سەكسەن التىنىڭ سوڭعى كۇندەرىنىڭ ءبىرى ەدى. اۋديتوريادا وتىرمىز. دالادا ۇسكىرىك اياز، تۇتەگەن بوران. اق باس پروفەسسورىمىز ساباقتىڭ تاقىرىبىن باستاپ قويعانىمەن ءارى قاراي ەشتەڭە جارىتىپ ايتپادى. ءالسىن، ءالسىن جۇرەگىن ۇستاپ، تەرەزەدەن سىرتقا قاراپ باسىن شايقايدى. اۋىر كۇرسىنەدى. ءبارىن كورىپ وتىرمىز. ءبىر كەزدە بىزگە بۇرىلدى. 
- الەمدەگى ەڭ ينتەرناتسيوناليست ۇلت ءبىز ەدىك قوي. مىناۋ دەگەن سۇمدىق! ەندى سول الەمنىڭ الدىندا ماسقارا قىلىپ. ..
ەشكىم ۇندەمەدى. ۇستازىمىز تاعى دا تەرەزە جاققا بارىپ، دولدانىپ جاتقان الماتىنىڭ اۋا-رايىنا كوز سالىپ ءبىراز تۇردى. قولى ءالى جۇرەك تۇسىندا. 
- ەندى نە بولادى؟ ءيتتىڭ بالالارى-اي، نە ىستەدىڭدەر؟
داۋىسى اقىرىن ەستىلىپ تۇر. كىمدى ايتىپ جاتقانى تۇسىنىكتى. الاڭدا بولعانداردىڭ بارلىعىنا ارنالعان ءسوز بۇل. وسى ساتتە سىقىر ەتىپ اۋديتوريانىڭ ەسىگى اشىلىپ، ىشكە قارا پالتولى ەكەۋ ەندى. رۇقسات سۇراپ، ەسىك قاعىپ اۋرە بولعان جوق. جۇرىستەرى سۋىت. كىم ەكەندىكتەرiن اق باس پروفەسسورىمىز بىردەن تۇسىنگەن سەكىلدى. ءوڭى قۋارىپ شىعا كەلدى. ءبىز دە بىلدىك. انا جاقتان عوي. ولاردىڭ الاڭداعى سۋرەتتەردى كوتەرىپ، اۋديتوريا ارالاپ جۇرگەنىن مانا ەستىگەنبىز. الگىلەر كوپ سوزبالاقتامادى. بىردەن ىسكە كوشتى. 
- ءبىز ءبارىن بىلەمىز، - دەدى، - بۇگىن، ەرتەڭ الاڭدا كىمدەردىڭ بولعانىن ءبارىبىر انىقتايمىز. ودان دا قازىردەن-اق ارالارىڭدا الاڭعا كىمدەر بارعانىن وزدەرىڭ ايتا بەرىڭدەر! بارماعانداردى دا بىلەمىز...
تاعى دا ۇنسىزدىك. ەشكىمنىڭ ءتىس جارمايتىنىنا سەنىمدىمىز. جۇرەگىن ۇستاپ پروفەسسور تۇر. وسى ساتتەگى تۇرىنە قاراۋ قانداي ايانىشتى ەدى. 
- قورقاقتار! - دەگەن اششى داۋىس سەلك ەتكىزدى ءبارىمىزدى. اناۋ اڭگىمە جازاتىن قىز ەكەن. الەم كلاسسيكاسىن جىلىكتەپ بەرەدى دەيتىن. تىم اقىلدى قىز سياقتى ەدى. 
- نەمەنەگە بۇعىپ وتىرسىڭدار! كەشە عانا باتىر ەدىڭدەر عوي... ال، ايتىڭدار ەندى ەرلىكتەرىڭدى!
"تىم اقىلدى " قىز توقتاماي ءبىراز سويلەدى. ءبارىبىر ءۇنسىزبىز. اۋزىن اشسا ەرتەڭ وقۋمەن قوش ايتىساتىنىن اركىم-اق ىشتەي سەزىپ وتىر. ءسوزىنىڭ سوڭىندا الگى قىز تىم قاتتى كەتتى. 
- مەن سەندەرمەن ءبىر اۋديتوريادا وتىرۋعا نامىستانامىن، ۇيالامىن، - دەپ ورنىنا وتىرا بەردى. 
- وتىرماساڭ وتىرما بىزبەن، - دەگەن داۋىس شىقتى ارت جاقتان، - نامىستانساڭ قازىر كەت! سەندەيلەردى ءبىزدىڭ جاقتا "ترياپكا" دەيدى. ۇلتىن سۇيمەيتىن سەندەيلەردىڭ اياق استىندا جاتقان "ترياپكادان" ايىرماشىلىعى جوق. اياق ءسۇرتۋ كەرەك سەندەرمەن...
ءما، سويلەپ تۇرعان جاكەڭ عوي. قاق-سوقپەن ءىسى جوق، توماعا، تۇيىق جىگىت ەدى. الاڭدا ونىڭ دا بولعانىن "اقىلدى " قىز بىلەتىن. نە بولار ەكەن؟ قىز ۇندەمەدى. قارا پالتولى ەكەۋ تۇك شىقپاسىن سەزگەندەي، جاكەڭە جاقسىلاپ ءبىر قاراپ الدى دا سىرتقا بەتتەدى. ارتتارىنان بەتىن باسىپ ەڭىرەپ "اقىلدى " قىز دا شىقتى. ءبىر ايدان سوڭ جاكەمىز وقۋدان شىققانداردىڭ تىزىمىنە ءىلىنىپ، الىس اۋدانداردىڭ بىرىنە گازەتكە جۇمىسقا كەتتى. "تىم اقىلدى" قىز باسقا وقۋ ورنىنا اۋىستى دەپ ەستىدىك. 
...جيىرما سەگىز جىل ءوتتى عوي. باسىلىم بەتتەرىنەن "اقىلدى قىزدىڭ" تۋىندىلارىن اندا-ساندا كوزىم شالىپ قالادى. جۇرت كەرەمەت دەسەدى. مەن وقي المايمىن. وقىماي وتەتىن شىعارمىن. ال، جاكەڭ... كەشە عانا كوردىم ونى.
- ءبىراز بولدى جۇمىسسىز جۇرگەنىمە، - دەيدى، - ايتەۋىر، بالا-شاعا اش ەمەس. ەركەك ەمەسپىز بە! بىردەڭەسى بولار...

ارمان سقابىلۇلى

Facebook-تەگى پاراقشاسىنان