قازاقستان پرەزيدەنتى نۇرسۇلتان نازارباەۆ رەسەيدىڭ «جىل ادامى 2015» سىيلىعىمەن ماراپاتتالدى.  قازاقسان پرەزيدەنتىنە اتالمىش ماراپاتتى «حالىقارالىق قاتىناستار» نوميناتسياسى بويىنشا تاپسىرعان. بۇل تۋرالى abai.kz پورالى nur.kz سايتىنا سىلتەمە جاساي وتىرىپ حابارلايدى.

ماراپاتتاۋ ءراسىمى رەسەي  استاناسىندا ورنالاسقان حريستوس قۇتقارۋشى (حريستا سپاسيتەليا) شىركەۋىنىڭ سەرگيەۆسكى زالىندا وتكەن.

سونداي-اق، اتالمىش ماراپاتتى رەسەي فەدەرايياسىنىڭ ۇلتتىق بيولوگيالىق ينستيتۋتى مەن ەكونوميكالىق ستراتەگيالار ينستيتۋتى تاعايىنداعان.

ۇيىمداستىرۋشىلاردىڭ ايتۋىنشا، قازاقستان پرەزيدەنتى نۇرسۇلتان نازارباەۆ ءوزىنىڭ كورەگەن ساياساتى مەن الەمدىك ساياسي ارەناداعى بەدەلى جانە ەۋرازيالىق ەكونوميكالىق وداقتى نىعايتۋداعى ەڭبەگى ءۇشىن ماراپاتتالىپ وتىر.

ەستەرىڭىزگە سالا كەتەيىك، پرەزيدەنت نازارباەۆ وسىعان دەيىن بۇل اتاقتى 2012 جانە 2014 جىلدارى جەڭىپ العان بولاتىن.

ايتا كەتەيىك، بيىلعى جىلعى «جىل ادامى 2015» جوباسىنىڭ لاۋرەاتتارى قاتارىندا قازاقستان پرەزيدەنتى نۇرسۇلتان نازارباەۆتان وزگە، رەسەي پرەزيدەنتى ۆلاديمير پۋتين، بەلورۋسيا پرەزيدەنتى الەكساندر لۋكاشەنكو، قحر توراعاسى سي تسزينپين، كۋبا رەسپۋبليكاسى مينيسترلەر كەڭەسى مەن مەملەكەتتىك كەڭەستىڭ توراعاسى راۋل كاسترو، تاتارستاننىڭ ءبىرىنشى پرەزيدەنتى مينتيمير شايميەۆ، ماسكەۋدىڭ جانە بۇكىل رەسەيدىڭ پاتريارحى كيريلل،  اكادەميك لەو بوكەريا، كينورەجيسسەر نيكيتا ميحالكوۆ جانە باسقالار بولعان.

بۇل بيىلدىققا ۆلاديمير  پۋتين باسقاراتىن مەملەكەتتىڭ قازاقستان پرەزيدەنتى كورسەتىپ وتىرعان العاشقى قۇرمەتى ەمەس.

مىسالى، بيىلعى جىلدىڭ ساۋىرىندە رف باس پروكۋرورى يۋري چايكا مىرزا پرەزيدەنت نازارباەۆقا قۇرمەت وردەنىن تاققان.

ال شىلدە ايىندا رەسەي پرەزيدەنتى ۆلاديمير پۋتين قازاقستان پرەزيدەنتىنە رەسەيدىڭ ەڭ جوعارعى الەكساندر نەۆسكي اتىنداعى وردەنىن تاپسىرعان.

سونىمەن قاتار پرەزيدەنت نازارباەۆ رەسەي فەدەراتسياسى اۋماعىنداعى بىرنەشە جوعارعى وقۋ ورىندارىنىڭ قۇرمەتتى پروفەسسورى اتانىپ تا ۇلگەرگەن.

بۇنىڭ سىرتىندا رەسەيدىڭ بىرنەشە فەدەرالدى وبلىستارىندا قازاقستان پرەزيدەنتى نۇرسۇلتان نازارباەۆتىڭ ەسىمىنە بەرىلگەن كوشەلەر مەن ساياباقتار جانە ەسكەرتكىش مۇسىندەرى دە بار.

نۇرەگلدى ابدىعانيۇلى

Abai.kz