ورداباسى اۋدانىنا وسى جىلدىڭ 10 ايىندا ءوندىرىستى دامىتۋ بويىنشا 21 ملرد. 511 ملن. تەڭگەدەن استام ينۆەستيتسيا تارتىلعان. بۇل وتكەن جىلعىمەن سالىستىرعاندا 2,5 ەسەگە ارتىق، دەپ حابارلادى وقو اكىمىنىڭ ءباسپاسوز قىزمەتىنەن. 

«ەلباسىنىڭ 30 قاراشا كۇنگى جولداۋىندا ايتىلعان ەڭ ماڭىزدى ماسەلەلەردىڭ ءبىرى - ەلىمىزگە ينۆەستيتسيا تارتۋ بولدى. وندا مەملەكەت باسشىسى الداعى ون جىلدا 100 ملرد دوللار ينۆەستيتسيا تارتىلۋ كەرەكتىگىن ايتىپ، 660 مىڭنان استام ادامدى جاڭا جۇمىس ورنىمەن قامتۋ ماسەلەسى العا قويىلعان ەڭ نەگىزگى ماقساتتاردىڭ ءبىرى دەگەن بولاتىن. وسى مىندەتتەردى ورىنداۋدا ورداباسى اۋدانىنىڭ الەۋەتى جەتكىلىكتى.

ويتكەنى، بۇگىننىڭ وزىندە ورداباسى اۋدانىنا وسى جىلدىڭ 10 ايىندا ءوندىرىستى دامىتۋ بويىنشا 21 ملرد. 511 ملن. تەڭگەدەن استام ينۆەستيتسيا تارتىلعان. بۇل وتكەن جىلعىمەن سالىستىرعاندا 2,5 ەسەگە ارتىق. بۇل تۋرالى وقو ايماقتىق كوممۋنيكاتسيالار قىزمەتىندە وتكەن بريفينگتە اۋدان اكىمى س.ساپارباەۆ ءمالىم ەتتى»، دەلىنگەن حابارلامادا. 

وسى تارتىلعان ينۆەستيتسيانىڭ ناتيجەسىندە اۋداندا 9,7 ملرد. تەڭگەنىڭ ءونىمى ءوندىرىلىپ، وبلىس بويىنشا كوش باستاۋدا. ءباسپاسوز ءماسليحاتىندا اۋدان اكىمى جىل باسىنان بەرى 20 ملرد. 619 ملن. تەڭگەدەن استام اۋىل شارۋاشىلىق ءونىمى وندىرىلگەنىن دە ايتتى. 

ونىڭ ىشىندە مال شارۋاشىلىعىنىڭ ءونىمى 11 ملرد. تەڭگەدەن استام بولسا، اۋىل شارۋاشىلىعى ءونىمى 9 ملرد. تەڭگەدەن استام. ال اۋداندا جالپى جۇمىس ىستەيتىن 8 579 شاعىن جانە ورتا كاسىپكەرلىك بار. ولاردا 19 مىڭنان استام ازامات جۇمىسپەن قامتىلسا، بيىل شاعىن جانە ورتا بيزنەس سالاسىندا 316 جاڭا جۇمىس ورنى اشىلعان. سونىمەن قاتار، بريفينگتە كوممۋنالدىق ماسەلەگە توقتالعان سامات ساپارباەۆ اۋدانداعى 57 ەلدى مەكەننىڭ 39-ى قۇبىرلى اۋىز سۋمەن ياعني، تۇرعىنداردىڭ 88,7 پايىزى تىرشىلىك نارىمەن قامتىلعانىن حابارلادى.

Abai.kz