تاۋەلسىزدىك كۇنى دوستار بولىپ "قۇنانباي" كوركەم ءفيلمىن كوردىك. جالپى ۇنادى. قازاقى ەلەمەنتتەر، ورالىمدى ءسوز تىركەستەرى سۇيسىندىرەدى.

ەر بەينەلى وبرازدار بويعا رۋح بەرەدى. زەرە اجەمىزدىڭ بەينەسى، قۇنانبايدىڭ تەرگەۋگە ءتۇسۋى، يتجەككەن ايداۋىنان قۇتقارىلۋى وتە اسەرلى شىققان ءتارىزدى. بىراق، ماعان كينودا قوعامنىڭ ءدىني جاعىنا كوبىرەك ورىن بەرىلگەندەي كورىندى. بالا اباي دا كىشكەنە بولاشاق ۇلى ابايدىڭ كىشكەنتاي كەزىن بەرە الماعان سياقتى. ءيا، فيلم اياقتالار تۇستاعى اكە مەن بالانىڭ ءوزارا سۇحباتى ادەمى، الايدا، بالانىڭ مەشىتكە قاراي جۇگىرۋىن ءوز باسىم تۇسىنە العان جوقپىن. الدە "قازاقتى ءدىن قۇتقارادى" دەگەندى ايتقىسى كەلدى مە ەكەن رەجيسسەر. بالا اباي جاي عانا بيىك تاۋعا ورلەپ بارا جاتسا، سونىڭ ءوزى ۇلكەن مانگە يە بولار ەدى، مەنىڭشە. اباي دۇنيەتانىمىنىڭ بيىككە ورلەۋى، وعان اكەسىنىڭ اسەرى دەگەندەي نىشانداردى يشارالايدى... ال قىر استىنان كورىنگەن الماتى ورتالىق مەشىتى داستۇرگە ساي كوك كۇمبەزدى ەمەس، سارى التىن تۇستەس... قۇنانباي زامانىن ايتپاعاندا، سوڭعى 4-5 جىلدا عانا قالىپتاسقان ءۇردىس بۇل... "بىتكەن ىسكە سىنشى كوپ". جالپى، قازاقتىڭ قورجىنى ءبىر كينومەن تولىقتى. بيىلعى جىلى كورگەن دۇنيەلەرىمىزدىڭ ىشىندە تاريحشى بەكماحانوۆ جونىندەگى "امانات" فيلمىنە تەڭ كەلەر ۇزدىگى جوق ەكەندىگىنە تاعى دا كوزىمىز جەتە ءتۇستى. وسى ەكى ۇلتتىق فيلمدە دە كەنەسارى اتى اتالادى. جانە جاقسى جاعىنان. ول دا بولسا، جاس ۇرپاقتىڭ رۋحاني الەمى ءۇشىن ولجا دەپ بىلەمىن.

ارمان اۋباكىر

Facebook-تەگى پاراقشاسىنان