىپتى داستۇرگە ەنگەندىكتەن بە، پارلامەنت ءماجىلىسى دەپۋتاتتارىنىڭ بۇگىن ءوزىن-ءوزى تاراتۋ تۋرالى ۇندەۋ جاريالاعانىنا ەشكىم پالەندەي ءمان بەرمەدى...

ونىڭ ۇستىنە "جاڭا دەپۋتاتتىق كورپۋس جاساقتالادى ەكەن" دەگەن اڭگىمە كوپتەن ءجۇر... دە-يۋرە 5-ءشى شاقىرىلىمداعى پارلامەنت دەپۋتاتتارى، "بيۋدجەت تۋرالى" زاڭدى باس شۇلعي قابىلداي سالاتىن، ۇكىمەتتىڭ ايتقانىنا كونگىش، ءماسىموۆتى بىرنەشە قايتارا پرەمەرلىككە بەكىتكىش، ءارى ەۋرازيالىق وداقتى قۇرۋعا ىقپالدى بولعان پارلامەنتتىك توپ رەتىندە مەنىڭ ەسىمدە قالدى.

ال ەگەر وبەكتيۆتى ايتار بولساق، دەپۋتاتتار كەز-كەلگەن زاڭ جوباسىن قابىلداي سالدى، قوعام ومىرىنە ارالاسپادى دەۋگە اۋزىم بارمايدى. پارلامەنت ىشىندە ءاربىر زاڭدى قابىلدار كەزدە قىزۋ پىكىرتالاستار بولىپ جاتتى. ءاربىر زاڭ ءجىتى زەرتتەلدى. قوعامدىق پروتسەسستەرگە بەلسەنە ارالاسقان مىقتى حالىق قالاۋلىلارى بولعانىن ايتۋ كەرەك. سەيتماعانبەتوۆا گۇلنار، قۋانىش سۇلتانوۆ، ايسينا مايرا، ورازكۇل اسانعازى، مەيرام بەگەنتاەۆ، كامال بۇرحانوۆ، نۇرلان جازىلبەكوۆ، نۇرلان ءابدىروۆ،نۇرعالي ءاشىم، مەرۋەرت قازبەكوۆا، ازات پەرۋاشەۆ، ومارحان وكسىكباەۆ، رامازان سارپەكوۆ، ايتكۇل ساماقوۆا، سابيليانوۆ، گۇلجان قاراقۇسوۆا، تولەگەن يبراەۆ، ماۋلەن اشىمباەۆ، تاسبولاتوۆ اباي، ايگۇل سولوۆەۆا، الماس تۇرتاەۆ ساياسي بەلسەندىلەر قاتارىنان كورىندى. ال ەندى العان جالاقىسى مەن پاتەرىنە رازى بوپ، دەپۋتاتتىق مانداتىنا مارقايىپ جۇرەتىن "سەن تيمەسەڭ - مەن تيمە بادىراق كوز" دەپۋتاتتار دا از ەمەس بولدى...

ەقىۇ-نا قازاقستان توراعالىق ەتكەن تۇستا قانات ساۋداباەۆ قاتتى جۇمىس ىستەپ قويدى ما، دەپۋتات رەتىندە كولەڭكەسىن ىزدەپ تاپپاي قالدىق. دەپۋتاتتىق قىزمەتىنە دەيىن "ۇلتىم" دەپ كەۋدەسىن ۇرعىلاپ وسى ارقىراپ جۇرەتىن باقىتبەك سماعۇل اعامىزدىڭ زور داۋىسى اقىرىن عانا ەستىلىپ، باسەڭسي ءتۇستى. ء"اسيما بيمەندينا مەن ۇسەنگەلدى مەدەۋوۆ دەگەن دەپۋتاتتى بىلەسىزدەر مە" دەسەم، ءبارىڭىزدىڭ ءبىر اۋىزدان "جوق" دەيتىندەرىڭىزدى شامالاپ تۇرمىن... تاڭىربەرگەن بەردوڭعاروۆتىڭ ءتاڭىر بەرگەن دەپۋتاتتىق قابىلەتىن شامالاپ قالدىق. فاميليالاردى مونشاقتاتىپ تىزە بەرۋگە بولادى، بىراق، ودان پايدا بار ما؟

سونىمەن، حوش! تاۋەلسىزدىگىمىزدىڭ باستاۋ بۇلاعىندا جۇمىس ىستەگەن 90-94 جج، 94-95 جج ءبىر-اق جىل قىزمەت اتقارىپ، اقىرى "ماڭدايىمىزعا سىيماي" تاراتىلىپ كەتكەن ەكى شاقىرىلىمداعى دەپۋتاتتاردىڭ "جان الىسىپ-جان بەرىسكەن" جۇمىسى ەل ەسىندە... وڭكەي مىقتى تۇلعالاردان قۇرالعان توپتىڭ "ينتەللەكتۋالدى پارلامەنت" اتانۋى سوندىقتان شىعار... دەموكراتيا تۋرالى قۇرعاق ءسوز كوپ بۇگىندە... ناعىز دەموكرات دەپۋتاتتار دەپ سولاردى ايت! وتاندىق پارلامەنتاريزم الدا كەمەلدەنە تۇسەر... 25 جىل تىم از ۋاقىت قوي!

دەسە دە، الدا قازاقتى تالاي قوعامدىق ماڭىزدى رەفورمالار كۇتىپ تۇر... ال ونى پارلامەنت سەكىلدى مىقتى ساياسي ينستيتۋتسىز اتقارۋ مۇمكىن ەمەس... ول ءۇشىن قارجى-ەكونوميكالىق ساۋاتى بار، رۋحى مىقتى، ۇلتتىڭ ءسوزىن سويلەيتىن تۇلعالار سايلاۋعا ءتۇسۋى قاجەت...

دينا ەلگەزەك

Facebook-تەگى پاراقشاسىنان