كونگرەسس الدىندا جىل سايىنعى جولداۋىن جاريالاعان وباما الەمدە قانداي دا ءبىر تۇيتكىل تۋىنداعان جاعدايدا ەلدەر ماسكەۋ نەمەسە بەيجىڭگە ەمەس، اقش-قا ارقا سۇيەيتىنىن ايتتى.

اقش پرەزيدەنتتىگىنە رەسپۋبليكالىق پارتيادان بىرنەشە ۇمىتكەر بۇعان دەيىن «يسلام مەملەكەتىنە» قارسى كۇرەستە يراك پەن سيريا اۋماعىنداعى لاڭكەستەردىڭ شەپتەرىن ۇدەتە بومبىلاۋ سياقتى قاتاڭ شارالار قولدانۋعا شاقىرعان بولاتىن. ء«ۇشىنشى دۇنيەجۇزىلىك سوعىس تۋرالى داۋرىقپا ءسوز يم لاڭكەستەرىنە وتە ءتيىمدى، — دەدى وباما. — قارۋلى كولىكتەرىندە وتىرعان نەمەسە ۇيلەرىندە شابۋىل جاساۋدى جوسپارلايتىن سودىرلار ادامدارعا ۇلكەن قاۋىپ توندىرەدى، سوندىقتان ولاردىڭ جولىن كەسۋ كەرەك. بىراق ولار اقش-تىڭ مەملەكەتتىلىگىنە قاۋىپ توندىرەتىندەي قاۋقارعا يە ەمەس».

وباما وندايلاردى كىسى ءولتىرۋشى، جانكەشتىلەر دەپ اتاۋدى جانە ولاردىڭ ارقايسىسىن ىزدەپ تاۋىپ، كوزىن جويۋدى ۇسىندى. وبامانىڭ پىكىرىنشە، كونگرەسس يم-ءدى جەڭگىسى كەلسە، اقش پرەزيدەنتىنە «يسلام مەملەكەتىمەن» كۇرەستە تولىق وكىلەتتىلىك بەرەتىن قارار قابىلداۋى كەرەك. سونىمەن بىرگە ول، اقش داعدارىستان توقىراعان ءاربىر ەلدى قالپىنا كەلتىرۋگە ارالاسا الاتىنى تۋرالى ويدان اۋلاق بولۋدى ۇسىندى. وباما مۇنداي ساياسات امەريكالىقتاردىڭ تۇبىنە جەتەدى دەپ سانايدى.

اbai.kz