وندا وزبەك پرەزيدەنتىنىڭ كىشى قىزىنىڭ لوس-اندجەلەستىڭ قىمبات اۋدانىندا قۇنى ميلليونداعان دوللارلىق 4 بىردەي ساراي ساتىپ العانى تۋرالى جازىلعان.

«...اققۋلى كولى، مىسىرلىق ناقىشتا ويۋلانعان باعانالارى ۇستايتىن تۇرىك حاممامى بار سالتاناتتى شاتو. ونى حاديدپەن بايلانىستى شەلل-كومپانيا پرەزيدەنت كاريموۆتىڭ قىزى لولا كاريموۆا-تيللياەۆامەن تىعىز بايلانىستى باسقا كومپانياعا ساتقان. قۇقىق قورعاۋ ورگاندارىندا ىستەگەن جانە تەرگەۋ بارىسىنان جاقسى حاباردار ەكى دەرەككوزدىڭ حابارلاۋىنشا، كاريموۆتەر وتباسىنا قاتىستى بىرنەشە ەلدە جەمقورلىق ىستەر بويىنشا تەرگەۋ ءجۇرىپ جاتىر»،- دەپ جازىلعان «نيۋ يورك تايمس» بەتىندە باسىلعان ماقالادا.

NYT-تا جاريالانعان ماقالاعا وراي، ازات ەۋروپا جانە ازاتتىق راديوسىنىڭ ساۋالىنا بەرگەن جاۋابىندا ادۆوكات كليەنتتەرىنە قاتىستى جەمقورلىق تەرگەۋ ىستەرى تۋرالى پايىمداۋلاردى جوققا شىعاردى

«باق بەتەرىندە لولانىڭ اپكەسى گۇلنارا كاريموۆانىڭ بىرنەشە زاڭ قۇزىرەتىنىڭ اياسىندا تەرگەلىپ جاتقانى تۋرالى حابارلاندى. الايدا مەنىڭ كليەنتتەرىم ەشقانداي تەرگەۋدىڭ نىسانى بولعان ەمەس.» - دەلىنگەن حاتتا.

اقش-تىڭ بەدەلدى باسىلىمى «New York Times»-تا جەلتوقساننىڭ 15-دە جاريالانعان ماقالادا تەگى پالەستيندىك لوس-اندجەلەستىك دەۆەلوپەر موحاممەد ءحاديدتىڭ كۇمان تۋدىراتىن كەلىسىمدەرى تۋرالى جانە ونىڭ كومەگىمەن 2013 جىلدىڭ جازىندا لولا كاريموۆا – تيللياەۆا مەن كۇيەۋى تيمۋردىىڭ 58 ملن دوللارعا Le Palais ءۇيىن ساتىپ العانى جازىلعان. ەۋروپالىق جانە امەريكالىق باسىلىمدار بۇل جاڭالىقتى اينالىپ وتە المادى.

الايدا «نيۋ يورك تايمس» بۇل سارايدان بولەك، وسى قىمبات اۋدانداعى ميلليونداعان دوللار تۇراتىن تاعى ءۇش بىردەي ءۇيدى وزبەكستان پرەزيدەنتىنىڭ كەنجە قىزىنا تيەسىلى دەپ سانايدى.

لولا كاريموۆا-تيللياەۆانىڭ ادۆوكاتتارىى بۇل پيىمداۋلاردى ءۇزىلدى-كەسىلدى جوققا شىعارمايدى، بىراق كليەنتتەرىنىڭ تابىستارىن زاڭدى جولمەن تاپقانى تۋرالى مالىمدەيدى.