ازاتتىق ءتىلشىسىنىڭ حابارلاۋىنشا، تۇرعىن پيكەتتە قولىنا ءبىلالوۆتىڭ سۋرەتى باسىلعان پلاكات ۇستاپ شىعىپ، ونى قاماۋدان بوساتۋدى سۇرادى. پيكەتكە كەلگەن پوليتسەي زايتسەۆانىڭ قۇجاتىن تەكسەرگەننەن باسقا ەشنارسە ىستەمەدى.

استانا قالاسى سارىارقا اۋداندىق 2-سوتى 11 قاراشادا بولاتبەك ءبىلالوۆتى ەكى ايعا قاماۋعا العان. بىلالوۆكە «ارازدىق تۋدىرۋ» ايىبى تاعىلعان. تەرگەۋشىلەردىڭ پىكىرىنشە، بەلسەندى بۇل ارەكەتتى «بۇقارالىق اقپارات قۇرالدارىنىڭ الدىندا، كوپشىلىككە جاريا تۇردە جاساعان».

بولاتبەك ءبىلالوۆ استاناداعى ءسۇرىلۋى ءتيىس ۇيلەر تۇرعىندارىنىڭ مۇددەسىن سوتتا قورعاۋشى رەتىندە تانىمال. سونىمەن بىرگە ول – رەسەيلىك زىمىرانداردى بايقوڭىردان ۇشىرۋعا قارسى شىعىپ جۇرگەن «انتيگەپتيل» توبىنىڭ بەلسەندىسى.