مەنىڭ ەسىمنەن 2011 جىلعى ءتاۋ ەتكەن تاۋەلسىزدىگىمىزدىڭ 20 جىلدىعىن اتاپ وتكەن 16 جەلتوقسانداعى وقيعا كەتپەيدى. ءبارىمىز دە قۋانىشتى ەدىك، قۇدايعا شۇكىر قازاق 20 جىل بويى تاۋەلسىز ەل بولدى دەپ شاتتانۋدا ەدىك.

كەنەت ماڭعىستاۋ وبلىسىنىڭ جاڭاوزەن قالاسىندا قازاقتىڭ تاۋەلسىزدىگىنە وق اتىلدى. ءابىلازوۆ دەگەن ايار سۇمنىڭ اقشاسىنا ساتىلىپ، ۋنيفورماسىن كيگەن ارامزالار كوزلوۆ (اتى دا «كوزەل-پروۆوكاتورعا» كەلەدى ەكەن) دەگەن ارانداتۋشىنىڭ ايتاعىنا ەرىپ، تاۋەلسىزدىگىمىزگە وق اتتى. مەرەكەگە جيناپ قويعان دۇنيەلەردىڭ ءبارىن تاس-تالقان قىلىپ، مانسۇقتادى. سەندەرگە تاۋەلسىزدىك كەرەك پە، ءما، ەندەشە دەپ ءبارىن قيراتىپ، ءىلىپ قويعان تۋىمىزعا دەيىن قۇلاتتى.  

مىنە، وسى ارامنان جارالعان ساتقىنداردى پوليتسيا قىزمەتكەرلەرى تاراتىپ، كۇش جۇمساعان ەدى. ءبىرازىن اتىپ تا تاستادى. بىراق اۆتوماتپەن قىرۋ كەرەك ەدى، ءبىزدىڭ جىگىتتەر اياپ، پيستولەتپەن عانا اتتى. ەندى سول شىرىگەن جۇمىرتقالاردى اتقان ازاماتتاردىڭ ءبارى كىنالى بولىپ، جۇمىستان قۋىلىپ، كەيبىرەۋلەرىنىڭ ۇستىنەن قىلمىستىق ءىس تە قوزعالدى. ءىس جۇزىندە ولار ەلدىڭ تىنىشتىعىن، ەڭ الدىمەن تاۋەلسىزدىگىمىزدى قورعاعان باتىرلار ەدى عوي. بىراق ولاردى ەلدىڭ ءىشىن بۇلدىرۋگە تىرىساتىن ءبىر ساتقىن توبىرلار ايىپتاپ، ال انا اقشا ءۇشىن تاۋەلسىزدىككە قول كوتەرگەن ارامزالاردى ۇلتتىق گەرويعا اينالدىرىپ وتىر. ەلدى دە بۇكىل الەمگە جامانداپ، جازىقسىز جانداردى قىرىپ جاتىر دەپ جالا جاۋىپ باقتى. مەن وسىعان قاتتى ناليمىن.   

ساتقىنداردى اتقان ادال ازاماتتارىمىز اقتالۋى كەرەك. ولارعا مەملەكەت تاراپىنان ماراپاتتار بەرىلۋى كەرەك دەپ سانايمىن.   

رىسكەلدى قوناي 

 رەداكتسيادان

بىرنەشە كۇن بۇرىن Abai.kz پورتالىنىڭ ەلەكتروندى پوچتاسىنا رىسكەلدى قوناي اتتى ازاماتتىڭ اتىنان «ساتقىنداردى اتقاندار اقتالا ما؟» دەگەن وسى ماتەريال كەلىپ تۇسكەن ەدى. مەرەكە كۇندەرى مەرەكەلىك كوڭىل-كۇيدى بۇزباۋ ءۇشىن اتالعان ماقالانى جاريالاماي تۇرۋدى ءجون سانادىق. سەبەبى، دەموكراتيالى ەلدە كۇردەلى ماسەلەلەر وق اتۋ ارقىلى شەشىلۋگە ءتيىس ەمەس. ادامنىڭ قانى توگىلگەن سول ءبىر قاندى كۇن جايلى ءالى تالاي ايتىلادى، ءالى تالاي جازىلادى. سول ءۇشىن دە بءىز ءار ازاماتتىڭ پىكىرىنە سىيلاستىقپەن قاراۋدى ءجون سانايمىز. وقىرماندار تاراپىنان مۇنان وزگە ءتۇرلى وي-پىكىرلەر ايتىلىپ جاتسا، ولارعا دا ارنايى مىنبەر بەرۋگە دايىن ەكەنىمىزدى ەسكەرتەمىز...

 Abai.kz پورتالى