بۇگىن «استانا» الاڭىندا «الماتى قالاسى ماڭىندا ازىق-تۇلىك بەلدەۋىن دامىتۋ» باعدارلاماسى شەڭبەرىندە الماتى وبلىسىنىڭ 16 اۋدان، 3 قالا، «جەتىسۋ اگرو ساۋدا» مەن «الماتى» اۋىل شارۋاشىلىعى ءوندىرىس كووپەراتيۆتەرىنىڭ قاتىسۋىمەن بيىلعى جىلدىڭ العاشقى كەڭەيتىلگەن اۋىل شارۋاشىلىعى جارمەڭكەسى ءوتتى.

بيىلعى جارمەڭكەگە 170 توننادان استام تازا سۇرىپتى اۋىل شارۋاشىلىعى ونىمدەرى اكەلىنگەن. قالا تۇرعىندارىنا  جالپى سوماسى 111,2 ملن. تەڭگە بولاتىن اۋىل شارۋاشىلىعى تاۋارلارىنىڭ 50-گە تارتا ءتۇرى ۇسىنىلدى. ونىڭ ىشىندە 44,3 توننا ەت ونىمدەرى، 4,1 توننا بالىق ەتى، 13,9 توننا ءسۇت جانە ءسۇت ونىمدەرى، 38,1 توننا كارتوپ، 38,2 توننا كوكونىس، 9,9 توننا الما مەن جەمىس-جيدەكتەر، سول سياقتى بال، كۇرىش، ۇن، جۇمىرتقا، باكالەيا جانە باسقا دا ءونىم تۇرلەرى ساۋداعا شىعارىلدى.

سونداي-اق، كوكتەمگى جارمەڭكەگە الماتى وبلىسىنىڭ اكىمى اماندىق باتالوۆ پەن الماتى قالاسىنىڭ اكىمى باۋىرجان بايبەك بارىپ قاتىسقان.

-     الماتى ماڭىندا ازىق-تۇلىك بەلدەۋىن دامىتۋ – مەملەكەت باسشىسى الدىمىزعا قويعان ۇلكەن مىندەتتەردىڭ ءبىرى. بۇل باعىتتا ءبىز قالا باسشىلىعىمەن بىرلەسىپ جۇمىستار اتقارىپ كەلەمىز. اۋىل شارۋاشىلىعى جارمەڭكەسىن وتكىزۋ – ازىق-تۇلىك بەلدەۋىن دامىتۋ جولدارىنىڭ ءبىرى، - دەپ اتاپ ءوتتى ا. باتالوۆ.

جالپى، ازىق-تۇلىك بەلدەۋىن دامىتۋ ماقساتىندا الماتى وبلىسىندا وسىمدىك جانە مال شارۋاشىلىقتارى وندىرىستەرىىڭ كولەمىن ارتتىرۋ، وڭدەۋ ونەركاسىبىن دامىتۋ، ازىق-تۇلىكتى ساقتاۋعا ينفراقۇرىلىم جۇرگىزۋ، تيپتىك جانە شاعىن وتباسىلىق جىلىجايلار جۇيەسىن، سونىمەن قاتار ءسۇت-تاۋارلى فەرمالارى مەن مال بورداقىلاۋ الاڭدارىن كوبەيتۋ جۇمىستارى جۇرگىزىلۋدە.  

Abai.kz