قازاق حالقى ءۇشىن، الاش جۇرتى ءۇشىن جەلتوقسان ايى – ءارى قاسىرەتتى اي، ءارى قاسيەتتى اي. 1986 جىلدىڭ 16-18 جەلتوقسان كۇندەرى  - قارا مۇجىقتىڭ تابانىمەن قارا جەرگە تاپتالعان حالقىمىزدىڭ ۇلتتىق نامىسىن جالىنداعان جۇرەگىنىڭ جالاۋىمەن جاپ-جاس ۇل-قىزدارىمىزدىڭ كوككە كوتەرگەن قاسيەتتى مەزەتى.

سونىمەن بىرگە كەڭەستىك رەسپۋبليكالاردى كۇرت وياتىپ، تاۋەلسىزدىك تاڭىن اتقىزۋعا دەگەن بارشا ۇلتتىڭ تالپىنىسىن ءتىرىلتىپ جەتكەن سەرگەك سىلكىنىستىڭ قاسيەتتى ءام كيەلى باستاۋى. سول سىلكىنىستىڭ ءدۇمپۋى – كەڭەستەر وداعىن اقىرى ىدىراتىپ تىنعان-دى. 

قاسىرەتتىڭ قاسيەتكە اينالۋى توگىلگەن ىستىق قاننىڭ، سوگىلگەن قايسار جۇرەكتىڭ ارقاسى ەدى.

ەلىنىڭ ەگەمەندىگىن، ۇلتىنىڭ تاۋەلسىزدىگىن عاسىرلار بويى اڭساعان ارىستارىنىڭ ۇلىق ارمانىن ەرلىكتەي ورلىگىمەن، جاۋجۇرەك جانكەشتىلىگىمەن جاقىنداتىپ، 1991 جىلدىڭ 16-جەلتوقسانىندا تاۋەلسىزدىك تاڭىن اتقىزىپ، كوك تۋىمىزدى توبەمىزگە كوتەرتكەن سول جەلتوقساندىق جىگەرلى جاستار ەدى.

قاسىرەتتى كۇن تاعى دا وسىلاي قاسيەت تۇتار كۇنگە اينالعان-دى.

امال نە، 2011-جىلدىڭ 16-جەلتوقسانى قىرشىندارىمىزدىڭ قىزىل قانىنا بويالىپ، قايتادان قاسىرەت كۇنى بوپ وياندى.

...قازاققا قازاق وق اتتى.

جاي قازاقتى باي قازاق اتقىزىپ سالدى.

ءور قازاقتى توردەگى قازاق قازاعا ۇشىراتتى.

قاسيەتتىمىزدى قاسىرەتىمىز بۇركەدى.

قاسيەت قاسىرەتپەن الماستى.

بۇدان بىلاي 16-17 – جەلتوقسان – ازالى كۇن، قازالى كوكىرەك كۇنى دەپ اتالدى.

ازالى كۇندى تۋعىزعان جەندەتتەردىڭ اجالى جەتەدى ءالى. ەل كەگى ەشكىمدى دە ەسكەرۋسىز جىبەرمەيدى.

سوفى سماتاەۆ

Abai.kz