اۋىل شارۋاشىلىعى مينيسترلىگىندە سۋ رەسۋرستارى كوميتەتىنىڭ 2015 جىلدى قورىتىندىلاۋعا ارنالعان القا وتىرىسى ءوتتى. وندا كوميتەت باسشىسى يسلام ابىشەۆ رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ەسكەرتپەلەرىنە جاۋاپ بەردى دەپ جازادى http://www.qazaquni.kz سايتى قازااقپارات اگەنتتىگىنە سىلتەمە جاساي وتىرىپ.

«بىزدە بۋحگالتەرلىك جۇمىستاردا ولقىلىقتار بولدى، الايدا بۇل كوميتەت مۇلدەم بۋحگالتەرياسىز جۇمىس ىستەدى دەگەندى بىلدىرمەيدى. بىزدە بالانس تولىعىمەن جۇرگىزىلەدى، دەبيتورلىق-كرەديتورلىق بورىشتار تولىق جاسالادى، قازىناشىلىق جۇمىس ىستەپ تە جاتىر. جالپى كوميتەت 20 جىلدا بىرىنشە رەت تەكسەرىلىپ تۇرعان جوق قوي»، – دەيدى يسلام ابىشەۆ (سۋرەتتە). ونىڭ ايتۋىنشا، باقىلاۋ نىسانىنا ىلىككەن جالپى سوما 74 ملرد. تەڭگەنى قۇرايدى، ال بۇزۋشىلىقتار انىقتالعان سوما 73 ملرد. تەڭگە بولىپ وتىر. سۋ رەسۋرستارى كوميتەتىنىڭ باسشىسى بۇنداي جاعداي فورمالدى ەرەجەلەرگە بايلانىستى تۋىنداعانىن العا تارتادى.

«نەگىزىنەن بۇزۋشىلىقتاردىڭ باسىم بولىگى پروتسەدۋرالىق سيپاتتا بولىپ تابىلادى. ماسەلەن، 73 ملرد. تەڭگەنىڭ 36 ملرد. تەڭگەسى بويىنشا اتقارىلعان جۇمىستاردى قابىلداۋ اكتىسىنە «قازسۋ شارۋاشىلىعى» قىزمەتكەرلەرىنىڭ قول قويعانى ايتىلادى، ال بۇل مەكەمە سۋ رەسۋرستارىنا قاراستى كومپانيا. ەندى ءبىز وزىمىزگە قاراستى مەكەمە قىزمەتكەرلەرى نەگە قول قويۋعا بولمايدى دەپ سۇرايمىز، ويتكەنى، ولاردا ءتيىستى سەرتيفيكاتتار بار عوي. ياعني، ءبىز تاپسىرىس بەرۋشى رەتىندە ءوزىمىزدىڭ فۋنكتسيامىزدى ولارعا بەرىپ وتىرساق، ولارعا جەرگىلىكتى جەرلەردە اتقارىلعان قۇرىلىس جۇمىستارىنىڭ ساپاسىن باقىلاپ، ونى راستاۋىنا نەگە بولمايدى؟ ءبىز بۇنى دۇرىس دەپ سانامايمىز»، – دەدى كوميتەت باسشىسى.

ونىڭ ايتۋىنشا، كوميتەتكە قاراستى جىلىنا ەڭ كەمى 100 نىساننىڭ قۇرىلىسى جوندەۋدەن ءوتىپ، كەيبىرى جاڭادان سالىنادى. ال ول نىساندارىنىڭ بارلىعىن ەكى ادام ارالاپ، قۇرىلىس ساپاسىن باقىلاپ، سوعان قاتىستى قۇجاتتارعا قول قويۋى دا مۇمكىن ەمەس. وسىعان بايلانىستى، كوميتەت باسشىسى قۇجاتقا قول قويۋشىلار ەڭ الدىمەن جۇمىس ساپاسىنىڭ قالاي اتقارىلعانىن باقىلاۋى كەرەكتىگىن العا تارتادى. «جالپى مۇنداي قۇجاتتارعا جەرگىلىكتى جەرلەردە قول قويۋ تاجىريبەسى 2012 جىلدان باستاپ جۇزەگە اسىپ كەلەدى. سودان بەرى ءدال وسى قۇرىلىستار ساپاسىنا قاتىستى ەشقانداي دا ءبىر پروبلەمالى نىسان بولعان ەمەس، ال بۇرىن ولاردىڭ سانى 40-قا جۋىقتاعان ەدى»، – دەيدى يسلام ابىشەۆ.

اباي-اقپارات