تۇركىستاندىق جىگىت ءوزىن ءوزى ورتەپ جىبەرگەن
- تۇركىستاندا 20 جاستاعى ستۋدەنت ءوزىن ورتەپ جىبەردى دەپ حابارلايدى وقو ءىىد ءباسپاسوز قىزمەتى. وقيعا 7 جەلتوقسان كۇنى ورىن العان. سالدارىنان بوزبالا دەنەسىنىڭ 90 پايىزىن ءورت شالىپتى.
قىلمىستىق ءىس قوزعالىپ، وقيعانى تەرگەۋ بارىسىندا ورتەنگەن بالانىڭ اكەسى ءمان-جايدىڭ قالاي بولعانىن ايتىپ بەردى. ونىڭ سوزىنە سەنسەك، وقيعا كەشكى ۋاقىتتا ورىن العان. "ۇيدە وتىرعانىمدا ەسىك الدىندا ءيتتىڭ تىنىمسىز ءۇرىپ كەتكەنىن ەستىپ، دالاعا شىقتىم، بالام ورتەنىپ جاتىر ەكەن. دەرەۋ وشىرۋگە ۇمتىلدىم. وشىرگەن سوڭ اۋرۋحاناعا جەتكىزدىم" دەيدى 45 جاستاعى تۇركىستاندىق تۇرعىن.
ونىڭ ايتۋىنشا، سوڭعى ۋاقىتتا وتباسىندا ەشقانداي داۋ-جانجال، ۇرىس-كەرىس ورىن الماعان. بالاسىن مۇنداي ارەكەتكە نە يتەرمەلەگەنىن دە ول بىلمەيتىنىن ايتتى. قازىرگى تاڭدا وقيعانىڭ سەبەپ-سالدارىن انىقتاۋ ءۇشىن پوليتسيا تەرگەۋ امالدارىن جۇرگىزۋدە.
ەستەرىڭىزگە سالايىق، وسىدان بىرنەشە اي بۇرىن ءدال وسىنداي وقيعا تاراز قالاسىندا دا ورىن العان بولاتىن. ول كەزدە ستۋدەنت "نۇر وتان" پارتياسى فيليالىنىڭ الدىنا بارىپ، كامەرا الدىندا ءوزىن ورتەپ جىبەرگەن بولاتىن.
