مويىندايىق، قازىرگى جۋرناليستەر، قازاقتىلدى-ءورىستىلدى دەپ بولمەي-اق قويايىن، وزدەرى بارماعان، قاتىسپاعان، ورتاسىندا بولماعان وقيعا تۋرالى كابينەتتە وتىرىپ وي قورىتۋدىڭ شەبەرى بولىپ الدى. ايدىن ايىمبەتوۆتىڭ بايقوڭىردا بەتىنە "قاسيەتتى سۋ" شاشىلعانىن ءبارىمىز كورىپ، داۋرىقتىق - الايدا ونىڭ عارىشقا قۇران الىپ ۇشقانىن كەلگەن سوڭ عانا بىلدىك. الماس وتەشەۆ پەن جاسۇلان قىدىرباەۆ قولدا تۇرعان التىندى بەلورۋسقا ۇستاتىپ جىبەرگەنىن كورىپ تۇرىپ، تورەشىنى كىنالادىق - الايدا باپكەرلەردىڭ تاكتيكالىق ۇتىلىسىن مويىنداعىمىز كەلمەدى. وسى ەكى ازاماتتىڭ دوپينگ داۋى تۋرالى تۇسىنىگىمىز دە وتە ءۇستىرت. "اقتوبەنىڭ" لەگيونەرلەرى 67-74 مىڭ ەۋرو الاتىنىن بۇگىن بىلگەندەي شۋلاي جونەلدىك - كوزىقاراقتى جۋرناليسكە ولاردىڭ سونداي تابىسى بار ەكەنى باياعىدان بەلگىلى بولاتىن. قوجاعاپانوۆ ۇلتتىق قۇراما باپكەرىن تاعايىنداۋدى داۋىسقا سالۋدى ۇسىنىپ ەدى - ويباي، ولگەن اكەمىز كوردەن كەنەت تۇرىپ كەتكەندەي توبە شاشىمىز تىك تۇردى. ورداباەۆ، گۋرمانداردان باستاپ قىجىرتىپ جاتىر. ول باستامانى قوجاعاپانوۆ ەمەس، ارىپتەسىمىز امانكەلدى سەيىتحان ۇسىنعانىن، ونى قفف پرەزيدەنتى قولداعانىن، ءسويتىپ، ەكى ساۋالناما ۇيىمداستىرۋدى ۇسىنعانىن باسقانى قويىپ، سول جەردە وتىرعان ءورىستىلدى ارىپتەستەرىمىزدىڭ ءوزى دەرەۋ بۇرمالاپ، سايتتارىنا سالا باستادى. سويتسەك، بۇكىل الەم قازىر "قۋىرىلىپ، بۋى باسىلماعان" وسىنداي "قۋىرداق-اقپاراتتارعا" شولدەپ وتىرادى ەكەن. سالقىنقاندى دەگەن "ەۋروسپورتتىڭ" ءوزى باپكەرلىككە كوبزون مەن بوراتتى ۇسىنىپ، ءوز قيىنا ءوزى تۇنشىعىپ، راقاتتانىپ كۇلىپ جاتىر... كۇلىڭدەر! 
قىسقاسى، الەمدە بايسالدىلىق پەن سابىرلىلىق جوق. سول دۇرمەككە ىلەسىپ، تارتا بەرەيىك، تارتا بەرەيىك. وتىرىك اقپاراتتى جەڭسىك اسىنداي قابىلداپ، حالقىڭىز كەرى شەگىنە بەرسىن، شەگىنە بەرسىن. ءسويتىپ، ءححى عاسىردا سايلاۋبەكتى جىل ادامى دەپ تانىپ، نيۋشانىڭ تىرتيعان شولاق شالبارىن اڭگىمە عىپ، اجەسى نەمەرەسىنە ءانانديدىڭ تاعدىرىن ايتىپ جىلاپ... وتىرا بەرسىن... وزعان ەلگە ىلەسە ءبىلۋ دە باقىت ەكەن عوي...

ەسەي جەڭىسۇلى

"فەيسبۋكتەگى" پاراقشاسىنان الىندى