ايەلىم تەلەارنادا ىستەيدى. سىزدەر ونىڭ ءسوزىن تۇسىنەسىزدەر مە، بىلمەيمىن، ءوزىم و باستا «وسى نە ايتتى؟» دەپ، اڭ-تاڭ بولىپ ءجۇردىم. كەشە ەكەۋمىز جاپ-جاقسى ءشاي ءىشىپ وتىرعانبىز.

نەسيەنىڭ زارى ويىما ءتۇسىپ كەتىپ:
- وسى ءبىزدىڭ كرەديت قاشان بىتەتىن ەدى؟ – دەدىم. سويتسەم:
- ۇستىمىزدەگى جىلدىڭ اياعىندا، – دەيدى. «دۇرىس تۇسىنبەي قالدىم با؟» دەپ قايتا سۇرادىم.
- ءۇس-ءتى-ءمىز-دە-گى!
- سوندا ول قاي جىل؟
- بيىل! بيىل بىتەدى. نە بولعان ساعان؟ 
كۇيىپ كەتتىم. 
- ونى ۇستىمىزگە شىعارماي-اق، بيىل دەپ ايتساڭ بولماي ما؟ سوندا وتكەن جىلدى نە دەيسىڭدەر؟ ول دا ۇستىمىزدە مە، الدە استىمىزدا قالدى ما؟
جوق، راس، تەلەۆيزوردى قوسىپ قالساڭىز نەمەسە گازەت-جورنالدى اشىپ قالساڭىز: «ۇستىمىزدەگى جىلى ءتۇسىم مول بولدى، ۇستىمىزدەگى جىلى ءويتتى-ءبۇيتتى» دەيدى. سوسىن، «بولىپ تابىلادى»، «كەلۋدە، بارۋدا»، «دەي تۇرعانمەن»، «وي-پىكىرمەن ءبولىستى»، «جۇمىس جاسايدى»، «قول جەتىمدى» «جىبەرىپ الماڭىزدار»، تاعى باسقا تولىپ جاتقان سوزدەرى بار. سوندا ءبىر جەرگە قوناققا بارساڭ، «مىناۋ ءبىزدىڭ ۇيدەگى كەلىنىڭىز بولىپ تابىلادى» دەيسىز بە؟ الدە، دوسىڭا «مونشاعا باراسىڭ با؟» دەسەڭ، ول ساعان «باعاسى قول جەتىمدى مە؟» دەي مە؟ كينو نەمەسە كونتسەرت كورسەتەردە «وسىنى جىبەرىپ الماڭىز!» دەيتىندەرى بار. «جىبەرىپ قويماڭىز» دەگەن سياقتى ەستىلەدى قۇرعىر... سونىمەن... ا، كەشىرىڭىزدەر، ايەلىم قوڭىراۋلاتىپ جاتىر. قازىر...
- ءسىزدى مۇقيات تىڭداپ تۇرمىن...
- اكەسى، ءسىز كەشىگۋ ۇستىندەسىز...
- وي، مەنى قويشى، ءوزىڭ جىلجىمايتىن مۇلىكتەسىڭ بە؟
- ءيا، كوتەرمە جانە بولشەك ساۋدا ورتالىعىنا بارىپ، قازىر عانا جىلجىمايتىن مۇلىككە كىردىم. ال، ءوزىڭ قايدا بولىپ تابىلاسىڭ؟
- مەن مىنا قۇرىپ كەتكىر جىلجيتىن مۇلىك جىلجىماي قالىپ، سونى شۇقىلاپ جاتىرمىن. 
- قوناقتار دەر كەزىندە ءتيىستى ورىننان تابىلىپ، سەن وكىنىشكە وراي كەشىگىپ جۇرمە.
- ولار نەشەدە كەلەدى دەپ جوسپارلانىپ وتىر؟ 
- كەشكى التىعا كەلەدى دەپ كۇتىلۋدە!
- نە ىستەۋدە؟
- كۇتىلۋدە!
- وي، قوي، مىناۋىڭ ارتىقتاۋ ەمەس پە؟
- قاي جەرى ارتىقتاۋ؟ تەلەۆيزوردان كۇندە «كۇتىلۋدە»، «جوسپارلانۋدا» دەپ ايتىپ ءجۇرمىز عوي. 
- ە، بوپتى، كۇتىلە بەرسىن. وندا مەن دە بارۋدامىن. 
- ايتا كەتۋ كەرەك، اقىرى ءبارى كەلەدى عوي دەپ، بۇگىنگى كۇن تارتىبىنە باتىشتەردى دە ەنگىزدىم...
- ويباي، ول بىزگە كىم بولىپ تابىلادى؟
- تۋ، سەن-اق ۇمىتاسىڭ دا قالاسىڭ. ول انا قۇداڭنىڭ تۋعان قارىنداسى بولىپ تابىلادى عوي. 
- ا، قۇداشا دەشى؟.. دەيتۇرعانمەن ول...
- ءيا، ءيا، قۇداشا! ەشقانداي دەيتۇرعانمەن ەمەس!
- ە، بوپتى. مەن دە جىلجۋ ۇستىندەمىن سىزگە قاراي...
- ءاي، اكەسى، اسىقپاي ابايلاپ ءجۇر. جولدا جول-كولىك اپاتى ورىن الماسىن!
- ءدال وسىنى ايتپاشى، بايبىشە.
- اكەسى، اۋ، اكەسى، ايتپاقشى، جول-جونەكەي ءبىر موشەك قارا التىن الا سالشى...
- نە الا سال؟
- قارا التىن، ياعني، كومىر الا سال دەيمىن. مونشا جاققانعا...
- ا، ءيا. قۇرسىن، شاتاسىپ بىتتىك قوي. وسى جۋرناليستەر ءبىرتۇرلى، قارا حالىق ءبىرتۇرلى سويلەگەندى قاشان قويامىز ا؟..

قاناعات ابىلقايىر

Abai.kz