سوتتالۋشى نازارباەۆتى ءوزىنىڭ ۇستازى رەتىندە اتاپ، سوناۋ 1990-شى جىلدارى نازارباەۆتىڭ ءوز بويىنان بولاشاق باسقارۋشىنى كورگەنىن جانە سولاي سەنىم ارتقانىن ايتتى.

«مەن شىن كوڭىلىممەن نۇرسۇلتان ءابىشۇلى نازارباەۆتان سەنىمىن اقتاماعانىم ءۇشىن كەشىرىم سۇرايمىن.  ەگەر سوت پەن ەلىمىزدىڭ باسشىسى قاتارعا قايتا قوسىلۋىما مۇمكىندىك بەرسە، ءبىلىمىم مەن تاجىريبەمدى ەلىمىزدىڭ يگىلىگى ءۇشىن جۇمىس ىستەۋگە جانە ادال اتىمدى اقتاۋ ءۇشىن جۇمساۋعا دايىنمىن»، - دەدى سوتتاعى سوڭعى سوزىندە سەرىك احمەتوۆ.

احمەتوۆ مەملەكەتتىك ايىپتاۋشىعا دالەلدىڭ جوقتىعىنان ايىپتاۋ قورىتىندىسىنان اسا ۇلكەن كولەمدە پارا الۋ تۋرالى باپتى الىپ تاستاعانى ءۇشىن العىس ءبىلدىردى.  

ول  شىنايى ءارى ادىلەتتى ۇكىم شىعاتىنىنا ۇمىتتەنەتىنىن جەتكىزدى.

جەلتوقساننىڭ 9-دا اياقتالعان ءجارىسسوز بارىسىندا، بۇرىنعى پرەمەر-ءمينيستردىڭ بارلىق ءتورت ادۆوكاتى سۋديادان احمەتوۆتى بارلىق ايىپتاۋ باپتارى بويىنشا اقتاپ شىعۋدى سۇرادى. سەرىك احمەتوۆ تە كىناسىز ەكەندىگىن مالىمدەپ، وزىنە وسى ءىس بويىنشا سوتتالۋشى ورىندىعىندا وتىرعان وزگە ادامداردىڭ جالا جاپقانىن ايتتى.

جالپى وسى ءىس بويىنشا 21 ادامعا ايىپ تاعىلعان، ولاردىڭ اراسىندا قاراعاندى قالاسى مەن قاراعاندى وبلىسىنىڭ بۇرىنعى جوعارى لاۋازىمدى شەنەۋنىكتەرى بار.

Abai.kz